Loncat ke isi

Bir pletok

Deri Wikipédi
Bir pletok
Bir pletok botolan punya roman
TanjaanMinuman
Asal negeriIndonésia
DaèrahJakarta[1]
Suhu pas ditanjainAnget bisa, dingin bisa
Bahan poko'Aèr, cengké, daon pandan, jahé, kapolaga, kayu manis, garem, gula, pala, secang, seré[2]
Bahan tambahanAdes, bunga lawang, cabé jawa, daon jeruk purut, jinten item, kayu angin, kayu mesoyi, kencur, merica, temu kunci, temu lawak

Bir pletok atawa bir klotok[3] entu orang Betawi punya minuman nyang ngangetin ama nyegerin awak. Ni minuman dibikinnya paké jahé, secang, ama laèn-laèn macem-macem rempah. Cara ngeja ni bir pletok entu mulain deri mili-mili ama nyiapin bahan bikin, digodog breg bareng-bareng, ampé ditapis. Sebelonnya ditanjain, ni bir pletok juga' bisa dikocok ampé merusmus. Bir pletok punya warna, wangi, ama rasa bolé laèn-laèn ngrikut dia punya bahan bikin ama cara ngeja. Ni minuman tokcèr bakal nurunin rèsiko penyakit nyang kaga' nepa bahna godogan rempahnya gableg jat-jat antioksidan seabreg.

Pegimana sanonya bisa nongol ni bir pletok kaga' tau ada kecatet bener-bener. Asanan, ni bir pletok sanonya dibikin bahna orang Betawi punya kepèngènan gableg minuman tanjaan saban keriaan bakal diadu ama tu orang Peringgi punya aèr anggur ama bir. Cumannya, biar digero' "bir", ni minuman kaga' ada alkoholnya ama bisa diaciin halal juga'. Ni bir pletok kudu ada kapan orang Betawi punya hajatan atawa keriaan kaya' pengantèn sunat ama kawinan, ama di tempat-tempat plesiran. Ni minuman terdisionil udah diakuin jadi Indonésia punya budèl budaya bukanbenda, serènta jadi orang Betawi punya lambang budaya nyang diopènin ama guwernemèn Jakarta.

Nama

[permak | permak sumber]

Nah, bir pletok punya nama entu, kalo disasab, rada kaga' jelas juntrungnya. Entu nama bir mentak dicomot deri basa Welanda punya setilah bier 'bir',[4] ya biar kata ni minuman kaga' bikin tèlèr[5] èn dia punya campuran kaga' ada sama acan ama bir.[4] Biar gitu, ada juga' nyang nyananya kalo ni nama bir benernya dicomot deri basa Arab punya setilah biʼrun atawa 'sumur'.[6] Nama pletok entu mentak dicomot deri bunyi bletok wayah notok dia punya bahan bikin sebelon digodog,[7] wayah entu campuran dikocok paké bungbung bangbu[8][9] atawa belèk bakal ngeja nguarin busa,[10] wayah kerop entu minuman dibuka',[9][11] atawa deri gletak-gletuk batu ès di dalem téko nyang dipaké bakal nanjain ni minuman.[8]

Aturan bakal nama bikinan pangan kuaran LPPOM Majelis Ulama' Indonésia ada ngomongin kalo nama bikinan pangan nyang pèngèn diaciin halal kaga' bolé ada unsur haram atawa dilarang buat orang Selam, kaya' misal kata bir nyang sanonya punya ma'na minuman sebangsa aèr serani.[12] Cumannya, ni bir pletok kaga' kena entu aturan, bahna dia udah keanggep ʻurf atawa tumannya orang mari, karangan juga' udah kesohor jadi minuman bakal ngangetin awak nyang kaga' ada haram-haramnya kalo diliat deri dia punya jat.[13][14]

Sejarah

[permak | permak sumber]
Menir pada ngeriung di Betawi wayah jaman Hindia Welanda

