Si Tjonat
| Si Tjonat | |
|---|---|
| Dalang | Nelson Wong |
| Juragan |
|
Diangkat deri | Tjerita Si Tjonat bikinan F.D.J. Pangemanann |
| Tukang lakon |
|
| Pabrik | Batavia Motion Picture |
| Tanggal jebrol |
|
| Negara | Hindia Welanda |
| Basa | Meneng |
Si Tjonat (éjaan baru: Si Conat) entu atu pèlem bandit jebrolan taon 1929 nyang kaya'nya, mah, uda ilang. Ni pèlem dibikin di Hindia Welanda (karang Indonésia) ama dia punya dalang Nelson Wong, serènta dia punya juragan si Nelson Wong kendiri ama Jo Eng Sek. Ni pèlem meneng digubah deri ceritera dia punya roman bikinan F.D.J. Pangemanann, pekara atu anak lanang pribumi nama Conat nyang abis ngebunu orang sekampungnya, kabur ke Betawi (karang Jakarta), terus jadi bandit. Kapan si Conat nyulik anak wadon Tionghoa, abis kèok, dah, tu dia dibekuk, terus diadilin.
Ni pèlem Si Tjonat dibikin bakal didagangin ke penongton kaum Tionghoa. Pèlemnya kendiri dapet tanggepan beragem; dia punya jumblah karcis nyang kejual juga' au', dah, segimana banyak. Biar kata sanonya mao dibikin jadi rèrodan, ni pèlem kaga' lajengannya, bahna dia punya pabrik nama Batavia Motion Picture keburu gulung tiker deluan. Entakanuh, pèlem dengen janrah begini mulain banyak dijebrolin, kaya' misal pèlem Si Pitoeng, nyang maké lagi Si Tjonat punya dalang ama setèr.
Jalan ceritera
[permak | permak sumber]Abis ngegulung dia punya temen kendiri, si Conat, orang muda Sunda, kabur ke Betawi, Hindia Welanda punya hopstad. Entakanuh, dia dapet gawéan ama atu orang Welanda kaga' berapa lama. Abis, Si Conat ngegarong dia punya banda ama ngegoda dia punya nyai. Si Conat terus mè'rad deri entu ruma bakal idup jadi bandit. Kapan ari, dia kepèngèn ngegèbèt Lie Gouw Nio (Ku Fung May), orang tani peranakan Tionghoa nama Lie A Tjip punya anak wadon. Lantaran si wadon kaga' sudi, abis ngamuk, dah, si Conat. Tu anak wadon diculik ama Si Conat; untung, dia punya tunangan nama Thio Sing Sang (Herman Sim) dateng nulungin, abis ngebikin kèok si Conat paké dia punya jurus.[1]
Pembikinan
[permak | permak sumber]
Si Tjonat didalangin ama Nelson Wong, nyang juga' jadi juragan entu pèlem bareng ama dia punya rekan dagang Jo Eng Sek. Ni orang dua bikin pabrik pèlem nama Batavia Motion Picture taon 1929.[2] Sebelonnya, Wong uda tau ngedalangin pèlem bikin-bikinan atu: Lily van Java taon 1928. Cumannya, entu pèlem kaga' balik modal, biar uda diongkosin ama General Motors punya pegawé pangkat tinggi di Betawi nama David Wong.[a][3] Jo Eng Sek, si tukang toko, malah belon tau acan jadi juragan pèlem.[4]
Pèlem Si Tjonat punya cerita digubah deri roman Tjerita Si Tjonat, tulisan tukang berita F.D.J. Pangemanann nyang jebrol pertama kali taon 1900.[5] Ga' taunya, ni roman jadi bekèn di kalangan pembaca kaum Tionghoa pada.[4] Hata, sangking kebekènnya, entu cerita biasa dibawa'in di penongtonan lenong ama orang Betawi pada.[b][5] Mangkanya, ni cerita dipili ama Jo Eng Sek bakal diangkat jadi pèlem.[6] Ada berapa perobahan nyang dimasupin ke dia punya cerita. Misalnya, kalo di roman Lie A Tjip entu orang tani kéré, di pèlem dia jadi orang bepunya. Ni perobahan punya lantaran, si Lie Gouw Nio juga' kaga' digambarin jadi anak wadon Tionghoa kebelangsak, tapi lebi kaya' "anak wadon modèren nyang bepakéan rok, sepatu, kaos kaki, ama rambut dibikin bob".[c][7]
