Kimètsu no Yaiba
Kimètsu no Yaiba (Jepang: 鬼滅の刃 (Kanji) atawa きめつのやいば (Hiragana), latènnya: Kimètsu no Yaiba, tarjimnya: Tukang Jagal Sétan) ya'entu nama atu komik èn gambar cèmèn Nipong nyang bekèn nyang diserat ama Koyoharu Gotougé (Jepang: 吾峠呼世晴 (Kanji)) sederi bulan Pèbruari 2016.
Ringkesan
[permak | permak sumber]Kimètsu no Yaiba punya cerita ntu ada di jaman bahela, jaman Japang di mula-mula taon 1900-an nyang nyeritain soalan sétan nyang demen bikin masala. Ni sétan demennya bikin mampus orang terus dijadiin gegarosan ama dia. Na, ni-ni sétan punya dedengkot nyang namanya Kibutsuji Muzan, engkong moyangnya semua sétan nyang ada di dunia, nyang saktinya bukan maén. Gegara ntu Muzan demen bikin masala, dibikinlah ntu Korep nyang husus bakal ngalain ni-ni sétan, namanya Korep Tukang Jagal Sétan. Tapian, biar kata ntu Muzan saktinya bukan maén, dia tetep ada kelemahan, ya'entu dia kaga' tahan ama mata'ari, bentaran aja dia kena mata'ari bisa bikin dia mampus.
Abis gitu, ada abang-adè' sodara kandung nyang jadi korban dikeja ama sétan-sétan begundalnya Muzan. Ntu dia abang-adè' Kamado, Tanjiro ama Nezuko. Apes kaga' kepalang, ntu Nezuko beruba jadi sétan gegara dia kena ajar sétan. Tanjiro jadi kudu muter akal pegimana caranya Nezuko bisa balik jadi orang, sala atu caranya ntu dia kudu jagal dedengkotnya kaum sétan, Muzan. E, tenga-tenga jalan, meruluk jago pedang deri Korep Tukang Jagal Sétan, terusan ntu Nezuko ampir dibikin mampus kalo ngga' gegara Tanjiro bekui minta ampun. Udahannya Tanjiro minta tulung ama ntu jago pedang buat beguru èlmu maén pedang biar bisa ntu Tanjiro kasi jagal Muzan.
Nah, ni Kimètsu no Yaiba nyeritain pegimana Tanjiro setenga mampus biar dia punya adè' bisa balik jadi orang lagi, ya'entu caranya dia kudu bisa ngalain Muzan.
Tokoh
[permak | permak sumber]Daptar tokoh Kimètsu no Yaiba:
- Kamado Tanjiro, Kimètsu no Yaiba punya tokoh utama.
- Kamado Nezuko, Tanjiro punya adè'.
- Kibutsuji Muzan, dedengkot ama moyangnya sétan.
- Ubuyashiki Kagaya, kepala Korep Tukang Jagal Sétan.
- Agatsuma Zenitsu, Tanjiro punya temen.
- Hishibira Inosuke, Tanjiro punya temen.
- ama laén-laénnya.
Macem-Macem Aliran Maén Pedang
[permak | permak sumber]Di mari juga dikenalin macem-macem aliran maén pedang, ya'entu ada:
Aliran Napas Mata'ari
[permak | permak sumber]Ni aliran bukan sembarang aliran, soalnya ni aliran ntu bakal dasar deri semua aliran maén pedang di Kimètsu no Yaiba; aliran maén pedang nyang laén ntu turunan atawa jiplakan deri ni aliran.[1] Ni aliran dibikin ama dipaké ama Tsugikuni Yoriichi deri jiplak mata'ari punya gerakan ama kekuatan.
Ngibingan Dewa Mata'ari
[permak | permak sumber]Ni aliran sebenernya aliran napas mata'ari nyang diumpetin paké ibingan.[2] Ni aliran diwarisin ama keluarga Kamado nyang ngiat langsung aliran napas mata'ari punyanya Tsugikuni Yoriichi.
Aliran Napas Bulan
[permak | permak sumber]Ni aliran turunan langsung deri aliran napas mata'ari. Ni aliran dibikin èndipaké ama Tsugikuni Yoriichi punya kembaran, Michikatsu, deri jiplak bulan punya wujud ama gerak.[3]
Aliran Napas Batu
[permak | permak sumber]Ni aliran dibikin deri jiplak batu punya kekuatan ama kekerasan. Jago pedang deri ni aliran punya gelar Pilar Batu.[1] Pilar batu nyang dikasi tau di komik Kimètsu ntu ada Himejima Gyomei. Nyang laén deri ni aliran, ntu, dia kaga' ada paké pedang, gantinya dia paké senjata nyang bentukannya ntu kapak disambungin ama bola besi paké rante.