Kaga' ada catetannya nyang bilangin kapan awal mulanya enni bir pletok nongol,[7] tapi ni minuman paling kaga' udah ada semprakan jaman normal, dah.[8] JJ Rizal nyang tukang ngaji sejarah bilang kalo ni bir pletok sanonya dikeja ama masarakat Betawi jadi tironan ama aduannya orang Peringgi punya aèr serani.[15] Pas jaman normal, orang Betawi gedongan saban ari mantengin orang Welanda pada atoh banget nenggak bir bakal ngangetin dia punya awak.[9] Belonan, mah, entu keriaan-keriaan Welanda dianggep ramé kalu ada tanjaan aèr anggurnya ampé pating kancab ke mana-mana.[15][16] Pan, orang Betawi, mah, nyang namanya kèok gè' ogah pisan. Jadinya, orang kita jadi pada pèngèn juga' minuman nyang bisa ditanjain saban ada keriaan. Cuman lantaran orang Betawi punya igama entu banyak nyang Selam, dia pada kaga' bolé minum ciu. Mangkanya, dia pada bikin, dah, tu bir pletok, ya'entu minuman bakal ngangetin awak nyang dia punya warna mèra rada coklat kaya' bir, tapi kaga' ada alkoholnya acan.[15][17] Bolé dibilang ni minuman entu kisaran atawa gabregan ketumanan Peringgi nyang pebotoh nginum minuman ama orang kita nyang pebotoh ngadonin rempah.[18]

Bir pletok mulain pating seliweran ditanjain paké pikulan kuliling semprakan taon 1900-an.[19] Cumannya kalo ngrikut sejarahnya, dia punya pamor mulain ngeriep wayah taon 1970-an, keruruban ama minuman Kulon nyang derak di toko atawa warung madang karangan tu banda luar pada masup ke Jakarta. Biar entu makanan Betawi nyang mulain pada kegencèt kaga' ilang, guwernemèn di Jakarta ongsogin, dah, tu bir pletok ama laèn-laèn daharan Betawi di macem-macem keriaan, paling gedénya di Pekan Raya Jakarta. Ni bir pletok terus dipegarin, dikeja ngebadeg bikinan turunan. Cumannya, mah, pagon aya. Pemegaran begini kaga' juga' ngasilin marian atawa dampak nyang gedé. Tukang bikin bir pletok, pan, biasanya cuman ngelakonin dia punya dagangan kecit-kecit aja. Atuh puguh, mah, kadanan ngebuat gedé-gedéan kalo puncinya kaga' cumpon. Karangan, tu makanan Betawi udah pada kèok pamor di Jakartanya kendiri lantaran orang Betawi pating mijah ke utekan peminggiran.[20]

Ni minuman udah diaciin jadi budèl budaya bukanbenda di trap sional semprakan taon 2014.[1] Belèd Daèrah nomer 4 Taon 2015 serènta Belèd Gubernur nomer 11 Taon 2017 nyang dikuarin ama guwernemèn Propinsi DKI Jakarta ngaciin bir pletok jadi atu deri lapan orang Betawi punya lambang budaya nyang kudu diopènin.[21] Gègèr-gègè setida' di Indonésia taon 2020 pas mulain mènclok tu awar-awar Covid-19, bir pletok jadi pating laris dibeli bahna ngebadeg nyang punya pemikir ni minuman tokcèr bakal ngeja kuat kosènan awak.[22] Wayah taon 2022, bir pletok punya resèp nanggrak di nomer tiga deri sepulu resèp nyang pada dicariin warga jala Indonésia liwat Google Search.[23]

Bahan bikin

[permak | permak sumber]

Bahan bakal bikin bir pletok bisa laèn-laèn ngrikut daèrah ama tukang nyang bikin. Nyang ajeg cuman jahé ama kayu secangnya doang.[24][25] Jahé nyang jadi unsur paling gedé nyumbangin dia punya rasa pedes-pedes anget.[26] Ni bir pletok bédanya ama Bogor punya bir kocok entu cuman pekara bir kocok kaga paké secang aja.[27] Adapun barang berapa rempah seger nyang dipaké bakal bir pletok punya campuran entu ada daon pandan wangi, daon jeruk purut, ama seré.[28][29] Kalo rempah keringnya entu kaya' misal ades manis, cabé jawa, cengké, jinten item, kepolaga, kayu angin, kayu manis, kayu mesoyi, merica, ampé biji pala.[2][22][28] Ragem jahé nyang dipaké entu bisa jahé emprit, jahé gajah, jahé mera, atawa dioplosin.[26][28] Rimpang selaènnya jahé, kaya' kencur, temu lawak, ama temu kunci juga' bolé dipaké bakal ni minuman punya campuran biar mingkin mantep dia punya rasa dah.[30]

