Wikipédi:WikiSeratSerèt/Tètèk bengèk lomba
| Belandongan | Tètèk bengèk lomba | Pemontenan | Daptar makalah | Pertanyaan |
Ketetepan lumbrah
- Ni lomba lombanya napsi-napsi atawa sorang-sorangan (individu).
- Lu kudu manut ama Wikimédia Indonésia punya cingli-cingli pangkèng ilok acara (kebijakan ruang ramah acara).
- Warga Negara Indonésia (WNI) nyang èmang ngambreknya di Kiblik Indonésia.
- Paling kaga' umurnya 17 tahon pas ni lomba dimulain (per 1 Maret 2024).
- Lu KADANAN atawa PERBODEN nimbrung di ni lomba kalu:
- lu jadi pegawé (staf), tukang wejang (konsultan), merbot (pengurus), opsinder (pengawas) Wikimédia Indonesia, Yayasan Wikimédia, ama seberoyotan (afiliasi) Wikimédia laènnya;
- lu dapet ongkos belajar (beasiswa) dalem-jala atawa dikasi kumpiuter cangkingan (laptop) ama internit deri Wikimédia Indonésia nyang masing belon kelar ama kewajibannya;
- lu jadi tukang urus (panitia) ama penimbrung lomba-lomba nyang masing paké duit batapora (dana hibah) WikiTeroka 5.0 nyang laènnya.
- Kalu ada tètèk bengèk atawa cingli-cingli (kebijakan) nyang masing rada kurang danta, lu juntrungin, dah, tukang ngurusnya liwat aderès surat lèstrik jakarta@wikimedia.or.id.
- Tukang urusnya gablek hak bakal ndèpak lu kalu lu kerjaannya tibang ngerècokin jalannya ni lomba doang.
- Poko'nya, cingli-cinglinya tukang urus, mah, telek joto nyang kaga' bisa dirècokin atawa dikelah-kelah lagi.
- Ni lomba bolé kaci bakal pemaké baru, kè'; pemaké lama, kè', nyang paling banter permakannya 200 permakan. Jal lu perèksa dulu lu punya sumbangan di mari.
Tètèk bengèk lomba
- Penimbrung kudu daptar dulu, dah, liwat belangko nyang udah diderakin ama tukang urusnya.
- Penimbrung ngeja makalah baru nyang perihalnya budaya sayur (pop-culture) (kaya', musik, gim kumpiuter, pèlem, pèlem cèmèn, gambar gerak, cerita cèmèn, hodeng, èns.) maké basa Betawi paké kaèdah atawa pakem tulis nyang bener. Jal lu perèksa dulu ni pendoman.
- Jinganan èmang basa Betawi punya logat, pan, roncèt pisan, ya, mangkanya lu orang bolé maké logat mana bé—asal ajek. Tuladnya, kalu lu udah maké logat Kota, ya, atu makalah seugerannya kudu paké logat Kota juga'—jangan ampé dicampur kaga' kepuguh lagu.
Kalu èmangnya kaga' yakin paké logat nyang mana, paké aja, dah, junjang basa tulis (ragam bahasa tulis) kaya' nyang lu lagi liat nyang ni nyang kaga' ngilon ke logat nyang mana-mana ama lebi nampung semua logat. - Poko'nya, mao sebadeg apa, gè', seterah, dah, kaga' keinggen mo nulis berapa.
- Angguran jangan maké calakan bikinan (artificial intelligence) atawa mesin tarjim.
- Kegetapan (kegiatan) pendaptaran ama pengejaan makalah dilakonin pas wayah-wayah WikiSeratSerèt masing tangéh, nya'entu tanggal 1–30 Maret 2025.
- Mo narjim deri makalah Wikipédi basa laènnya, gè', bolé banget. Nyang penting, iyengin baè'-baè' paranan atawa ruju'an ama perihalnya masing nyambung.
- Bok-bokan tukang urus nemu ada nyang kelèru ama ngasi suru dandanin lagi, tu makalah kudu didandanin lagi, dah, ama penimbrung.
- Gèh, lu jal liat makalah tuladnya nyang paling cakep: Bir pletok.
Èling! Saben makalah kudu dikasi bangsaan
[[Bangsaan:WikiSeratSerèt 2025]].
