Ruang Barjah

Tampang Ruang Barjah

Ruang Barjah (urup Arab Gundul: رواڠ برزخ) atawa Kamar Barjah (urup Arab Gundul: کمر برزخ; basa Inggris: Liminal Space) kalo menjuntrung basa Inggris asal katanya deri kata limen (basa Latin) nyang artinya "barjah" deri waktu èn ruang, lajimnya kejadian pas lagi peralian orang. Jadi, enni waktu barjah sipatnya kaga' pasti. Ruang Barjah diartiin sebagé Ruang nyang ada di "watesan", di antara mimbar depan/belakang èn Ruang nyang lebih kuat. Enni Ruang Barjah kaga' jadi bagéan deri entu dua tempat. Ruang Barjah dibagi jadi dua, lahiriah èn batiniah.

Ruang Barjah Lahiriah

Lajimnya, Ruang Barjah Lahiriah entu tempat nyang menjuntrung dua tempat, Ruang tunggu, pojokan Ruang, tempat nyang kosong, atawa bisa juga gedong tua kapiran. Kekawatiran entu buntutannya nyang bakalan dirasanin ama dia pada nyang ngabisin waktu di enni Ruang Barjah. Tulad deri Ruang Barjah Lahiriah entu:

1. Lapangan terbang
2. Stapsiun
3. Lorong rumah sakit
4. Kantor pas malem-malem
5. Kelas nyang sepi
6. Rumah kosong

Ruang Barjah Batiniah

Lajimnya, manusia sering banget ngalamin perubahan dalem kehirupannya, kaya' perobahan nyang gedé dalem idup èn kekaga'puguhan. Enni ihwal dijuntrungin ke setilah barjah nyang artinya wates deri kewontenan nyang udah kejadian ama nyang bakal kejadian. Dalem pendelengan sikolohi, manusia sering ngalamin takut èn kawatir pas enni wayah, enni dilantarin ama Ruang Barjah. Tulad deri Ruang Barjah entu:

Akil Balèk

Enni kejadian pas bocah-bocah udah mulain masup jadi rada gedéan. Enni bakalan bikin perasaan kaga' nyaman èn bikin entu bocah jadi pada bingung, lantaran perobahan deri pas bocah nyang kaga' nyaho-nyaho ke pas abégé nyang udah mulain ada punya pikiran atawa udah idep. Ihwal nyang belonan kejadian nyang bakal dia pada alamin entu kaya' rasa idep, napsu sèksuil, èn tanggung jawab orang gedé. Di sisi laènnya, abégé juga ada perlu rasa aman èn kepuguhan bakal ngembangin dia pada punya diri. Jadi, enni ihwal bisa juga disebut sebagé Ruang Barjah.