Ulama (permaènan)

Ulama (basa Spanyol: ollama (pelapalan Spanyol: [uˈlama]) atawa maèn bola Astèk entu atu maènan ama gerak badan has Mèksiko. Ni maènan sokanan dianggep jadi atu deri kolot-kolotnya maènan bola nyang masing ajeg dimaènin, juga' jadi maènan nyang paling awal maké bola karèt. Sanonya, ni maènan diturunin deri orang Astèk punya gaya maèn bola Amrik Tengahan.[1] Wayah gini, ni maènan kolot udah mulain diraméin lagi di negeri Sinaloa ama di Mèksiko Kota.[2]
Sejarah
[permak | permak sumber]Tu kata ollama dicomot deri basa Nawa Klasik ōllamaliztli [oːlːamaˈlistɬi], deri kata ōllama [ˈoːlːama] 'maèn bola karèt', juntrungan ama kata ōlli [ˈoːlːi] 'karèt; bola karèt'. Ōllamaliztli entu orang Astèk punya geroan bakal cara maèn bola Amrik Tengahan, nyang kalo disasab-sasabin udah ada semprakan dua rèbuan taon sebelon Masèhi. Bukti bakal ni maènan ada ketemu di semua-mua masarakat Amrik Tengahan,[a] mulain deri nyang di Mèksiko ampé di Salbador, mentak juga' ampé utekan Arijona ama Mèksiko Anyar wayah gini. Tukang ngaji èlmu perkolotan pada tau ketemu ngebadeg bola karèt nyang dibikin barang taon 1600 SM di Manati, gambaran sepèler bola nyang mentak dibikin paling kaga' semprakan 1200 SM, ama juga' pèlan bola ampé 1.500-an biji.[3]
Cara maèn
[permak | permak sumber]
Maèn ulama dilakonin di pèlan bikinan nyang digero tastei ([tas.te], deri kata tlachtli [ˈt͡ɬat͡ʃt͡ɬi] (basa Nawa Klasik bakal 'pèlan bola'). Ni pèlan ngejèmbrèng manjang diwatesin garis kapur tebel-tebel. Ni pèlan dibelah bakal dua pihak ama dia punya garis tenga nyang digero analco. Pihak nyang bisa ngliwatin bola ke garis ujung (chichi atawa chivo) bakalan diangsrongin pontèn atawa rayas.
Wayah gini, ni maènan ngelah tiga cara maènnya:
- Ulama de cadera atawa ulama panggul.[4] Ni maèn bola kudu dijabanin sepèler lima lawan lima atawa banyakan lagi (bisa ampé 12 biji, dah, tu); semua-muanya maké cawat ama papan di panggul bakal ngelindungin entu bagéan deri noh bola karèt nyang bisa ampé 3–4 kg antebnya.
- Ulama de antebrazo atawa ulama lengen.[4] Ni cara maèn maké pèlan rada kecitan, ngaduin pihak sorangan ampé tiga lawan tiga. Bola nyang kepaké juga' kaga' anteb kaya' nyang dipaké ulama panggul. Bakal tepokan-tepokan bola, entu sepèler pada kudu maké dia punya lengen bawa. Biasanya, mah, wadon pada demen maèn maké ni cara.
- Ulama de mazo atawa Ulama de palo,[2] nyang maké pentungan kayu anteb 6–7 kg bakal nyontogin onoh bola 500g, biasanya ngaduin orang tiga-tiga atawa empat-empat.
Catetan
[permak | permak sumber]- ↑ Inggris: Mesoamerica, bèdain ama Amrik Tenga (Central America)
Ruju'an
[permak | permak sumber]Tukilan
[permak | permak sumber]- ↑ Leyenaar (1978).
- ↑ a b Fredrick, James (2018-09-16). "An ancient ballgame makes a comeback in Mexico" [Ni maèn bola kolot dikeja ramé lagi di Mèksiko]. NPR (dalem basa Inggris). Dipungut 2025-01-20.
- ↑ Fox (2012), hlm. 98.
- ↑ a b Popson (2003).
Daptar paranan
[permak | permak sumber]- Fox, John (2012). The ball: Discovering the object of the game [Bola: Jelujurin barang nyang maènan pada gableg] (dalem basa Inggris). New York: Harper. ISBN 9780061881794.
- Leyenaar, Ted (1978). Ulama, the perpetuation in Mexico of the pre-Spanish ball game Ullamaliztli [Ulama, Mèksiko punya kelajengan maèn bola Ullamaliztli deri jaman sebelon Spanyol] (dalem basa Inggris). Leiden.
- Popson, Colleen P. (2003). "Extreme Sport". Archaeology. 56 (4): 42–48.