Kerajaan Rempug

Kerajaan Rempug Britani Gedé èn Negeri Ir Lor United Kingdom of Great Britain and Northern Ireland (Inggris)
Ibu negeri	Londen
Nama pengendek	Brit

Kerajaan Rempug Britani Gedé èn Negeri Ir Lor (hurup Arab Gundul: کرجأن رمفوݢ بريطانى ݢدي ان نݢرى اير لور‎ ; Inggris: United Kingdom of Great Britain and Northern Ireland) atawa biasa dipongès jadi Kerajaan Rempug (hurup Arab Gundul: کرجأن رمفوݢ‎ ; Inggris: United Kingdom, potong lèter: UK) atawa Kerajaan Menunggal (hurup Arab Gundul: کرجأن منوڠݢل‎ ) atawa juga’ bekènnya Britani Gedé (hurup Arab Gundul: بريطانى ݢدى‎ ; Inggris: Great Britain) atawa Inggris Gedé (hurup Arab Gundul: اڠݢريس ݢدي‎ ) entu negara daulat nyang pernahnya adanya di panté ngablak di belah kulon-lornya benua Èropa. Ni negara, koan, anu bolé nggabregin “negara-negara”, mangkanya dikata ‘rempug’. Ni negara kebikin dari pulo-pulo nyang ada di gutekan situ, kaya’: Pulo Britani Gedé ama Pulo Irlan belah lor-wètan, ama laèn-laèn pulo kecit di gutekan situ. Cumannya, orang, mah, banyak kadung lumpar cuman nggero’nya Inggris doang. Ni negara ibu negerinya ada di Londen.

Seila-ilanya, negara gedé ada empat biji nyang digabreg jadi Kerajaan Rempug, nya’entu:

• Inggris (ibu negerinya di Londen)
• Irlan Lor (ibu negerinya di Bèlpas)
• Sekotlan (ibu negerinya di Èdinbereh)
• Walès (ibu negerinya di Kardip)

Kalo orang Britani Gedé, dibilangnya orang Brit atawa orang Berit (hurup Arab Gundul: اورڠ بريط‎ ) atawa—tumannya orang kita, mah—semua maèn dipalsabet jadi orang Inggris (hurup Arab Gundul: اورڠ اڠݢريس‎ ).