Kerajaan Wajo
Kerajaan Wajo ᨕᨀᨑᨘᨂᨛ ᨑᨗ ᨓᨍᨚ Akkarungeng ri Wajoʼ | |||||||||
|---|---|---|---|---|---|---|---|---|---|
| barang 1400–1957 | |||||||||
| Status | Hindia Welanda punya bagian (1905–1949) Indonésia punya bagian (1949–1957) | ||||||||
| Hopstad | Cinnotabiʼ (barang 1400–1610) Tosora (barang 1610–1885) Séngkang (barang 1885–1957)[1] | ||||||||
| Basa awam | Bugis | ||||||||
| Igama | Selam (deri 1610) | ||||||||
| Guwernemèn | Peserèkatan perwakilan di bawah kerajaan pemilian nyang diwatesin wèt dasar[2][3] | ||||||||
| Jaman sejarah | Jaman modèren awal | ||||||||
• Didiriin | barang 1400 | ||||||||
• Dimasupin ke Hindia Welanda | 1906 | ||||||||
• Dibubarin èn dirobah jadi kabupatèn | 1957 | ||||||||
| |||||||||
| Ni ari jadi bagian | Indonésia | ||||||||
Wajo atawa Wajo' entu atu orang Bugis punya kerajaan pemilian nyang ngejegreg di belètan Semenanjung Sulawési Kidul. Enni kerajaan kesohor ama dia punya guwernemèn nyang rada ngera'yat, masarakat nyang gableg hak-hak kemerdékaan, èn orang ranto nyang nyebar ke antéro Asia Kidul-wètan di jaman modèren awal.
Sejarah
[permak | permak sumber]_ID.svg)
Enni kerajaan mulain wujud barang abad ke-15, terus ngembang ampé jadi saingan negeri-negeri seputernya wayah abad ke-16.[2] Bahna gègèr Perang Mengkasar ama bentrok-bentrok antéro negeri di sono wayah ahir abad ke-17, pada ngeranto dah entu orang Wajo ke luar negeri. Bagèn gitu, Wajo punya orang ranto pada nulungin entu negeri jadi nyang paling kuat di Sulawési Kidul nggantiin Boné barang beberapa taon di paro awal abad ke-18.[4] Enni negeri mertahanin dia punya kemerdékaan ampé dijadiin swapraja bawahan Hindia Welanda wayah awal abad ke-20. Kerajaan Wajo tetep wujud, tapi dah kaga' ada gigi lagi, ampé beneran bubar taon 1957 lantaran dia punya wilayah dijadiin kabupatèn.[5]
Pulitik èn guwernemèn
[permak | permak sumber]Kalo deri segi pulitik, Wajo punya bentuk entu peserèkatan nyang kebelèk jadi tiga limpo atawa bagian utama: Béttémpola, Talotenreng, èn Tua. Entu tiga bagian gè' kebelèk lagi jadi puluan negeri-negeri kecit (Bugis: wanua) nyang punya wewenang lumayan gedé.[2][4] Wajo punya raja kolot (Bugis: arung matoa) atawa persidèn[a] dianggep simbol penyatu, hakim èn kumendan tinggi negeri, serènta ngewakilin Wajo bakal urusan luar negeri.[4]
Raja kolot punya jabatan kaga' bisa dirangkep ama jabatan laèn atawa diwarisin turun-temurun.[2][7] Guwernemèn sari-sarian dijalanin raja kolot bareng ama tiga rangkepan pejabat sipil èn militèr nyang digero ranreng ('bupati') ama baté lompo ('panji gedé'), bakal ngewakilin Wajo punya tiga bagian. Enni guwernemèn sari-sarian disokong ama 33 orang pejabat laèn, nyang rembug bareng déwan tinggi cuman kalo ada perlu mutusin hal-ihwal gedé, kaya' misalnya rembug mili raja kolot anyar.[4] Enni déwan gedé punya kuasa ditimbelin lagi ama tiga punggawa,[b] dipili deri ra'yat merdéka di tiga bagian bakal ngewakilin dia pada. Enni tiga punggawa lumayan ada giginya; dia pada bisa ngebatalin pengangkatan raja kolot nyang ditulak ra'yat, èn cuman dia pada nyang gableg hak nggero ra'yat bakal perang.[8] Entu raja kolot gè' bisa dilèngsèrin kalo-kalo dia ngelanggar Wajo punya hukum adat ama ra'yat merdéka punya hak.[2][3]
Budaya èn masarakat
[permak | permak sumber]
Ahli sejarah Anthony Reid punya makalah bilang kalo masarakat Wajo entu gableg bukti paling banyak pekara ngelembagain rukun-rukun kemerdékaan (Bugis: ammaradékangeng) ketimbang masarakat jaman bahela laèn di Asia.[9] Enni negeri punya kitab-kitab saban wayah ngomongin nyang "orang-orang Wajo entu merdéka"; tuan dia pada cuman hukum adat nyang dibikin deri rembug bareng. Wajo punya rukun kemerdékaan entu mulain deri jaminan keselametan awak, hak gableg banda sendèwèk, hak ngebacot, ampé hak ngeladog ke mana aja, èn bikin akad ama sapa aja. Tapinya, cuman kalangan ningrat èn orang merdéka nyang hak-haknya kejamin ama gableg wakil di guwernemèn. Adapun kaum budak punya hak entu lebi dikit.[4][9]
Orang Wajo punya gawé entu kalo ga' ngurus sawah ama kebon, nyari ikan, atawa bedagang.[10] Orang Wajo punya dagangan maju pesat wayah abad ke-18 èn ke-19, serènta dia pada kesebar ngeranto ke pelosok-pelosok Asia Kidul-wètan, mulain deri nyang deket-deket kaya' di antéro Sulawési, Kalimantan, èn Nusa Tenggara, ampé nyang jaoh-jaoh kaya' di Papua, Sulu, Sumatra, Semenanjung Malaya, èn Kemboja.[3][4][11]
Catetan
[permak | permak sumber]- ↑ Ahli basa Jacobus Noorduyn maké basa Inggris punya istilah president bakal nerjemahin arung matoa.[6]
- ↑ James Brooke, Serawak punya Raja Puti nyang nyaba ke Wajo taon 1840-an, nyamain peran punggawa ama "tribunes of the people" jaman Kiblik Romawi, biar kata punggawa gableg kuasa nyang lebi gedé ketimbang tribunus plebis.[8]
Ruju'an
[permak | permak sumber]- ↑ Duli, Akin (2010). "Peranan Tosora sebagai pusat pemerintahan Kerajaan Wajo abad XVI–XIX". Walennae. 12 (2): 143–158.
- ↑ a b c d e Abidin, Andi Zainal (1985). Wajo' pada abad XV–XVI: Suatu penggalian sejarah terpendam Sulawesi Selatan dari lontara. Bandung: Penerbit Alumni. OCLC 12901929.
- ↑ a b c Pelras, Christian (1996). The Bugis. Oxford: Blackwell Publishers. ISBN 9780631172314.
- ↑ a b c d e f Wellen, Kathryn Anderson (2014). The open door: Early modern Wajorese statecraft and diaspora. DeKalb: Northern Illinois University Press. ISBN 9780875807126.
- ↑ Patunru, Abdurrazak Daeng (1983)[1964]. Sejarah Wajo. Ujung Pandang: Yayasan Kebudayaan Sulawesi Selatan. OCLC 215821862.
- ↑ Noorduyn, Jacobus (2000). "The Wajorese merchants community in Makassar". Bijdragen tot de Taal-, Land- en Volkenkunde. 156 (3): 473–498. doi:10.1163/22134379-90003836.
- ↑ Halim, Wahyuddin (2016). "Eksplorasi atas praktik dan nilai-nilai demokrasi dalam Kerajaan Wajo' abad ke-15/16 dan kompatibilitasnya dengan sistem demokrasi modern". Masyarakat dan Budaya. 18 (2): 187–202. doi:10.14203/jmb.v18i2.410.
- ↑ a b Henley, David; Caldwell, Ian (2019). "Precolonial citizenship in South Sulawesi" (PDF). Citizenship Studies. 23 (3): 240–255. doi:10.1080/13621025.2019.1603271.
- ↑ a b Reid, Anthony (1998). "Merdeka: The concept of freedom in Indonesia". Di David Kelly; Anthony Reid (prm.). Asian freedoms: The idea of freedom in East and Southeast Asia. Cambridge: Cambridge University Press. h. 141–160. ISBN 9780521637572.
- ↑ Lineton, Jacqueline (1975a). An Indonesian society and its universe: A study of the Bugis of South Sulawesi (Celebes) and their role within a wider social and economic system (disertasi PhD). School of Oriental and African Studies, University of London.
- ↑ Lineton, Jacqueline (1975b). "Pasompe' Ugi': Bugis migrants and wanderers". Archipel. 10: 173–201. doi:10.3406/arch.1975.1248.