Biar dikata ni minuman aseli Betawi, ga' semua-mua orang Betawi demen ama dia punya rasa ama wangi rempahnya nyang kenceng.[31][32] Ni ihwal punya lantaran, ragem rempah nyang kepaké ama takerannya juga' bisa macem-macem, bakal dapetin rasa ama wangi nyang orang kepèngèn. Pemakéan garem ama pemanis juga' bisa bèda-bèda pakemnya.[2] Misalnya nih ya, ada tukang bikin nyang sengaja ga' paké seré, atawa nambahin tu aèr kentel manis bakal campurannya.[32] Laèn tukang juga' ada ngeja ragem nyang rasanya ga' bikin enek bakal bocah pada, juga' bakal orang nyang ga' demen rasa-rasa taneman obat.[22] Rasa manis di bir pletok bolé dapet deri gula pasir, gula mèra, campuran dua-duanya,[33] atawa bisa juga' deri penuker gula; puguh, dia punya takaran macem-macem ngrikut pèngènnya si tukang bikin ama dia punya langganan.[34][35]

Apa-apa campuran bakal bikin bir pletok dikasi unjuk di Musium Betawi[36]

Bèda bahan bikin nyang kepaké pas ngejain bir pletok ga' cuman nyawabin dia punya rasa ama wangi, tapi juga' warnanya; mulain deri nyang mèra orèn-orèn, mèra cengcokelatan, ampé mèra lembayung.[37] Bahan kelir alami nyang kepaké di bir pletok entu kayu secang ama daon pandan.[33] Pemakéan kayu secang bisa ngeja ni minuman bèda-béda warna ngrikut dia punya trap keaseman. Kalo asem dia konèng-konèng, kalo nètral dia mèra ngejrèng, kalo basa dia mèra ungu-ungu.[38]

Macem ragem bir pletok punya bahan bikin ngunjukin roncat-roncèt ragem budaya nyang masarakat Betawi kesawaban.[39] Laèn minuman nyang bahannya godogan taneman obat bolé nemu di barang berapa budaya Nusantara, kaya' misal di orang Jawa punya jamu atawa orang Bali punya loloh. Rempah kaya' kepolaga atawa kayu manis sanonya galib dipaké di makanan Arab ama makanan India, dua-dua terdisi masak nyang nimbrung nyawabin makanan Betawi.[40] Barengan ama kerak telor, JJ Rizal nggero' ni bir pletok jadi "keja agung paling tulèn" orang Betawi punya.[41] Sepegimana tu kerak telor ngunjukin Betawi punya budaya tani liwat pemakéan bahan asil taneman ama ternakan, ni bir pletok ngunjukin kalo Betawi entu juga' tau jadi puset tuker-tukeran liwat pemakéan beragem rempah.[41][42]

Cara ngeja

[permak | permak sumber]

Ngeja bir pletok kudu ngrikutin barang berapa tahap, mulain deri nyiapin bahan pembikinnya, nggodognya, ampe napisnya.[29] Bakal nyiapinnya, tu bahan bikin nyang udah dapet dipili-pili dulu. Nyang kena dipili kalo rempah seger entu misti nyang kaga' busuk kaga' kipar; kalo rempah kering misti nyang kaga' encag kaga' bulukan.[43][44] Ruas jahé juga' bisa dibakar dulu sebelonnya dipaké.[45] Kapan tu bahan bikin udah pada siap semua, tu rempah pada dibersi'in, nyang seger ama nyang kering. Wabilkusus tu jahé, ada tukang nyang bersi'innya cuman dicuci kaga' dikelèt, biar dia punya rasa ama wangi nguarnya lebi kuat pas digodog. Bakal dapetin asil penguaran nyang baè' punya pas digodog, tu bahan nyang derak bisa dicacag, diparud, atawa ditotog-totogin.[43] Jahé ama seré bisa digobèt bisa dicèpèrin, kalo rempah kering kaya' pala cukup diiris-iris aja.[46] Mingkin kecit gobètan atawa irisannya, mingkin mantep juga' enti' godogannya.[43]

Langkah-langkah sewayah penggodogan beragem-ragem ngrikut si tukang bikin. Ada nyang sekali gus nyemplungin tu bahan rempah pada ke dalem aèr bakal digodog 15 menitan, terus ditapis. Ni asil tapisan pertama dikasi'in daon pandan ama pemanis bakal digodog atu kali lagi ampé mberekbek, baru ditapis lagi.[45] Penggodogan dua tahap juga' dilakonin bakal ngeja bikinan turunan bir pletok kaya' setrup ama bubuk tinggal seduh. Cumannya, tahap godogan kedua dilakonin ampé tu aèr godogan ngentel atawa madet jadi kristal.[47] Laèn resèp laèn lagi caranya; ada nyang godognya sekali doang, mulain dengen nyampurin gula ampé neneb ama aèr jahé, baru ditambahin secang, rempah-rempah, ama seré bakal diangetin di api kecit ampé barang 1 jem.[48] Ada juga' nyang cuman masupin secang sewayah 5 menit di ujung, abis semua-mua bahan udah tiris, biar dia punya warna mèra bisa keserep abis ama tu aèr godogan.[43]