Ni pèlem meneng punya gambar direkemnya item puti, serènta disetèrin tukang lakon Ku Fung May ama Herman Sim.[8] Sim, si orang Tionghoa peranakan, uda tau maèn pèlem di Shanghai,[9] tapi Ku Fung May, mah, belon tau maèn pèlem barang sebiji. Jurus-jurus maèn pukulan di ni pèlem kesawaban ama Holiwud punya janrah Kulonan, nyang lagito kesohor di tanah Hindia.[6]
Penjebrolan ama tanggepan
[permak | permak sumber]Si Tjonat jebrol taon 1929. Biar cuming bikin-bikinan, ni pèlem digembar-gemborin kaya' nyang diangkat deri cerita beneran aja.[8] Gembar-gembor begini, mah, èmang uda biasa dilakonin ama tukang cerita sastra Melayu di awal abad ke-20, mangkanya Tjerita Si Tjonat juga' gitu.[10] Ni pèlem jadi atu deri ngebadeg pèlem bikinan setempat nyang digacoin bakal penongton kaum Tionghoa, ngrikut pèlem Lily van Java ama Setangan Berloemoer Darah (dua-duanya jebrol taon 1928). Taunya deri mana, kalo kata tukang ngaji sejarah pèlem nama Misbach Yusa Biran, mah, bisa diliat deri dia punya juragan ama tukang lakon nyang banyakan Tionghoa semua.[d] Biar gitu, nyang pribumi juga' masing nimbrung nongtonin, bahna pada kepèngèn ngeliat dia punya aksi maèn pukulan.[4] Tukang nanggepin pèlem nama Salim Said ada nulis kalo ni pèlem punya tujuan entu murni buat dagang doang, cuman biar anu bolé untung.[11]
Ni pèlem punya jumblah jualan karcis kaga' ditauin puguhnya berapa. Kalo ngrikut Pa' Said punya omong, sih, ni pèlem entu moncèr jualannya.[12] Cuman, nih, ya, Pa' Biran juga' ada bilang kalo tu pabrik pèlem Batavia Motion Picture gulung tiker ga' lama abisnya Si Tjonat jebrol; naga-naganya, mah, dia punya punci kaga' balik.[9] Tanggepan bakal ni pèlem juga' pada beragem. Lumbrah pemberita pada nyang kaga' sreg ama ni pèlem punya penekenan bakal bunu-bunuan ama jaat-jaatan. Laèn lagi di majalah Panorama, Kwee Tek Hoay ada nulis kalo ni pèlem punya bikinan lumayan juga',[4] apalagi kalo ngeliat si Sim punya pemaènan ama keboléan maèn pukulan.[9] Kwee nandesin kalo ni pèlem punya sala-sala dikit kaga' nyawabin dia punya mutu.[7]
Buntut
[permak | permak sumber]Biar Si Tjonat sanonya mao dibikin rèrodan, jilid kedua belon sempet nongtot bahna dia punya pabrik Batavia Motion Picture keburu gulung tiker.[12] Jo Eng Sek kaga' bikin-bikin pèlem lagi, ampé dia balik taon 1935 bakal jadi juragan pèlem Poei Sie Giok Pa Loei Tay.[13] Sedeng si Wong getep terus di jagat pèlem-pèleman, bareng dia punya sudara nama Joshua ama Othniel. Ama pabrik Halimoen Film, dia pada ngajak si Sim balik ngebintangin pèlem Si Pitoeng nyang jebrol taon 1931.[14] Ku Fung May kaga' maèn-maèn pèlem lagi.[15] Abis ni pèlem Si Tjonat jebrol, pèlem bandit pada nimbrung nongtot juga', kaya' misal Si Ronda (1930) arahan Lie Tek Swie, serènta Rampok Preanger (1929) ama Si Pitoeng (1931) bikinan Wong besudara.[16]
Roman-romannya, sih, ni pèlem Si Tjonat entu pèlem ilang. Tukang ngaji èlmu manusia pasal deleng-delengan nama Karl G. Heider ada nulis kalo semua-mua pèlem di Indonésia sebelon taon 1950 uda pada ilang.[17] Biar begitu, J.B. Kristanto punya Katalog Film Indonesia (Dedaptaran Pèlem Indonésia) ada nyatet barang berapa biji pèlem deri entu témpo nyang masing ketemu di Sinematek Indonesia punya arsip. Pa' Biran juga' bilang kalo barang berapa pèlem gembar-gembor Jepang masing ada nyang kesimpen di Netherlands Government Information Service.[18]
Catetan
[permak | permak sumber]- ↑ Kaga' juntrungannya ama Nelson Wong.
- ↑ Hata ampé abis jaman normal, kapan Indonésia baru merdéka taon 1945, ni cerita masing aja nyohor (Toer 1982, hlm. 28–29).
