Palang pintu

Palang pintu entu atu adat has anak Betawi nyang biasanya dilakonin saben ada kawinan. Enni terdisi palang pintu dilakonin kapan pihak pengantèn lanang nyang digero' "tuan raja muda" kepèngèn masup ruma si pengantèn wadon atawa si "tuan putri", tu pihak tuan putri bakalan ngadangin ni rombongan.
Nyang nimbrung ngeraméin enni acara kebagi jadi dua, atu di pihak pengantèn lanang, atunya lagi di pihak pengantèn wadon. Biasanya ni, si laki jalan diiringin ama bebunyian rebana ke ruma entu pengantèn wadon. Iringan rebana ketimpring juga diikutin barisan sejumlah kerabat nyang ngebawa seserahan, mulain deri ruti buaya nyang ngelambangin kesetiaan, sayur-mayur, uang, jajanan has Betawi, pakéan, juga' kelengkepan pangkèng pengantèn nyang berat kaya' ambèn ama lemari juga' pada dibawa diarak-arakin. Kapan tu pengantèn lanang dah nyampé di pekarangan ruma si wadon, entu acara palang pintu bisa dimulain.
Pihak pengantèn lanang mulain dengen ngucapin salam, abis entu mulain dah jagoannya masing-masing pihak ngunjukin kebisaannya, dimulain dari pantunnya terus dilanjutin ama silatnya, buntutannya sikénya. Tèmpo dulu èmang uda jadi ciri tiap kampung punya jagoan silatnya masing-masing, dan seni enni nyang mau dilestriin ame adat palang pintu. Nah, jagoan dari kedua belah pihak ceritanya begebrak ngejabanin atu ama nyang laèn. Biasanya dari pihak perempuan masang dua jagoan biar pertarungannya keliatan lebi seru, tapi biar kata jagoan dari pihak lelaki cuman satu dia bakalan dijaga jangan sampé kalah. Pan tu kawinan cuman bisa dilanjutin kalo entu pihak laki ngalahin jagoan dari pihak bininya. Jadi ibarat kata, si laki bisa "ngebuka" atawa ngablagin entu wadon punya palang pintu ruma.
Seabisnya beradu, nyang kudu dimenangin jagoannya pihak pengantèn lanang, dibacain dah lagu siké dengen alunan nyang merdu kaya' pembacaan selawat atawa orang ngaji. Buntutannya, baru dah tu si pengantèn lanang diijinin masup ke ruma pengantèn wadon bakal ngelajengin acara.
Pranala luar
[permak | permak sumber]- Buka Palang Pintu, Kesenian Betawi Tempo Doeloe
- Palang Pintu.. (Perkawinan Adat Betawie), Betawi Tulen