Napis aèr godogan nyang dilakonin belakangan entu tahapan penting bakal mbuangin jat-jat kecit kaga' neneb nyang ngeja tu minuman jadi butek. Macem saringan nyang biasanya kepaké entu bangsa kaèn saringan deri nilon bakal nyablon.[43] Abisnya ditapis, tu bir pletok bisa ditanjain langsung atawa disalin ke botol-botol kaca nyang dimèrèkin.[5][45] Pengolaan terusan juga' bisa dilakonin bakal ngeja bikinan turunan deri ni minuman. Selaén deri setrup ama bubuk seduh nyang udah disebutin, bir pletok juga' bisa jadi kentelan, aèr belanda, ampé gula-gula.[25][45][49] Bir pletok punya bahan pembikin juga' bisa dibuntelin keringnya bakal digodog sorangan.[22]

Nanjain

[permak | permak sumber]
Bir pletok ditanjain dingin-dingin ama batu ès

Sanonya, ni bir pletok seringan ditanjain bakal ngangetin awak malem-malem, wabilkusus pas usum ujan-ujan.[50] Ni minuman punya rasa banyakan deri jahénya nyang nyegerin, pas banget bakal ditanjain anget-anget.[29] Cumannya, lantaran batu ès mulain jideg dipaké di Jakarta semprakan tenga-tenga abad ke-20, ni minuman juga' kerep ditanjain dingin-dingin bakal nyegerin awak sewayah gerah.[5][51] Sebelonnya ditanjain, ni bir pletok bisa dikocok-kocok biar dia merusmus. Ngocoknya bisa dilakonin maké bungbung bangbu[8][9] bisa juga' belèk besi.[10]

Ditukil deri JJ Rizal, dia ada bilang kalo ni bir pletok sanonya seringan ditanjain wayah orang Betawi punya hajatan gedé-gedé, ga' kaya' sahi atawa gahwa nyang ditegokin saban pagi atawa soré ari.[52] Mao di keriaan nyunatin, mao ngawinin, atawa hata juga' di hajatan ngelayat, ni bir pletok ada ditanjain.[42] Deri seantéro ni tiga, nyang kudu banget misti nanjain bir pletok entu kawinan, bahna ni hajatan punya gengsi paling tinggi-tingginya. Mingkinan ngelubèr tu bir pletok, mingkin dianggep mantep tu orang Betawi punya hajatan kawinan, kaga' bèdanya kaya' aèr anggur di orang Kulon punya keriaan.[52] Di Betawi punya adat kawinan, ni bir pletok juga' dianjurin bakal diminum tu pengantèn dua,[53] wabilkusus bakal si tuan puteri abis dia tangasan atawa kum, serangkéan ama rawatan rias-riasan sebelon hajatan besarnya.[54][55]

Selaènnya di keriaan-keriaan adat, ni bir pletok juga' lajim ditanjain di tempat-tempat plesiran, kaya' misal di utekan Sètu Babakan, Jagakarsa, Jakarta Kidul.[56] Di Indonésia punya industri ramah-tamah, ni bir pletok juga' ada ditanjain jadi minuman penyambut di barang berapa hotèl atawa pesanggrahan, biasanya nyang demen ngasi unjuk pusaka budaya bakal dia punya laèn deri nyang laèn.[57]

Ketokcèran

[permak | permak sumber]