- ↑ Aselinya: "... gadis modern jang berpakean rok, spatoe, kous, dan ramboet di-bob."
- ↑ Entu témpo, kaum Tionghoa ama kaum pribumi pada kaga' nyampur bahna dia punya laèn wèt ama budaya. Gupernemèn penjajah Welanda, tuh, pada nerepin belèd nyang ngebelèk Hindia punya warga jadi tiga trap, nyang Tionghoa jadi penenga di antéro Welanda nyang jadi orang gedéan ama pribumi nyang jadi orang kecitan. Deri dia punya budaya, orang Tionghoa peranakan entu témpo masing banyak nyang nulad ke Tiongkok daratan, tibang ke budaya orang Sunda atawa orang Jawa. Biar kata orang Tionghoa punya jumblah di Hindia entu rada kecitan, dia pada masing bisa dapet trap idup nyang baè'an tibang banyakan orang pribumi (Sukma 1999, hlm. 171–172).
Ruju'an
[permak | permak sumber]- ↑ Filmindonesia.or.id, Si Tjonat; Said 1982, hlm. 18; Sen 2006, hlm. 123
- ↑ Filmindonesia.or.id, Si Tjonat; Biran 2009, hlm. 234; Said 1982, hlm. 17
- ↑ Biran 2009, hlm. 82.
- ↑ a b c d Biran 2009, hlm. 93.
- ↑ a b Toer 1982, hlm. 28–29.
- ↑ a b Sen 2006, hlm. 123.
- ↑ a b Kwee, 1930, hlm. 10.
- ↑ a b Filmindonesia.or.id, Si Tjonat.
- ↑ a b c Biran 2009, hlm. 94.
- ↑ Kwee, 1930, hlm. 9.
- ↑ Said 1982, hlm. 18.
- ↑ a b Said 1982, hlm. 19.
- ↑ Biran 2009, hlm. 94, 152.
- ↑ Biran 2009, hlm. 113–114.
- ↑ Filmindonesia.or.id, Ku Fung May.
- ↑ Biran 2009, hlm. 105, 113.
- ↑ Heider 1991, hlm. 14.
- ↑ Biran 2009, hlm. 351.
Sumber
[permak | permak sumber]- Biran, Misbach Yusa (2009). Sejarah film 1900–1950: Bikin film di Jawa [Sejarah pèlem 1900–1950: Bikin pèlem di Jawa] (dalem basa Indonésia). Jakarta: Komunitas Bambu, Dewan Kesenian Jakarta. ISBN 978-979-3731-58-2.
- Heider, Karl G (1991). Indonesian cinema: National culture on screen [Pèlem-pèleman Indonésia: Budaya sional di pelampangan] (dalem basa Inggris). Honolulu: University of Hawaii Press. ISBN 978-0-8248-1367-3.
- "Ku Fung May". filmindonesia.or.id. Jakarta: Konfiden Foundation. Diarsipin deri nyang asli tanggal 7 March 2016. Dipungut 9 June 2013.
- Kwee, Tek Hoay (20 May 1930). "Film Si Tjonat: Kaloearan pertama dari Batavia Motion Picture Company" [Si Conat: Jebrolan pertama deri Batavia Motion Picture Company]. Panorama (dalem basa Melayu). 4 (173): 9–11. (dipungut deri comotan di Sinematek Indonesia)
- Said, Salim (1982). Profil dunia film Indonesia [Riwayat idup anak jagat pèlem Indonésia] (dalem basa Indonésia). Jakarta: Grafiti Pers. OCLC 9507803.
- Sen, Kreshna (2006). "'Chinese' Indonesians in national cinema" [Orang Indonésia 'Tionghoa' di perpèleman sional]. Di Sun, Wanning (prm.). Media and the Chinese diaspora [Pasal wasilah serènta orang mijah Tionghoa] (dalem basa Inggris). New York: Routledge. h. 119–136. ISBN 978-1-134-26359-2.
- "Si Tjonat". filmindonesia.or.id. Jakarta: Konfiden Foundation. Diarsipin deri nyang asli tanggal 2 December 2013. Dipungut 21 July 2012.
- Sukma, Rizal (1999). Indonesia and China: The politics of a troubled relationship [Indonésia ama Tiongkok: Pulitik juntrungan keruwet] (dalem basa Inggris). New York: Routledge. ISBN 978-0-203-16535-5.
- Toer, Pramoedya Ananta, prm. (1982). Tempo doeloe: Antologi sastra pra-Indonesia [Témpo dulu: Kumpulan sastra sebelon Indonésia] (dalem basa Indonésia). Jakarta: Hasta Mitra. OCLC 9797224.