Stapsiun Cikarang

Stapsiun Cikarang (CKR) (Arab gundul: ستفسيون چيكارڠ) nya'entu stapsiun sepur golongan B gedé nyang ngejogrog di kerurahan Karangasih, Cikarang Lor, Bekasih . Enni stapsiun ngejogrog di tempat nyang lebi tinggi +18 mèter deri laot, ama diopènin masup Area Operasional Jakarta I èn KAI Commuter . Enni stapsiun entu salah atu deri mpat stapsiun sepur nyang ada di Bekasih Kabupatèn sebelonan enni galur dikasihin lèstrik ampé Bekasi ke Cikarang di taon 2014 èn ongkoh tempat mulain bakal galur sepur perkotaan Jabodètabèk bakal ngeladènin sepur antarkota ampé macem-macem kota laènnya di Pulo Jawa.

Riwayat

Stapsiun Cikarang entu mulanya dibuka ama Bataviasche Oosterspoorweg Maatschappij (BOS) tanggal 14 Agustus 1890, èn jadi stapsiun nyang penting bakal ngebuka galur sepur deri Batawi ampé ke Kerawang. Entu wayah mah, entu gedong masing tibang halte nyang digero' Halte Tjikarang èn tibang gableg dua jalan kerèta di latarnya. Abis semua jala jalanan sepur BOS dicaplok ama Staatsspoorwegen, sekitaran taon 1920-an, jalan sepurah nambah jadi mpat biji. Enni tambahan tuh bikin sepur bumel bisa bakal naèk èn neba penumpang ama barang di Halte Tjikarang. Enni kegiatan bikin tempat di segutekan enni stapsiun jadi ramé, kiatan ama adanya pasar, tangsi, terminal andong, ama lokalisasi di sono. ^[1]

Nurutin jaman, entu halte mingkin nambah pungsinya dengen ditambahin lagi atu jalan sepur husus di belakang entu gedong halte. Enni jalur sepur ditanjain jadi jalur "badug", dihususin bakal bongkar muat barang-barang bangsa beras, daon jati, kayu, garem, èn angkutan binatang angonan. Enni bongkar muat tuh sedeng ramé-raménya di taon 1970an ampé 1980an. Hususon angkutan binatang angonan dia masing ada bangsa ampé taon 2001/2002 mah.

Di awal 1990an mula, Departemèn Transportasi gableg rencana bakal ngebikin jala-jala jalanan sepur lingker luar Jabotabèk nyang ngubungin enni stapsiun ama Stapsiun Parung Panjang, Stapsiun Citayem, èn Stapsiun Sungé Lagoa . Salah atu maksudnya entu bakal ngurangin sepur barang nyang numpang liwat daérah perkotaan Jakarta. Mulanya tuh, entu rencana bisa jalan beneran dengen kelarnya galur sepur bagéan Citayem ke Nambo, cuman krisis keuangan Asia 1997 bikin enni rencana bantut. ^[2]

Gedong èn lokalan

Stapsiun Cikarang enni ngejogrog di bewètanan Kali Cikarang, èn adanya di lebah belakang Pasar Lama. Di deket situ ongkoh ada Tepékong (Pecinan) èn Kaum (Kauman). Bangsa berapa ratus mèteran lebah wètan-ilir deri enni stasiun entu udah lama digero' sebagé Tangsi. Alatan entu, dah, enni stapsiun téh gableg kegunaan nyang penting bakal megarin daérah Cikarang deri jaman dulu.

Lantaran proyèk galur sepur dobel antara enni stapsiun ama Stapsiun Manggarai bikin entu gedong stapsiun diréhab gedé-gedéan mulain taon 2014. Mulanya nyang kena diréhab entu nyang bakal nerap-nerap jala lèstrik galur Stapsiun Bekasih ampé ke Cikarang, terus nambahin gedongan anyar di lebah kidul, ama nambahin empat galur sepur anyar di lebah kidul hususon bakal Galur Sepur Lèstrik (Basa Indonésia: Kereta Rel Listrik; KRL). Terus ongkoh, dikeja' dah sasak baru bakal dua galur nyang atunya lagih di atas kali, dikeja berèndèng ama sasak lama. Enni réhab awalan terus baè digawéin tengah taon 2017 èn baru dah diresmiin tanggal 17 Sèptember 2017, bareng ama perpanjangan jala-jala KRL Commuter Line . Galur KRL nyang dikeja mingkinan ngablak deri Stapsiun Kota Jakarta ke Cikarang bikin tiga biji stapsiun anyar dikeja lagi ongkoh bakal ngeladènin penumpang komuter, nya'entu Stapsiun Mètlèn Telagamurni, Cibitung, ama Bekasi Wètan .