Ni bir pletok entu tokcèr bakal nurunin rèsiko penyakit kaga' nepa (kaya' kangker), lantaran dia punya godogan rempah nguarin jat-jat pènol antioksidan nyang bisa nggibang radikal bèbas pengrusak awak.[58] Ditukil deri atu kajian pasal ni bir pletok punya bahan rempah nyang dilakonin Wibawa ènh. (2019), kadar kabèhan pènol paling tingginya ketemu deri asil penguaran cengké, baru nyang deri kayu manis ama pala.[59] Sedengken, Ishartani, Kawiji & Khasanah (2012) nemuin kalo nambahin rempah macem kepolaga bisa naèkin tu bir pletok punya kadar pènol. Pemakéan ragem gula nyang laèn-laèn juga' nyawabin tu minuman punya kadar pènol. Dengen trap kadar rempah nyang medu, bir pletok nyang maké gula jawa ngelah kadar pènol rada gedéan ketimbang nyang maké gula pasir. Belon lagi, pemakéan gula jawa nyang dibarengin secang bisa ngeja efek sinergisme deri jat-jat antioksidan di entu bahan dua, ampé-ampé mingkin pating kecekuk dah tu radikal bèbas.[60] Permanasari, Sari & Aslam (2021) juga' nemuin kalo nambahin larutan gula pasir kentelan 4% bisa ngeja dia nampung antioksidan paling tinggi ketimbang bir pletok nyang kaga' ada gulanya atawa nyang gulanya lebi kentelan.[61]

Mutu, asal, serènta lama wayah penggodogan rempah bisa nyawabin sipat antioksidan deri bir pletok.[62] Bir pletok nyang caèr ngelah kadar pènol rada tinggian ketimbang bir pletok nyang udah bubuk tinggal seduh, bahna cara ngangetin nyang kelamaan bisa ngeja dia punya senyawa pada rusak.[60] Ngrikut Wibawa ènh. (2019) punya pemikir, lama penguaran paling mantep bakal dapetin tokcèrnya bir pletok punya rempah entu lebi kurang 30 menitan, asal maké bahan rempah nyang seger, nyang kaga' kena oksidasi.[62]

Ruju'an

[permak | permak sumber]