Aliran Napas Api
[permak | permak sumber]Ni aliran dibikin deri jiplak api punya kekuatan ama gerakan. Jago pedang deri ni aliran punya gelar "pilar api".[1] Pilar api nyang dikasi tau di komik Kimètsu ntu ada Rengoku Kyojuro.
Aliran Napas Cinta'
[permak | permak sumber]Ni aliran dibikin deri turunan aliran napas api, dia ntu jiplak cinta' nyang kobar-kobar.[4] Jago pedang deri ni aliran punya gelar "pilar cinta'". Pilar cinta' nyang dikasi tau di komik Kimètsu ntu ada Kanryoji Matsuri. Nyang laén deri ni aliran ntu dia maké pendang nyang panjang be'eng bakal ngejagal sétan.
Aliran Napas Aer
[permak | permak sumber]Ni aliran dibikin deri jiplak aer punya wujud ama gerakan.[1] Jago pedang deri ni aliran punya gelar "pilar aer". Pilar aer nyang dikasi tau di komik Kimètsu ntu ada Tomioka Giyu.
Aliran Napas Uler
[permak | permak sumber]Ni aliran dibikin deri turunan aliran napas aer, dia ntu jiplak uler punya serangan ama gerakan.[5] Jago pedang deri ni aliran punya gelar "pilar uler". Pilar uler nyang dikasi tau di komik Kimètsu ntu ada Iguro Obanai.
Aliran Napas Kembang
[permak | permak sumber]Ni aliran dibikin deri turunan aliran napas aer, dia ntu jiplak kembang punya wujud.[6] Jago pedang deri ni aliran punya gelar "pilar kembang". Pilar kembang nyang dikasi tau di komik Kimètsu ntu ada Kocho Kanae.
Aliran Napas Serangga
[permak | permak sumber]Ni aliran husus dibikin ama Kocho Shinobu, Kanae punya adè', soalnya dia kaga kuat buat maké aliran pedang bakal jagal sétan. Terusannya dia bikin aliran husus nyang maké pedang husus kaya’ jarum suntik nyang diisiin ama dia paké racun deri kembang.[7] Ni aliran jiplak serangga punya gerakan. Jago pedang deri ni aliran punya gelar "pilar serangga". Pilar serangga nyang dikasi tau di komik Kimètsu ntu ada Kocho Shinobu.
Aliran Napas Angin
[permak | permak sumber]Ni aliran dibikin deri jiplak angin punya wujud, gerakan, èn kekuatan.[1] Jago pedang deri ni aliran punya gelar "pilar angin". Pilar angin nyang dikasi tau di komik Kimètsu ntu ada Shinazugawa Sanemi.
Aliran Napas Kabut
[permak | permak sumber]Ni aliran turunan deri aliran napas angin, dia ntu jiplak kabut nyang bisa bikin lawan ngablu.[8] Jago pedang deri ni aliran punya gelar "pilar kabut". Pilar kabut nyang dikasi tau di komik Kimètsu ntu ada Tokito Muichiro.
Aliran Napas Hewan
[permak | permak sumber]Ni aliran dikeja kendiri ama Hashibira Inosuke deri jiplak hewan liar punya gerakan atawa suka-suka dia aja maké pedangnya pegimana, sampe-sampe ntu pedang dilempar terusan jadi jurus anyarannya kendiri.[9] Ni aliran punya ciri nyang mirip ama aliran napas angin, mangkanya dimasupin ke rungkun aliran napas angin.
Aliran Napas Geledek
[permak | permak sumber]Ni aliran dibikin deri jiplak geledek nyang kencengnya bukan maén.[1] Jago pedang deri ni aliran punya gelar "pilar geledek". Pilar geledek nyang dikasi tau di komik Kimètsu ntu ada engkongnya Zenitsu.
Aliran Napas Bebunyian
[permak | permak sumber]Ni aliran turunan deri aliran napas geledek, dia ntu jiplak bebunyian nyang geledar-geleder, heboh dah pokoknya.[10] Jago pedang deri ni aliran punya gelar "pilar bebunyian". Pilar bebunyian nyang dikasi tau di komik Kimètsu ntu ada Tengen Uzui.
Ruju'an
[permak | permak sumber]- ↑ a b c d e f Komik Kimetsu no Yaiba: Bab 178 (halaman 7).
- ↑ Komik Kimetsu no Yaiba: Bab 40.
- ↑ Komik Kimetsu no Yaiba: Bab 178 (halaman 8)
- ↑ Komik Kimetsu no Yaiba: Bab 112.
- ↑ Komik Kimetsu no Yaiba: Bab 139.
- ↑ Komik Kimetsu no Yaiba: Bab 143.
- ↑ Komik Kimetsu no Yaiba: Bab 142 (halaman 9-10)
- ↑ Komik Kimetsu no Yaiba: Bab 106.
- ↑ Komik Kimetsu no Yaiba: Bab 162 (halaman 22).
- ↑ Komik Kimetsu no Yaiba: Bab 77.