Loncat ke isi

Si Ronda

Deri Wikipédi, ènsiklopédi perdèo
Si Ronda
DalangLie Tek Swie
JuraganTan Khoen Yauw
Tukang lakon
Tukang atur gambarA Loepias
Pabrik
Tanggal jebrol
  • 1930 (1930) (Hindia Welanda)
NegaraHindia Welanda
BasaMeneng

Si Ronda entu atu pèlem meneng deri Hindia Welanda, nyang dia punya dalang nama Lie Tek Swie ama dia punya setèr nama Bachtiar Effendi. Ni pèlem diangkat deri anak Betawi punya terdisi lisan entu témpo, nyang nyeritain atu bandit jago silat punya aksi, nama si Ronda. Di pèrsi lènong deri ni cerita, si Ronda suka' digambarin jadi semacem Robinhud, kapan ngegarong banda orang gedéan bakal dikasiin ke orang kecilan. Ni pèlem jebrol serèndèngan ama pèlem maèn pukulan nyang pada naèk daon wayah taon 1929 ampé 1931. Cuming, ya, Si Ronda kaga' santer diwartain kapan dia jebrol. Ni pèlem aselinya, sih, kaya'nya, mah, uda ilang. Pèrsi pèlem anyar nyang ngangkat ni cerita, Si Ronda Macan Betawi, dibikin taon 1978.

Ceritera

[permak | permak sumber]

Si Ronda diangkat deri lènong cara Betawi punya cerita, nyang mao di kalangan kaum pribumi, kè', kaum Tionghoa, kè', ni cerita entu témpo èmang lagi nyohor-nyohornya. Si Ronda punya cerita ngrikutin si empunya nama, garong Betawi jago maèn silat nyang kebekèn suka' nyolong banda deri nyang bepunya bakal dikasiin ke nyang butu.[1] Tukang ngaji pèlem Indonésia nama Misbach Yusa Biran bilang kalo si Ronda punya cerita dipili bakal diangkat jadi pèrsi pèlem lantaran dia punya keboléan unjuk-unjukan maèn pukulan. Pèlem-pèleman entu témpo, sih, èmang pating kesawaban ama bikin-bikinan pèlem Amrik nyang suka' masupin aksi bengkelai, hata penongton nyang di Hindia juga' pada doyan.[2]

Laèn cerita nyang setumbras ama si Ronda entu tuladnya cerita si Jampang ama si Pitung.[3] Ni lènong-lènongan pada punya cerita seputer orang kerèn nyang digero' "jago", nyang biar kata idup kaga' diatur wèt, masing mao adu jaban bakal nulungin orang kecilan.[4] Ni janrah cerita ngebadeg diangkat jadi pèlem bandit, nyang mulain tenar kapan pèlem Si Tjonat dijebrolin ama pabrik Batavia Motion Picture taon 1929. Abis ni jebrolan, nongtot, dah, tuh, Wong besudara punya bikinan Rampok Preanger (juga' taon 1929), ama pèrsi pèlem deri cerita si Pitung taon 1931.[5] Pèlem janrah beginian ada kali' jumblahnya ampé seperapat deri pèlem Hindia nyang jebrol deri taon 1929 ampé 1931. Biar gitu, ga' semuanya ngegambarin si jago jadi orang nyang punya niat baèk bakal nulungin orang kecit. Wong besudara punya pèrsi Si Pitung, misalnya, ngegambarin si empunya nama jadi garong kacangan nyang kaga' romannya bakal ngasiin orang kecit kaya' Robinhud.[6]

Pembikinan

[permak | permak sumber]

Si Ronda dibikin ama dalang Lie Tek Swie ama juragan Tan Khoen Yauw deri pabrik Tan's Film.[7] Ni orang dua sebelonnya uda tau gawé bareng bakal ngebikin tu pabrik punya pèlem bekèn Njai Dasima taon 1929.[8] Gambar sènter di ni pèlem diatur ama A. Loepias. Ni pèlem direkem item puti,[7] juga' kaga' ngomongnya acan. Si Ronda punya setèr nama Bachtiar Effendi entu aselinya, mah, tukang atur pelampang pèlem di Tan punya pabrik; ni pèlem jadi kali pertama dia mampang jadi setèr.[9] Selaèn si setèr, ni pèlem juga' masupin atu tukang lakon nama Momo, nyang uda tau mampang di pèlem Njai Dasima.[10]

