Almenak
Almenak (hurup Arab Gundul: المنك atawa المناخ) entu ièlah sistim bakal ngètung waktu nyang kebagi jadi tanggal, ari, bulan, èn tahon. Almenak nyang dipaké di kita punya masarakat umumnya dua macem, meski sebenernya mah ada banyak almenak di mana-mana masarakat, ya'entu: almenak Masèhi atawa almenak umum èn almenak Selam atawa almenak hijriah. Pengrèkenannya juga' laèn dah tu antara almenak Masèhi ama almenak Islam, bagèn bulannya sama-sama dua belas, arinya sama-sama tujuh.
Adapun nama-nama bulan di dalem almenak Masèhi ièlah sebagé berikut:
- Januari (hurup Arab Gundul: جنوارى) – 31 ari
- Pèbruari (hurup Arab Gundul: فبروارى) – 28 ari (pas tahon kabisat nyang saban 4 tahon sekali 29 ari)
- Maret (hurup Arab Gundul: مارت) – 31 ari
- April (hurup Arab Gundul: افريل) – 30 ari
- Méi (hurup Arab Gundul: مي) – 31 ari
- Juni (hurup Arab Gundul: جونى) – 30 ari
- Juli (hurup Arab Gundul: جولى) – 31 ari
- Agustus (hurup Arab Gundul: اݢستوس) – 31 ari
- Sèptèmber (hurup Arab Gundul: سفتمبر) – 30 ari
- Oktober (hurup Arab Gundul: اکتوبر) – 31 ari
- Nopèmber (hurup Arab Gundul: نوفمبر) – 30 ari
- Désèmber (hurup Arab Gundul: دسمبر) – 31 ari.
Adapun nama-nama bulan di dalem almenak Selam ièlah sebagé berikut (ari kaga' bisa diajegin, sebab misti ada namanya hisab ama ru'yat; cuman biasanya kalo ngga' 29 ya 30 ari):
- Sura (hurup Arab Gundul: شوراء)
- Sapar (hurup Arab Gundul: صفر)
- Mulud (hurup Arab Gundul: مولد)
- Seri Mulud (hurup Arab Gundul: سرى مولد atawa شرى مولد)
- Jumadilawal (hurup Arab Gundul: جمادى الأول)
- Jumadilakir (hurup Arab Gundul: جمادى الأخر)
- Rejeb (hurup Arab Gundul: رجب)
- Roah (hurup Arab Gundul: روه)
- Puasa (hurup Arab Gundul: فواس atawa فواسا)
- Sawal (hurup Arab Gundul: شوال)
- Apit (hurup Arab Gundul: افت)
- Haji (hurup Arab Gundul: حج)