Loncat ke isi

Karabag Gunung

Deri Wikipedia
Kiblik Arsah
Արցախի Հանրապետություն (Lemènder)
Artsakhi Hanrapetutyun
Нагорно-Карабахская Республика
Nagorno-Karabakhskaya Respublika
Ibu negeri Stèpanakèt
Nama pengendek Arsah
Karabag Gunung


Karabag Gunung (hurup Arab Gundul: قره باغ ݢونوڠ; basa Rus: Нагорный Карабах Nagornyy Karabakh) atawa Arsah (hurup Arab Gundul: ارسخ; basa Lemènder: Արցախ Artsakh; basa Rus: Арцах Artsakh) atawa resminya Kiblik Arsah (hurup Arab Gundul: ارسخ; basa Lemènder: Արցախի Հանրապետություն Artsakhi Hanrapetutyun; basa Rus: Нагорно-Карабахская Республика Nagorno-Karabakhskaya Respublika) entu atu negara di bilangan Karabag Gunung, di Kaukasus Kidul. Kenyataannya, ni negara merdèka èn gableg bekuku' di dia punya tana sendèwèk. Walakin, laèn-laèn negara kaga' ngakuin ni negara, pada bilangnya ni – bagèan deri Asèrbaijan. Adapun ni negara punya hopstad[1] nama Stèpanakèt atawa Hankèndi.

Orang Lemènder deri sejeg bujeg, deri jaman kuda nggigit besi, udah ngejogrog di mari. Abad ke-11 M, serbuan Saljuk nyapu ampé ke Wètan Tenga, masup juga' wilayah Kaukasus Kidul. Suku-suku Saljuk Ogus Turki nyang kelayaban, masup juga' di dalemnya orang Asèrbaijan, baru nyaba di mari pas ni serbuan.

Lemènder ama Asèrbaijan udah begucel di ni daèrah semprakan tahon 1918. Entakan penyokolan Uni Sowièt di mari, dalem tahon 1923, tu guwernemèn ngeja nyang namanya Gutekan Kuasa-dèwèk Karabag Gunung (atu oblast otonom) di jeronya RSS Asèrbaijan. Di tahon-tahon pengabisan Uni Sowièt, Lemènder ama Asèrbaijan mulain rebutan lagi dah tu ni daèrah. Bahna ni rebutan, alhasil kejadian dah tu Perang Karabag Gunung semprakan tahon 1993 ampé 1994.

Per 10 Désèmber 1991, atu réperèndum (nanggok suara) dilakonin di dalem itu Gutekan Karabag Gunung èn di wilayah jirannya Sahumian. Itu penanggokan suara nanyain atu pertanyaan ama nyang nagasi suara (voter): "Apa ni daèrah misti ènggal deri Asèrbaijan?". Orang Asèrbaijan pada ngebèkot itu penanggokan suara: pada sambat mutusin kaga' ngasi suara. Mangka ini sebab, pengumuman kemerdèkaan deri Asèrbaijan sebagé Kiblik Karabag Gunung dilakonin. Ni negara kaga' diakuin ama mana-mana negara anggota PBB, serènta Lemènder. Wakil deri guwernemèn Lemènder ama Asèrbaijan semprakan entu tèmpo ngadain kongko damé nyang ditengahin ama Paguyuban Keamanan èn Samenwèrek Èropa Kelompok Min.

Ruju'an[permak | permak sumber]

  1. Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).