Penjebrolan ama tanggepan

[permak | permak sumber]
Bachtiar Effendi, nyang maèn di Si Ronda jadi si empunya nama

Si Ronda nongtot taon 1930;[11] kalo ngrikut si Effendi punya omongan, mah, ni pèlem jebrol sebelonnya Tan punya pèlem Nancy Bikin Pembalesan (kelajengan deri pèlem Njai Dasima) mampang di bios bulan Méi 1930.[12] Koran Belanda ada nyatet kalo ni pèlem sempet mampang juga' Médan, Sumatra Lor, taon 1932.[13] Biar gitu, Pa' Biran bilang kalo ni pèlem benernya ga' gitu santer diwartain; hata Sinematek Indonesia punya arsip aja kaga' gableg comotan warta koran pasal Si Ronda.[12]

Buntut

[permak | permak sumber]

Abis si Si Ronda, Lie ama Tan masing kereja bareng di tiga biji pèlem lagi.[14] Lie mè'rad deri Tan punya pabrik taon 1932; naga-naganya, sih, lantaran dia punya cara ngarahin pèlem uda kaga' cocok lagi ama Tan punya pasar bakal orang kecilan nyang kaga' duit. Hata, saban pèlem nyang dia dalangin suka' keliwat gedé punya ongkos.[15] Si Effendi kendiri masing ajeg gawé ama Tan punya pabrik ampé taon 1932, kapan dia mingsèr bakal jadi bangkot di majala pèlem-pèleman Doenia Film.[9] Sedeng si Momo terus getep maèn pèlem ampé taon 1941; cuman, biar kata tadinya ama Tan punya pabrik, belakangannya dia maèn ama pabrik Standard Film.[10]

Lantaran uda kaga' ditauin lagi juntrungnya ke mana, ni pèlem bisa dibilang pèlem ilang, dah, tuh. Hata, tukang ngaji èlmu manusia pasal deleng-delengan nama Karl G. Heider ada nulis kalo semua-mua pèlem di Indonésia sebelon taon 1950 uda pada ilang.[16] Biar gitu, tukang nanggepin pèlem J.B. Kristanto ada nyatet di dia punya Katalog Film Indonesia (Dedaptaran Pèlem Indonésia) barang berapa biji pèlem deri entu témpo nyang masing ketemu di Sinematek Indonesia punya arsip.[17]

Atu lagi pèlem nyang ngangkat si Ronda punya cerita dengen judul Si Ronda Macan Betawi jebrol taon 1978.[11] Ni pèrsi punya bikinan dalang nama Fritz G. Schadt mampangin Dicky Zulkarnaen bakal maèn jadi si Ronda, ama Lenny Marlina bakal jadi dia punya demenan. Di ni pèrsi atu, si Ronda maké dia punya silat bakal ngejabanin entu tuan tana bangsat ama penjajah punya amtenar.[18]

Ruju'an

[permak | permak sumber]
  1. ↑ Filmindonesia.or.id, Si Ronda; Biran 2009, hlm. 104–05; van Till 1996, hlm. 470
  2. ↑ Biran 2009, hlm. 108; Sen 1995, hlm. 15
  3. ↑ JCG, Ronda, Si.
  4. ↑ Gouda 1999, hlm. 169.
  5. ↑ Sen 1995, hlm. 15; Biran 2009, hlm. 105, 111, 113
  6. ↑ Biran 2009, hlm. 379–80; van Till 1996, hlm. 461–68
  7. ↑ a b Filmindonesia.or.id, Kredit Si Ronda.
  8. ↑ Biran 2009, hlm. 99–100.
  9. ↑ a b Said 1982, hlm. 138.
  10. ↑ a b Filmindonesia.or.id, Momo.
  11. ↑ a b Filmindonesia.or.id, Si Ronda.
  12. ↑ a b Biran 2009, hlm. 104–05.
  13. ↑ De Sumatra Post 1932, Kunst en Vermakelijkheden.
  14. ↑ Said 1982, hlm. 142–43.
  15. ↑ Biran 2009, hlm. 111.
  16. ↑ Heider 1991, hlm. 14.
  17. ↑ Biran 2009, hlm. 351.
  18. ↑ Filmindonesia.or.id, Si Ronda Macan Betawi.

