Kapitèn Amrik
Kapitèn Amrik (hurup Arab Gundul: کفيتن امريک; Inggris: Captain America) entu atu jagoan hébat nyang dikeja ama Joe Simon èn Jack Kirby nyang nongol di ceritra-ceritra cèmèn Marvel Comics punya terebitan. Ni tokoh baru nembèl di Captain America Comics #1, terebit per 20 Désèmber 1940 terebitan Timely Comics, atu matskepé pendulu Marpèl. Kapitèn Amrik punya idèntitèt orang biasa namanya Steve Rogers, atu orang bègèng, cèblèk, mana soak, nyang jadi mantep stèrek jogrogannya abisnya dijajal dèksi "sérum soldadu-hébat" abisnya dia nimbrung ke Soldadu Amrik Serèkat bakal ngongkodin negaranya punya usaha di Perang Dunia II. Dilengkepin paké baju nyang sorotnya mendèra Amrik èn ama tamèng kaga' ancur-ancur, dia barengan ama dia punya hopèng, nama Bucky Barnes, sering begucelan lawan bènggol musuhnya Tengkorak Mèra èn laèn-laèn anggota Blok As. Di akir-akir jaman perang, ada kecilakaan kejadian ama dia, ampé-ampé Kapitèn Amrik kapiran beku dalem kewontenan mati suri ampé dia dikaclèngin lagi di wayah modèren. Dia terus nglanjutin jadi jagoan maké tu baju èn jadi omplokan jagoan hébat, nama Para Pembales, punya dedengkot, cuman ni orang sering kedekak-kedekuk sebagé "orang ketinggalan jaman" bakal mantesin dèwèknya ama jaman sekarang.