Kernèli (taneman)
.jpg)
Kernèli[1] (hurup Arab Gundul: کرنلى) atawa pernèli (hurup Arab Gundul: فرنلى) atawa panili (hurup Arab Gundul: فنلى) (Vanilla planifolia) entu taneman nyang ngasilin bubuk kernèli atawa panili bakal jadi wangi-wangi makanan. Ni bubuk dikeja deri dia punya buah nyang bentuknya polong.
Taneman kernèli asalnya mah dikenal ama orang-orang Indian di Mèksiko, ni taneman punya negara asal. Kernèli ngembang biaknya ada dua cara: liwat kelamin (generatif) atawa sonder kelamin (vegetatif).
Penyebaran
[permak | permak sumber]Awalnya, taneman kernèli cuman tumbu di Mèksiko. Selamanya abad ke-15, sala atu suku pedaleman Mèksiko, nama suku Astèk, ngambil ni bua kernèli punya paèda bakal jadi wangi-wangi di minuman coklatnya.[2] Ni minuman coklat digeronya cacahuatl[3] nyang misti disajènin di dalem kenduri-kenduri atawa selametan di suku Astèk punya kebudayaan. Ama tu orang Astèk sendèwèk, kernèli digeronya Thilxochitl nyang artinya 'kembang item'.[2][3]
Terus pas sekitaran tahon 1519, atu orang deri bangsa Peringgi, nama Fernando Cartos, nyaba ke Mèksiko ama ngicipin tu minuman cacahuatl. Abis kombalinya, Fernando Cartos ngenalin kernèli ama dia punya hopèng Èropanya. Barang udah dikenalin di Èropa, kernèli mulain didemenin ama dijadiin barang dagang nyang dibawa' deri Mèksiko ke Èropa. Dalem tahon 1602, Ratu Èlisabèt I, ratu Inggris, punya tukang obat, nama Hugh Morgan, nyaranin nambahin kernèli bakal namba-namba rasa ama bau-bauan. Selamanya tahon 1700-an, kernèli udah ditambahin di macem-macem produk, kaé alkohol, bako, ama wangi-wangian.[2] Walakin bagèn gitu, di Èropa, kernèli baru dibiakin baru semprakan tahon 1721.[4][5]
Sedeng di Indonésia, pengauran kernèli baru masup tahon 1819 liwat atu ahli taneman Welanda, nama Prof. Dr. Reinwadt. Awalnya mah, tu bibit nyang digawa cuman bakal jadi sesimpenan atawa kolèksi Kebon Gedé Bogor. Èh tau-taunya, tu taneman kernèli bisa dibiakin di mana-mana bilangan, wabilkusus di Jawa Tenga ama Jawa Kulon. Badan Sintrem Statistik Sional (Badan Pusat Statistika Nasional) punya kata, lèbar tana biakan kernèli dalem tahon 2014 udah nyampé 13,60 rèbu hèktar.[6] Wayah gini gè', kernèli udah dibiakin di mana-mana laèn daèrah, kaé Bali, NTT, ama Sulawési. Indonésia kendiri misi jadi sala atu negara nyang ngèkspor kernèli paling gedé.[7]
Adapun wayah gini, produk deri kernèli udah keampar-ampar di mana-mana dunia. Negara pengasil kernèli paling gedé antara laèn Madagaskar, Indonésia, Mèksiko, Papua Giné Baru, Tiongkok, Turki, èn Kerajaan Tonga.[5] Adapun negara-negara nyang merluin impor kernèli paling gedé antara laèn Amrik Serèkat, Prasman, Pilipénen, Dètslan, Welanda, ama Kanada.[8]
Ruju'an
[permak | permak sumber]- ↑ Chaer, Abdul. (2009). Kamus Dialek Jakarta. K. Rép. Penerbit Masup Jakarta.
- ↑ a b c Ramada, Agus. (2010). Panduan Lengkap Agribisnis Vanili. Yogyakarta: Lily Publisher. h. 1–3. ISBN 978-979-29-1725-3.
- ↑ a b "Sejarah Singkat Vanili". vanili-indonesia.com. Dibuka per 20 Juli 2023.
- ↑ Sunyoto, Marleen. (2019). Rempah-Rempah yang Mendunia. Bandung: PT Lontal Digital Asia. h. 177. ISBN 978-623-7109-21-1.
- ↑ a b Jodyf. (19 April 2016). "Asal-Usul Tanaman Vanili - Artikel Pertanian Terbaru | Berita Pertanian Terbaru". Pertanianku (basa Indonésia). Dibuka per 20 Juli 2023.
- ↑ "Badan Pusat Statistik". www.bps.go.id. Dibuka per 20 Juli 2023.
- ↑ Yolanda, Cindy. "Mantap! Indonesia Jadi Produsen Vanila Terbesar Dunia Setelah Madagaskar". www.goodnewsfromindonesia.id. Dibuka per 20 Juli 2023.
- ↑ "Top 20 Country Importers, Import Quantity of Vanilla, raw (2021)"(basa Inggris). Dibuka per 20 Juli 2023.