Jujutsu Kaisén

Jujutsu Kaisén (Jepang: 呪術廻戦 (Kanji) atawa じゅじゅつかいせん (Hiragana), latènnya: Jujutsu Kaisén atawa tarjimnya: Maèn Teluh) ya'entu nama atu komik èn gambar cèmèn Nipong bekèn nyang diserat ama Gege Akutami (Jepang: 芥見下々 (Kanji)) sederi bulan Maret 2018.

Ringkesan

Jujutsu Kaisén ntu nyeritain soal dunia nyang isinya ada orang-orang husus nyang punya kesaktian bakal ngendali'in teluh atawa èlmu sihir. Bukan cuming orang, di ceritanya Jujutsu Kaisén juga ada sétan ama roh-roh nyang juga bisa paké ntu èlmu sihir. Ni-ni sétan ama tukang sihir kerja'annya ribut mulu, demenannya bejaban maké èlmu sihir. Sala atu sétan nyang èlmunya tinggi jasa ampé jadi jago ntu dia Ryomén Sukuna. Sangking tinggi ntu Sukuna punya èlmu, dia ampé kudu diteluh jadi nyisa jeriji doang, uda gitu mencar-mencar ke seantero Japang.

Mingser ceritanya ke wayah gini, anak sekola'an nyang namanya Yuji Itadori kaga' sengaja nemu ntu Sukuna punya jeriji nyang ada deket sekola'annya dia, terusannya dicomot, dilebok dah ntu jeriji. Itadori nyang emang orangnya udah kuat be'eng, abis nelen ntu Sukuna punya jeriji jadi kaga' ketulung kuatnya, lebi-lebi dia jadi punya èlmu sihir èn kesaktian juga. Tapi apes bukan maèn, gegara begituan juga dia jadi kesurupan Sukuna.

Nah, ni Jujutsu Kaisén ngisain pegimana caranya ntu Itadori nyang separo kesurupan bisa bikin Sukuna kaga' jadi balik wujud jadi sétan. Kudu lah, dia, terusan, sekola di sekola'an nyang isinya dukun-dukun buat bisa ngendali'in ntu kesaktian Sukuna.

Tokoh

Daptar Jujutsu Kaisén punya tokoh:

Yuji Itadori, Jujutsu Kaisén punya tokoh utama,
Ryomén Sukuna, Jujutsu Kaisén punya musuh utama,
Satoru Gojo, Jujutsu Kaisén punya dukun kesohoran én madrasah dukun teluh punya guru,
Nobara Kugisaki, Yuji Itadori punya temen wadon,
Megumi Fushiguro, Yuji Itadori punya temen lanang,
Suguru Gèto, Satoru Gojo punya temen baè' èn Jujutsu Kaisén punya musuh kesampingan
Kènto Nanami, Satoru Gojo punya temen baè' èn madrasah dukun teluh punya guru,
Yuta Okotsu, Jujutsu Kaisén punya dukun kesohoran,
Inumaki Toge, Yuji Itadori punya sodara tua atu peguruan,
Zenin Maki, Yuji Itadori punya sodara tua atu peguruan,
Panda, Yuji Itadori punya sodara tua atu peguruan,
ama lain-lainnya.