Si Doel Anak Sekolahan

Si Doel Anak Sekolahan entu sinetron Indonesia nyang diproduserin, ditulis, ama disutradarain ama Rano Karno nyang juga ngikut ngelakon sebage Doel/Kasdullah. Sinetron eni punya jalan cerita tentang idupnya Doel ama dia punya keluarga, keluarga Betawi nyang tetep mertahanin nilai-nilai Betawi walopun idup di tengah-tengah moderenisasi kota Jakarta wayah gini.^[1] Selain Rano, sinetron eni dilakonin juga ama Benyamin Sueb, