Kera'yatan Keangon di Indonésia

Persidèn Sukarna ngebacain dia punya dekrit 5 Juli 1959.

Kera'yatan Keangon (Indonésia: Demokrasi Terpimpin) ièlah sistim pulitik di Indonésia semprakan tahon 1959 ampé muncuknya Orde Baru tahon 1966. Entu Persidèn Sukrana punya pikiran nyang pikirannya mah aturan biar pulitiknya pada panteng. Sukarna mikirnya sistim parlemèntèr nyang diterepin pas jaman kera'yatan liberal di Indonésia entu kaga' tokcèr bahnanya pada selèk-selèkan tu waktu. Mangkanya, dia ambil dah sistim nyang berales musawarah mepakat terdisi kampung-kampung nyang di bawahnya dedengkot kampung punya angon. Dengen diumuminnya darurat perang ama penerepannya ni sistim, Indonésia balik lagi jadi sistim persidènsiil èn Sukarna jadi hop guwernemèn lagi.

Sukarna ngongsogin pengamprogan lempit tiga deri nasionalisme (kebangsaan), agama (agana), èn komunisme (kuminisme) jadi peengehan pemerèntahan nyang namanya Nas-A-Kom atawa Nasakom. Ni mah maksudnya biar empat kelompok utama di pulitik Indonésia pada puas—soldadu, sionalis sèkulèr, rombongan Selam, ama kuminis. Dengen bantuan deri militèr, dia umumin dah Kera'yatan Keangon tahon 1959 èn ngongsogin kabinèt nyang ngewakilin parté-parté pulitik gedé, masup juga' di dalemnya Parté Kuminis Indonésia, bagèn kata kaga' pernah keduman jabatan kabinèt pungsionil.