Tepok bulu

Dua pasang Tiongkok punya pemaèn tepok bulu diadu bakal ngerebutin mendali emas rangkep campur Olimpiade 2012

Tepok bulu atawa maèn rakèt atawa maèn tepok (Inggris: badminton) entu gerak badan nyang dilakonin dua pihak maké rakèt bakal tepok-tepokan bulu ngeliwatin dia punya jala. Biar kata tepok bulu bisa aja dijabanin keroyokan, ni gerak badan punya permaènan biasanya ngaduin pihak-pihak "sorangan" (atu lawan atu) atawa "rangkepan" (dua lawan dua). Ni gerak badan sokanan dibikin maènan iseng-iseng di pelataran atawa di panté, tapi dia punya tempat ngadu resmi entu biasanya di pèlan dalem gedong. Tepok bulu punya ponten bolé dapet deri nepokin entu bulu ke pihak lawan punya paroan. Ni pihak pada cuman bolé nepok entu bulu sekali doang ampé dia nyeberang tu jala. Entu tepok-tepokan manteg kapan si bulu tepok kena tanah, atawa saban si liperi utama ama pelojok bilang ada penglènggoran.

Bulu tepok nyang dipaké entu semacem pèlor deri bahan bulu atawa plastik. Ni bulu tepok banter banget pating keliweran, kaga' kaya' maènan bola di laèn-laèn macem gerak badan. Ni permaènan awal mulanya dikeja èn dikembangin di Hindia Inggris. Di antéro Èropa, cuman orang Dèn punya negeri nyang kesohor pekara tepok bulu; banyakan nyang jabanin ni gerak badan entu negeri-negeri Asia, macem Tiongkok atawa Indonésia. Wayah taon 1992, bulu tepok nongol bakal kali pertamanya jadi cawang Olimpiade di Barsélona.