Pamali
Pamali (hurup Arab gundul: فمالى) ya'entu larangan atawa pantangan atawa hal-hal nyang entong dilakonin ama orang-orang. Kalo maksa dilakonin atawa entu orang pala batu èn merugul, jadinya nanti bakalan kena bala atawa bisa dibilang pejajaran. Jadinya kudu diikuti pamali nyang ada di masarakat.
Conto pamali[permak | permak sumber]
- Bediri di depan pintu
- Gunting kuku malem-malem
- Tengkurep sambil kaki ditaèkin ke atas
- Duduk di atas bantal
- Naro tangan di pala belakang sambil tangan dikebelakangin
- Bocah masih ngayap pas sandékala (wayah dur)
- Gegenjrèngan malem-malem
- Duduk kaki digoyang-goyang
- Nyapu masih bala' (bakal wadon doang)
- Buang benda-benda tajem kaya pèso, gunting, atawa paku (bakal wadon bunting)
Kalo ngelanggar pamali[permak | permak sumber]
Orang kalo ngelanggar pamali bakal dapet hal-hal suwè'. Cuman, enni ngikut ama pamali apa nyang dilanggar ama entu orang. Kalo ada orang bediri di depan pintu katanya jodohnya bakal susah. Terusannya, kalo ada wadon nyang kalo nyapu latar kaga' pating bersih nanti bakal dapet lakian nyang bèwokan. Ada juga, kalo duduk di atas bantal katanya entu pantat bakal ada bisulnya. Kalo tengkurep kaki ditaèkin katanya bakal ditinggal mati ema'. Ada juga nyang bakal ditinggal mati bapa' kalo tangan ditaro di atas pala èn dikebelakangin.
Sebab-musabab pamali ada[permak | permak sumber]
Sebab-musabab pamali didasarin ama berapa hal, conto bediri di depan pintu entu sebabnya lantaran ngalangin jalan orang laèn. Terusannya, kalo gunting kuku malem-malem nanti bakal dikeja buntung entu tangan lantaran jaman baheula kaga' lèstriknya. Nyapu kurang bersih, bikin latar kaga' enak diliat lantaran kaya' kapal pecah. Gegenjrèngan malem-malem entong dilakonin lantaran ganggu orang laèn pada ngorok.