Kebudayaan Indonésia

Kebudayaan Indonésia (hurup Arab Gundul: کبودايأن اندونيسي; Indonésia: kebudayaan Indonesia) kebentuk deri papagan antara budaya asli setempat ama sawaban deri laèn-laèn bangsa sedari jaman bahola. Indonésia letaknya di tenga-tenga jalur dagang kolot antara Wètan Jau, Asia Kidul-wètan, èn Wètan Tenga, nyang nyebabin banyaknya plaktèk-plaktèk budaya nyang kesawaban ama banyak agama, kaya' Buda, Serani, Konghucu, Hindu, èn Selam, nyang kabèhannya pada stèrek di kota-kota bandar gedé. Hasilnya entu kacukan baru budaya, nyang sering laèn deri orang asli setempat punya budaya.

Misalnya, penggabregan antara Islam ama Hindu nyang jadi kepercayaan Abangan, ibingan Bali nyang ada punya ceritra kerajaan Buda ama Hindu, seni Selam èn setil bangunan nyang ada di Sumatra, wabilkusus di tana Minangkabo ama Acéh, seni terdisionil, musik, èn gerak badan nyang digabreg dalem atu maèn penca, nama pencak silat.

Adapun alam Kulon nyawabin Indonésia dalem hal èlmu pengetahuian, tèhnolohi, èn hiburan modèren, kaya' acara tipi, pèlem, musik, serènta sistim èn mas'alah pulitik. Hindi gableg juga' embanan di Indonésia dalem hal lagu ama pèlem. Atu jenis tembang nyang nada-nadanya kaya' Hindi, ya'entu dangdut, nyang sering mengrupaken campuran musik Arab ama Melayu.

Bagèn kata ada ngebadeg embanan asing, ada juga' daèrah Indonésia nyang di peloksok-peloksokan nyang masing ngejaga dia punya budaya setempat. Ètnis-ètnis setempat, kaya' Batak, Nias, Mentawé, Asmat, Dani, Sumba, Dayak, Toraja, èn masing ngejeprah laènnya masing ngamalin dia punya rituil, adat, èn maké baju terdisionil.

Tonil terdisionil

Gending

Indonésia entu ruma aselinya gambelan dengen gambelan pèrsi pulo Jawa, Sumatra, ama Bali nyang paling sering kecatet. Gending terdisionil Jawa Kulon, Jawa Tenga, ama Jawa Wètan, serènta Bali, ièlah gambelan (nglingkup: gambang, bonang, saron, kenong, go'ong, èn ngebadeg lagi dah nyang laènnya). Gambelan uda diakuin jadi Gawéan Ajib Budèl Budaya Lisan èn Bukanbenda Gambelan ama UNESCO (Paguyuban didikan, Ilmiah, èn Kebudayaan Peserèkatan Bangsa-Bangsa).

Ari bulan 29 Juni 1965, Koes Plus, atu paguyuban gending pop Indonésia nyang kesohor di tahon 1960-an, 1970-an, èn 1980-an, dibui di Glodok, Jakarta Wètan, lantaran maènin gending has Kulon. Abis lèngsèrnya itu Persidèn Sukarna, itu hukum dicabut, èn tahon 1970-an, to Penjara Glodok dibubarin ama dijadiin pasar mol gedé.

Kroncong ièlah jandrah gending nyang maké gitar ama kentrung bakal jadi dia punya alat gending nyang utama. Ni jandrah ada asal-muasalnya deri Portugal èn dikenalin ama sudagar Portugis selamanya abad ke-15. Ada atu paguyuban Kroncong Tugu di Jakarta Lor èn laèn-laèn paguyuban gending kroncong di Maluku, nyang gableg sawaban stèrek deri Portugis. Ni jandrah tau bekèn di ponggahan pertama abad ke-20. Adapun kroncong punya bentuk wayah gini namanya pop kroncong.

Angklung ièlah atu orkès gending nyang asalnya deri Jawa Kulon. Ni orkès dapet antérobangsa punya pengakuan bahna UNESCO udah nyatutin dah itu alat gending bambu jadi budèl budaya bukanbenda.

Gending Sasando alus deri Propinsi Nusa Tenggara Wètan di Timor Kulon bener-bener laèn dah. Sasando maké alat nyang dikeja deri kobètan daon lontar (Borassus flabellifer), nyang bentukah mèmper ama arpa.