Pondokgedé
Pondokgedé (hurup Arab Gundul: فندقڬدى) entu atu kecamatan di Bekasi Kota, Jawa Kulon, Indonésia. Awalnya, enni kecamatan Pondokgedé entu kecamatan nyang paling gedé se-Bekasi Kabupatèn sebelon masup daèrah Bekasi Kota. Cangkupannya dipecah jadi 4 kecamatan, ya'entu kecamatan Pondokgedé, Pondok Melati, Jatiasih, èn Jatisampurna.
Pondokgedé entu daèrah di watesan DKI Jakarta èn Jawa Kulon. Pondokgedé kalo diliat deri sejarahnya entu gabungan deri daèrag Pondok Melati, Jatiwaringin, Jatiasih, Jatimakmur, Jatibening, Jaticempaka, èn Jatisampurna.
Pondokgedé watesan ama kecamatan Makasar èn kecamatan Bekasi Kulon di belalor, kecamatan Cipayung di bekulon, kecamatan Bekasi Kidul di belawètan, èn kecamatan Pondok Melati èn Jatiasih di bekidul.
Sejarah[permak | permak sumber]
Pada taon 1775, Pondokgedé entu lahan onderneming. Di enni daèrah ada punya rumah nyang gede nyang jadi dimilikin ama tuan tanah nyang namanya Johannes Hoojiman. Lantaran luas banget, masarakat entu daèrah bilangnya jadi "Pondokgedé".
Sampè taon 1949, menjuntrung Besluit Bestuurorganisatie Batavia en Ommelanden (Beslit Bertir Betawi èn Pinggirannya) nyang masup dalem statblad taon 1949 no 64, Pondokgedé entu masup jadi rèsidènsi pinggiran deri Betawi nyang besintrem di Dèpok. Pondokgedé barengan ama Mampang Prapatan, Pasar Rebo, èn Pasar Minggu dikasihin status anak-pademangan atawa onder-distrik nyang ada di bawah pademangan Kramat Jati.