Pemba'alan

Pemba'alan (hurup Arab Gundul: فمبألن; ilmiah: anestesi, deri basa Yunani an- "tra, kaga', sonder" èn aesthētos "pengrasanan") umumnya entu artinya piil bakal ngilangin rasa sakit pas nglakonin pembelèkan èn macem-macem tata cara laènnya nyang ngasi rasa sakit atawa ngentek di awak. Istilah pemba'alan (anestesi) pertama-tama dipaké ama Oliver Wendel Holmes Sr. tahon 1846.

Cabang èlmu kedoktoran nyang ngebelajarin nanganin prosès pemba'alan dalem pembelèkan digero èlmu pemba'alan (anestesiologi).

Dua rungkun pemba'alan

Obat bakal ngilangin nyeri kebagi jadi dua rungkun, nya'entu analgetik èn anestesi. Analgetik entu obat bakal ngurangin nyeri sonder keilangan perangsaan kabèhan, mangka dalem kita punya basa bisa digero' sebagé obat ngurangin nyeri. Orang nyang minum analgetik tetep èling. Analgetik kaga' mulu ngilangin kabèhan nyerinya, cuman terus ngurangin ngenteknya.

Berapa jenis pemba'alan (anestesi) bisa ngeja orang ilang sadar, sedeng jenis nyang laènnya cuman ngilangin rasa ngentek deri bagèan awak ketentu èn pemakénya tetep èling.