Sumber

[permak | permak sumber]
  • Biran, Misbach Yusa (2009). Sejarah film 1900–1950: Bikin film di Jawa [Sejarah pèlem 1900–1950: Bikin pèlem di Jawa] (dalem basa Indonésia). Jakarta: Komunitas Bamboo working with the Jakarta Art Council. ISBN 978-979-3731-58-2.
  • Gouda, Frances (1999). "Gender and 'hyper-masculinity' as post-colonial modernity during Indonesia's struggle for independence, 1945 to 1949" [Perjenisan ama 'kelanangan keliwatan' sebagé kemodèrenan abis penjajahan kapan Indonésia bejoang bakal merdéka, 1945 ampé 1949]. Di Burton, Antoinette (prm.). Gender, sexuality and colonial modernities [Jenis kelamin, seksualitas, ama kemodèrenan penjajahan] (dalem basa Inggris). London: Routledge. h. 163–76. ISBN 978-0-203-98449-9.
  • Heider, Karl G. (1991). Indonesian cinema: National culture on screen [Pèlem-pèleman Indonésia: Budaya sional di pelampangan] (dalem basa Inggris). Honolulu: University of Hawaii Press. ISBN 978-0-8248-1367-3.
  • "Kredit Si Ronda" [Pengakuan bakal Si Ronda]. filmindonesia.or.id (dalem basa Indonésia). Jakarta: Konfiden Foundation. Diarsipin deri nyang asli tanggal 15 Désèmber 2013. Dipungut 28 April 2013.
  • "Kunst en vermakelijkheden" [Seni ama seneng-senengan]. De Sumatra Post (dalem basa Welanda). Medan: J. Hallermann. 7 January 1932. h. 5. Diarsipin deri nyang asli tanggal 3 July 2013. Dipungut 28 April 2013.
  • "Momo". filmindonesia.or.id (dalem basa Indonésia). Jakarta: Konfiden Foundation. Diarsipin deri nyang asli tanggal 6 Maret 2016. Dipungut 28 April 2013.
  • "Ronda, Si". Encyclopedia of Jakarta (dalem basa Indonésia). Guwernemèn Daéra Jakarta. Diarsipin deri nyang asli tanggal 7 Januari 2013. Dipungut 28 April 2013.
  • Said, Salim (1982). Profil dunia film Indonesia [Riwayat idup anak jagat pèlem Indonésia] (dalem basa Indonésia). Jakarta: Grafiti Pers. OCLC 9507803.
  • Sen, Krishna (1995). Indonesian cinema: Framing the New Order [Pèlem-pèleman Indonésia: Ngèkèrin Orde Baru] (dalem basa Inggris). London: Zed Books. ISBN 978-1-85649-123-5.
  • "Si Ronda". filmindonesia.or.id (dalem basa Indonésia). Jakarta: Konfiden Foundation. Diarsipin deri nyang asli tanggal 2 Désèmber 2013. Dipungut 22 Juli 2012.
  • "Si Ronda Macan Betawi". filmindonesia.or.id (dalem basa Indonésia). Jakarta: Konfiden Foundation. Diarsipin deri nyang asli tanggal 15 December 2013. Dipungut 28 April 2013.
  • van Till, Margreet (1996). "In search of si Pitung: The history of an Indonesian legend" [Kapan nyari si Pitung: Sejarah deri atu Indonésia punya cerita]. Bijdragen tot de Taal-, Land- en Volkenkunde (dalem basa Inggris). 152 (3): 461–482. doi:10.1163/22134379-90003007. ISSN 0006-2294. JSTOR 27864777. OCLC 770588866.

Sènggètan luar

[permak | permak sumber]
Didapetin deri https://bew.wikipedia.org/w/index.php?title=Si_Ronda&oldid=30359