Abis entu bekidul kelar, mulain Juni 2020 ampé Juli 2021, digawéin lagi be'elorah entu Stapsiun Cikarang maké ngebongkar dulu empat galur lama bentaran mah. Lantaran enni bongkaran, galur sepur semua-muah dibilukin ke galur nyang belah kidul semuanya. Enni bongkaran sementara tuh maksudah mah bagèn gampil bakal ngerejain ngelegain pèron, nyang bikin sepur jarak jauh (KAJJ) bisa bakal neba di enni stapsiun. ^[3] Lagi bè, di ujung wètan enni stapsiun gè' ada halaman kandang bakal nyimpen rèntètan sepur KRL.

Keitung deri mulain 23 Agustus 2021, empat galur nyang lama udah bisa dipaké lagi, jadinya kalu dijumblah-jamblèh galur sepur di enni stapsiun entu udah nambah jadi delapan galur dengen perobahan nomer galur lama 1-4 nyang dituker jadi galur 5-8.

Mulain Désember 2021, sistim sinyalan lèstrik lama udah diganti ama nyang baru nyang dikeja ama PT Len Industri . ^[4]

Ongkoh mulain 19 Januari 2022, lebah elor enni stapsiun udah bisa pol-polan dipaké. Deri wayah entu, dah, sepur Walahar Èksprès ama Jatiluhur Èksprès dipindahin ke galur 5. Terus, mulain 1 Februari 2022, enni stapsiun mulain ngeladènin penumpang sepur antar kota.

Lantaran perobahan lokalan Stapsiun Manggarai, jadinya mulain 28 Mèi 2022, Stapsiun Cikarang sekarang ngeladènin jalur balon Cikarang- Tenabang - Angké - Kampung Bandan -Cikarang ( Lintas Lingker Cikarang ).

Gambaran

Stapsiun Cikarang dipoto deri bekulon galur 2 lama taun 2010
Pemasangan tiang beton untuk elektrifikasi di Stasiun Cikarang pada April 2014
Tiang beton diterap bakal ngelèstrikin sepur di Stapsiun Cikarang bulan April 2014
Bewètan Stapsiun Cikarang, nyang dikeja cakepin lagi bulan Mei 2021.
Papan unjukan Stapsiun Cikarang lagi bulan Maret 2023.
Lebah kulon galur 3 & 4 Stapsiun Cikarang, 14 Juni 2025

Ruju'an

↑ Staatsspoorwegen (1921–1932). Verslag der Staatsspoor-en-Tramwegen in Nederlandsch-Indië 1921-1932. Batavia: Burgerlijke Openbare Werken.{{cite book}}: CS1 maint: date format (link)
↑ "Sejarah dan Drama di Balik Pengoperasian KRL Jalur Nambo". Kaori Nusantara. 4 April 2015. Dipungut 6 Agustus 2017.
↑ "Revitalisasi Stasiun Bekasi Ditargetkan Selesai Akhir 2021". Republika Online (dalem basa Indonésia). 2021-04-18. Dipungut 2021-08-27. Selain Stasiun Bekasi, Kemenhub melalui Ditjen Perkeretaapian juga tengah merevitalisasi Stasiun Manggarai, Jatinegara dan Cikarang.
↑ Dwi, Setiady (2021-12-21). "Sering Gangguan, Sistem Persinyalan KA Lintas Cikampek Diperbarui - Suara Merdeka". Sering Gangguan, Sistem Persinyalan KA Lintas Cikampek Diperbarui - Suara Merdeka (dalem basa Indonésia). Dipungut 2022-07-23.

Paranan

(Indonesia) Situs resmi KAI dan jadwal kereta api
(Indonesia) Jadwal KRL Commuter Line
(Indonesia) Jadwal Commuter Line Jatiluhur dan Walahar tahun 2023

[verslag-1] Staatsspoorwegen (1921–1932). Verslag der Staatsspoor-en-Tramwegen in Nederlandsch-Indië 1921-1932. Batavia: Burgerlijke Openbare Werken.{{cite book}}: CS1 maint: date format (link)

[2] "Sejarah dan Drama di Balik Pengoperasian KRL Jalur Nambo". Kaori Nusantara. 4 April 2015. Dipungut 6 Agustus 2017.

[3] "Revitalisasi Stasiun Bekasi Ditargetkan Selesai Akhir 2021". Republika Online (dalem basa Indonésia). 2021-04-18. Dipungut 2021-08-27. Selain Stasiun Bekasi, Kemenhub melalui Ditjen Perkeretaapian juga tengah merevitalisasi Stasiun Manggarai, Jatinegara dan Cikarang.

[4] Dwi, Setiady (2021-12-21). "Sering Gangguan, Sistem Persinyalan KA Lintas Cikampek Diperbarui - Suara Merdeka". Sering Gangguan, Sistem Persinyalan KA Lintas Cikampek Diperbarui - Suara Merdeka (dalem basa Indonésia). Dipungut 2022-07-23.

[1]

[2]

[3]

[4]