Sétan penglaris

Sétan penglaris (hurup Arab Gundul: شيطان فڠلاريس) atawa Jin penglaris (hurup Arab Gundul: جين فڠلاريس) ya'entu atu sétannya nyang katanya bakalan bikin tukang dagang jadi laris dagangannya. Enni tahayul bekèt bangat di Indonésia, soalnya katanya enni sétan bakalan ngeludahin makanannya sebelon dikasiin ke tukang beli biar kasi sedep makanannya. Nah, nanti makanannya bakal kerasa sedep pisan pas dimakan ama tukang belinya biar tukang belinya dateng terus bakal beli makanannya. Cumanan kalo entu makanan dibawa pulang biasanya rasanya bakalan ga' sedep lantaran sirepnya kaga' mempan kalo kaga makan di tempat.

Banyak tukang dagang nyang paké enni sétan bakal larisin dagangannya. Deri mulain tukang dagang nyang paké gerobak ampé nyang ada punya rèstoran gè' ada baé.

Ciri has tempat nyang maké sétan penglaris

1. Ada tempat duduk, ruang, atawa toalèt nyang haram dipasupin ama sapa-sapa.
2. Langseng ama gidir kaga' nampaknya.
3. Ada jejimatan nyang dipaké di alat masak.
4. Makanan bakal kaga' sedep kalo dibawa pulang.
5. Kalo baca bismillah atawa doa dulu, makanannya bakalan béda rasa.
6. Tempat cuci piringnya jauh, soalnya katanya entu tempat sétan penglarisnya ngeludah atawa jilat-jilat piringnya.

Cara tangkis sirep sétan penglaris

Ada berapa cara bakal nangkis sirep nyang dikasiin ama sétan penglaris, ya'entu:

1. Makan jangan lupa baca bismillah atawa doa dulu.
2. Coba makan paké tèsi', soalnya kalo di warung nyang paké penglaris kaga' ketemu alat makan.
3. Coba makanannya dibawa pulang, kalo rasanya kaga' sedepnya, bisa jadi entu warung maké penglaris.