DreadOut
DreadOut (hurup Arab gundul: دريد ئوت) ya'entu Indonésia punya gim sétan nyang dikembangin ama Digital Happiness bakal Windows, Mac OS X, èn Linux. Enni gim uda berasil kepilih ama Steam Greenlight èn ada bakal dibeli dalem ladènan Steam.
Sistim permaènan[permak | permak sumber]
DreadOut entu gim sétan bakal betahan idup maké sistim gaib[1] nyang maké latar Indonésia. Tokoh utamanya namanya Linda. Si Linda maké alat macem pesawat mutahir atawa kaméra dijital bakal sènggolan ama macem-macem sétan. Entu alat juga dipaké bakal bantuin si Linda nyudahin macem-macem teka-teki di atu kota nyang kaga' orangnya. Pas si Linda modar dalem enni gim, si Linda bakal bangun mendusin dalem tempat gelap sekali èn dikelilingin ama lilin nyang ada apinya. Terus, deri jauh keliatan bayangan putih. Entu bayangan putih bikin si Linda sadar deri "modar"-nya.
Enni gim maké pampangan kontrol sistim gaib èn orang pelakon[2]. Pemaèn lakonin pengarahan dalem gim paké sudut deleng[3] kaméra belakang-bahu, cuman bakal beganti ke sudut deleng orang pelakon saban kali pemaèn mutusin bakal paké kamèra dijital bakal motrèt atu mahluk atawa benda. Atu tontonan pradeleng[4] nyang paling anyar tengerin pèrsi tablèt deri enni gim, di mana si Linda lagi ngontrol liwat sènggolan sentuh èn paké sudut deleng kamèra. Enni mirip kaya gim Fatal Frame.
Plot gim[permak | permak sumber]
Ada seguyub bocah SMA nyasar deri pelesiran dia pada punya jalan-jalan. Terusannya, dia pada ketemu ama kota lama nyang uda kosong. Dia pada sigra sadar akan ihwal jahat nyang bakalan kejadian. Si Linda, enni gim punya tokoh protagonis, sadar kalo ada ihwal anèh èn angker bakal kejadian ama dia. Si Linda dapet èlmu gaib nyang bisa nyelametin dia èn bebaturannya deri hal-hal di luar nalar laènnya.
Pengembangan[permak | permak sumber]
Rachmad Imron selaku pembikin Digital Happiness uda mulain gim DreadOut sederi 2010, mulain sebelon studio game-nya ada. Pas entu wayah, Imron udah ngeja animasi èn tontonan tiga dimènsi di maskepé dia punya sendèwèk, Iris Desain. Pengembangan gim DreadOut ngabisin waktu ampé dua taon èn pulus ampé 300-an juta bakal bayarin upah pegawé èn buruh kontrak ampé berasil langsir conto gimnya 1 April 2013.
Digital Happiness ngeja enni gim paké paguyuban nyang ada punya kira-kira 20 orang. Abis langsir conto gimnya, dia pada nyari kampanye crowdsourcing liwat Indiegogo. Dia pada punya kampanye mènta 25 rèbu dolar Amrik èn abis dengen 29 rèbuan dolar Amrik. Dia pada butuh crowdsourcing lantaran Indonésia punya industri gim entu kecit èn sebagéan laènnya bekutat ama gim masarakat èn kaga pating pulusnya. Pembikin Digital Happiness, Rachmad Imron bilang: "Kita-kita orang ada punya banyak orang nyang paling baè, cuman dia pada banyak mèrad ke luar negeri gara-gara di Indonésia kaga industrinya bakal ngeja gim, cumanan enni kita-kita orang punya harapan moga-moga enni semua bakal berobah."
Ruju'an[permak | permak sumber]
- ↑ Sistim gaib (hurup Arab gundul: سستيم غائب) - (Ind.) Sistem orang ketiga; (Ing.) Third person
- ↑ Orang pelakon (hurup Arab gundul: اورڠ فلاکن) - (Ind.) orang ketiga; (Ing.) First person
- ↑ Sudut deleng (hurup Arab gundul: سودت دلڠ) - (Ind.) perspektif; (Ing.) Perspective
- ↑ Tontonan pradeleng (hurup Arab gundul: تنتونن فرادلڠ) - (Ind.) video pratinjau; (Ing.) preview video