Loncat ke isi

Kalangan (kewontenan alam)

Deri Wikipedia
Kalangan mataari

Kalangan[1] (hurup Arab Gundul: کالڠن; Indonésia: halo; Yunani: ἅλως halōs) entu kejadian optis nyang bentuknya cahaya nglingker di sekiterannya Mataari ama Bulan, kadang juga' ada di laèn-laèn sumber cahaya, laya' lampu jalan. Ada sisik-melik kalangan, cuman nyang galib mah kalangan nongol lantaran baluran ès di awan sires (biasanya cirrostratus) nyang dingin nyang ada di 5–10 km atawa 3–6 mil di lapisan atasnya tropospir. Ni kejadian begantung ama bentuk ama arahnya itu balur ès, cahaya mataari ditèktokin ama dibelèngkokin ama itu muka ès nyang bentuknya batang atawa prisma, jadi tu sinar mataari kepecah-pecah jadi kelar-kelir, lantaran èpèk pemencaran cahaya nyang dipancerin ke atu sasaran, medu ama kuwung-kuwung.

Kalangan juga' bisa baé tiba-tiba nyembul di deket muka bumi, kapan ada balur ès nyang digero debu berlian. Ni kejadia bisa kejadian kalo itu cuaca dingin pisan, pas itu balur ès kebentuk di deket muka èn nèktokin cahaya.

Sebelonnya èlmu cuaca dikembangin, kalangan dipaké jadi wasilah bakal ngancer-ancer cuaca.[2]

  1. Chaer, Abdul. (2009). Kamus Dialek Jakarta. K. Rép. Penerbit Masup Jakarta.
  2. "Weather Forecasting Through the Ages". earthobservatory.nasa.gov (basa Inggris). 25 Pèbruari 2002. Dibuka per 1 Agustus 2023.