Tukilan

[permak | permak sumber]
  1. ↑ a b "Bir pletok". Warisan Budaya Takbenda. 2014-01-01. Dipungut 2024-06-26.
  2. ↑ a b c Giyatmi (2018), hlm. 275–276.
  3. ↑ Damwijk, R. H. (2019-07-01). "Bir klotok of bir pletok?" [Bir klotok atawa bir pletok?]. Moesson (dalem basa Belanda). h. 7. Diarsipin deri nyang asli tanggal 2024-12-10. Dipungut 2024-12-10.
  4. ↑ a b Reijst & Pereira (2022), hlm. 86.
  5. ↑ a b c Teviningrum ènh. (2016), hlm. 57.
  6. ↑ Attas (2021), hlm. 589–590.
  7. ↑ a b Rezkisari, Indira (2017-07-11). "Berbagai versi sejarah lahirnya bir pletok". Republika Online. Diarsipin deri nyang asli tanggal 2024-06-27. Dipungut 2024-06-27.
  8. ↑ a b c d Attas (2021), hlm. 589.
  9. ↑ a b c d Yuniar, Nanien (2020-06-23). "Apa arti "pletok" dalam bir pletok?". Antara News. Diarsipin deri nyang asli tanggal 2024-06-27. Dipungut 2024-06-27.
  10. ↑ a b Habsari (2007), hlm. 47.
  11. ↑ Silalahi, Wahyuningtyas & Kalima (2023), hlm. 335.
  12. ↑ Pangastuti ènh. (2021), hlm. 20.
  13. ↑ Pangastuti ènh. (2021), hlm. 21.
  14. ↑ Ramadani, Adysha Citra; Rostanti, Qommarria (2024-05-21). "Meski pakai kata 'bir', bir pletok bisa disertifikasi halal, ini beberapa produknya". Republika Online. Diarsipin deri nyang asli tanggal 2024-06-27. Dipungut 2024-07-01.
  15. ↑ a b c Afrisia, Rizky Sekar (2015-06-22). "Sejarah bir pletok Betawi, tiruan anggur Barat tanpa alkohol". CNN Indonesia. Diarsipin deri nyang asli tanggal 2024-06-27. Dipungut 2024-06-27.
  16. ↑ Attas (2021), hlm. 590.
  17. ↑ Sultani, Anastasia & Yuliswara (2020), hlm. 144–146.
  18. ↑ Attas (2021), hlm. 591.
  19. ↑ Gardjito, Putri & Dewi (2017), hlm. 113–114.
  20. ↑ Sultani, Anastasia & Yuliswara (2020), hlm. 151–154.
  21. ↑ Wiguna, Dewa Ketut Sudiarta (2022-06-25). "Para perawat ikon Betawi". Antara News. Diarsipin deri nyang asli tanggal 2024-06-27. Dipungut 2024-06-27.
  22. ↑ a b c d Pirlo, Reza Antares (2020-03-16). "Disebut anti corona, bir pletok Tangsel tembus luar negeri". Tagar.id. Diarsipin deri nyang asli tanggal 2024-07-03. Dipungut 2024-07-03.
  23. ↑ Aisyah, Yuharrani (2023-01-01). "10 Resep paling viral di Indonesia pada 2022, kamu pernah bikin?". Kompas.com. Diarsipin deri nyang asli tanggal 2023-08-07. Dipungut 2024-09-13.
  24. ↑ Ishartani, Kawiji & Khasanah (2012), hlm. 35.
  25. ↑ a b Kholishoh ènh. (2019), hlm. 160.
  26. ↑ a b Muliani (2017), hlm. 228.
  27. ↑ Sudarsono, Ratih P. (2019-02-15). "Sihir rasa dari Suryakancana". Kompas.id. Diarsipin deri nyang asli tanggal 2024-06-27. Dipungut 2024-06-27.
  28. ↑ a b c Dewantara & Levyta (2022), hlm. 75.
  29. ↑ a b c Putra ènh. (2023), hlm. 84.
  30. ↑ Kholishoh ènh. (2019), hlm. 159.
  31. ↑ Chaer (2015), hlm. 119.
  32. ↑ a b Sultani, Anastasia & Yuliswara (2020), hlm. 148.
  33. ↑ a b Ishartani, Kawiji & Khasanah (2012), hlm. 32.
  34. ↑ Muliani (2017), hlm. 231, 233.
  35. ↑ Putra ènh. (2023), hlm. 85.
  36. ↑ Sukaesih, Nurislaminingsih & Winoto (2022), hlm. 373–374.
  37. ↑ Muliani (2017), hlm. 227.
  38. ↑ Hisyam (2023), hlm. 129.
  39. ↑ Sultani, Anastasia & Yuliswara (2020), hlm. 147, 157.
  40. ↑ Sultani, Anastasia & Yuliswara (2020), hlm. 147–148, 152–153.
  41. ↑ a b Birra, Fadhil Al (2017-07-08). "Ketika sejarawan bicara soal kerak telor dan bir pletok, orisinal!". Jawa Pos. Diarsipin deri nyang asli tanggal 2024-06-29. Dipungut 2024-06-29.
  42. ↑ a b Adiakurnia, Muhammad Irzal (2017-07-09). "Bir pletok, simbol kemegahan perayaan orang Betawi". Kompas.com. Diarsipin deri nyang asli tanggal 2023-05-28. Dipungut 2024-06-28.
  43. ↑ a b c d e Muliani (2017), hlm. 229.
  44. ↑ Silalahi, Wahyuningtyas & Kalima (2023), hlm. 337.
  45. ↑ a b c d Giyatmi (2018), hlm. 276.
  46. ↑ Silalahi, Wahyuningtyas & Kalima (2023), hlm. 338.
  47. ↑ Ishartani, Kawiji & Khasanah (2012), hlm. 34.
  48. ↑ Sultani, Anastasia & Yuliswara (2020), hlm. 146.
  49. ↑ Muliani (2017), hlm. 217, 222.
  50. ↑ Muliani (2017), hlm. 224.
  51. ↑ Sultani, Anastasia & Yuliswara (2020), hlm. 150–151.
  52. ↑ a b Attas (2021), hlm. 593.
  53. ↑ Hisyam (2023), hlm. 128.
  54. ↑ Hisyam (2023), hlm. 112.
  55. ↑ Putri, Citra Narada (2021-08-15). "Dilakukan oleh calon pengantin perempuan, ini perawatan kecantikan tradisional khas Betawi". Kompas.com. Diarsipin deri nyang asli tanggal 2021-08-27. Dipungut 2024-06-29.
  56. ↑ Sultani, Anastasia & Yuliswara (2020), hlm. 151.
  57. ↑ Muliani (2017), hlm. 221.
  58. ↑ Permanasari, Sari & Aslam (2021), hlm. 9–10.
  59. ↑ Wibawa ènh. (2019), hlm. 202–203.
  60. ↑ a b Ishartani, Kawiji & Khasanah (2012), hlm. 35–36.
  61. ↑ Permanasari, Sari & Aslam (2021), hlm. 12–13.
  62. ↑ a b Wibawa ènh. (2019), hlm. 205.

Daptar paranan

[permak | permak sumber]

Didapetin deri https://bew.wikipedia.org/w/index.php?title=Bir_pletok&oldid=27786