Talè Naèk Haji
Talè Naèk Haji (nyang dikenal juga sebutan Butalè Haji, Talè Nèk Jèi, Talè Joi, atawa Talè Berangkat Haji) entu tradisi seni ngomong punyanya orang Kabupaten Kerinci ama Kota Sungai Penuh, Provinsi Jambi, Indonésia. Tradisi enih udah dilakonin turun-temurun dari jaman dulu ampè sekarang, utamanya pas lagi pegelaran pelepasan calon jemaah haji nyang mau berangkat ke Tanah Suci Mekkah.[1]
Talè Naèk Haji enih udah masup jadi salah atu Warisan Budaya Takbenda deri Jambi bebarengan ama daftar resminya di Kementerian Pendidikan Dasar dan Menengah Republik Indonesia nyang nomor registernya 362/M/2019.[2]
Etimologi èn Asal-Usulnya
[permak | permak sumber]Istilah kata "Talè" punya beberapa arti kalo diliat deri asal-usul katanya:
- Dari basa Sanskerta tala nyang artinya ukuran bunyi atawa segala hal nyang ada urusannya ama bebunyian nyang ada iramanya.
- Dari basa Arab tahlil, entu nyang artinya pernyataan orang Islam kalo kagak ada Tuhan selaèn Allah nyang dibacanya Lailahaillallah. Orang nyang lagi tahlilan (baca tahlil) seringan bawainnya pakè irama kaya orang nyanyi, nah dari situ deh istilahnye berubah jadi Tale nyang artinye lagu.
Munculnye tradisi Talè emang rapet banget kaitannye ama masuk ama berkembangnya agama Islam di Kerinci. Hal ini makin kuat lantaran ada selipan kata "hu ala" atawa "alaahu ala" (nyang asalnya dari kata Hu Allah ama Allahu Ta'ala) di dalem bait-bait pantunnye. Ini ngebuktiin kalo seni budaya enih emang dipake jadi alat buat nyebarin agama Islam ke masyarakat Kerinci.[3]