Sétan kumpeni terebang

Tampang kapal sétan kumpeni terebang

Sétan kumpeni terebang (hurup Arab Gundul: شيطان کومفنى ترباڠ; basa Walanda: De Vliegende Hollander; basa Inggris: Flying Dutchman) atawa sétan kapal Walanda (hurup Arab Gundul: شيطان کافل والندا) entu sétan nyang asalnya lantaran ada kapal Walanda nyang kaga' pernah bisa nepi èn kudu ngiterin "tujuh laotan" selama-lamanya. Sétan kumpeni terebang seringnya keliatan deri jauh, nyang kadang-kadang keliatan ada cahaya-cahaya nyang remang-remang.

Asal-muasal

Menjuntrung tahayul deri masarakat, Sétan kumpeni terebang entu asalnya deri kapal sétan nyang kaga bisa nepi èn kudu ngiterin "tujuh laotan" selama-lamanya. Enni sétan kumpeni terebang keliatan deri jauh nyang kadang-kadang keliatan cahaya remang-remangnya. Ada banyak pèrsi deri enni kisah. Kalo menjuntrung deri berapa sumber, enni tahayul dateng deri negeri Walanda, selaènnya entu ada juga orang laèn nyang ngaku kalo enni tahayul dateng deri ceritanya orang Inggris ya'entu "The Flying Dutchman" (1826) deri Edward Fitzball èn roman "The Phantom Ship" (1837) deri Frederick Marryat, terus diambil ke kisah Walanda "Het Vliegend Schip" deri pastor Walanda A.H.C. Römer. Pèrsi laènnya entu opera deri Richard Wagner (1841) èn "The Flying Dutchman on Tappan Sea" deri Washington Irving (1855).

Nahkoda Bernard Fokke

Berapa sumber absah nyebutin kalo di abad ke-17 ada sorang nahkoda Walanda nyang namnya Bernard Fokke (pèrsi laènnya nyebutin nahkoda "Ramhout Van Dam" atawa "Van der Decken") nyang ngiterin laotan deri negeri Walanda ke pulo Jawa dengen kecepetan nyang luar biasa. Dia orang dibilang kalo minta bantuan deri iblis biar bisa ngelaot cepet. Cumanan di tengah-tengah laot ke arah Tanjung Pengarepan tiba-tiba cuacanya kaga' bagus. Enni ngeja kapal olèng. Terusannya, sorang matrus kapal minta biar pelayaran ke arah Tanjung Pengarepan disetop dulu. Nah, entu nahkoda kaga' mau setop malah mangkat baé' malahan bilang "Gua ada punya sumpah kalo kaga' bakalan mundur èn bakal terus ngliwatin enni ujan deres biar sampé gua punya tujuan atawa gua ama semua gua punya matrus kapal bakal dikutuk selama-lamanya." Lantaran ujan nyang deres banget, entu kapal kaga' bisa belayar terus. Jadi, nahkoda èn semua matrus kapalnya jadi mayat idup nyang belayar ngiterin tujuh laotan terus selama-lamanya. Katanya, entu kapal dikutuk bakal ngiterin tujuh laotan ampé ari akhir.

Penyakit ganas

Sumber lain juga ada nyang nyebutin kalo di dalem kapal ada penyakit ganas nyang dialamin ama matrus kapalnya, jadi dia pada kaga dibolèin bakal nepi di pelabuan di mana-mana tempat. Sederi entu wayah, kapal èn anak buahnya dihukum bakal terus belayar èn kaga' bolè nepi. Menjuntrung berapa pèrsi, enni kejadiannya taon 1641, nyang laèn ada juga nyang nebaknya taon 1680 atawa 1729. Terneuzen (Walanda) digadang-gadang jadi rumah deri tahayul sétan kumpeni terebang, Van der Decken, sorang nahkoda nyang mengutuk Sang Maha Kuasa èn udah dihukum bakal ngiterin laotan selama-lamanya, udah diceritain dalem roman karangan Frederick Marryat – "The Phantom Ship" èn Richard Wagner opera. Ada banyak saksi nyang ngaku kalo ngeliat enni kapal sétan. Taon 1939, enni kapal keliatan di Mulkzenberg. Taon 1941, ada orang di panté Glencairn ngeliat kapal nyang belayar èn tiba-tiba ngilang pas mau nubruk karang. Penampakan sétan kumpeni terebang keliatan lagi ama matrus kapal tentara M.H.S. Jubilee di deket Kapstad di bulan Agustus 1942. Lebih-lebih lagi ada juga alkisah soal pelayaran Kristopèl Kolombes ngilat kapal nyang ayut-ayutan dengen layar nyang kebuka. Abis entu, matrus kapal nyang pertama kali ngiat langsung mati.

Tahayul sétan kumpeni terebang

Enni tahayul juga ngasih tau kalo ada atu kapal mutakhir ngiat enni kapal sétan èn anak buah kapal entu mutakhir ngasih sinyal, nantinya entu kapal mutakhir bakal tenggelem atawa celaka. Bakal sorang pelaot, kalo kaga' sengaja ketemu enni kapal sétan kumpeni terebang bakal datengin mara bahaya bakal dia pada èn katanya ada atu cara biar kaga' ketemu ama entu kapal sétan, ya'entu masangin sepatu kuda di tiang layar kapal bakal perlindungan. Berabad-abad sudah, enni tahayul sétan kumpeni terebang jadi ilham bakal tukang ngeja roman. Sederi taon 1826, Edward Fitzball udah nyeratin roman "The Phantom Ship" (1837) nyang diambil deri pengalam orang-orang ketemu enni kapal sétan. Banyak juga pujangga bekèn kaya' Washington Irving èn Sir Walter Scott juga ketarik bakal ngangkat enni tahayul.

Pemakéan setilah

• Pemaén bola deri negeri Walanda, Robin Van Persie dinamain The Flying Dutchman abis dia nggolin bakal Walanda pas Piala Dunia 2014 dalem tahapan regu nglawan negeri Spanyol.
• Ironisnya, bintang peteran negeri Walanda, Dennis Bergkamp dikenalin sebagé orang nyang takut bakal terebang, jadinya dinamain The Non-Flying Dutchman.
• Maskepé terebang Walanda, KLM juga namain saban di belakang entu kapal terebangnya "The Flying Dutchman".
• Tokoh sétan kumpeni terebang nyang ada di pèlem cèmèn Sepombob.
• Tokoh Flying Dutchman juga muncul beberapa kali dalam serial SpongeBob SquarePants.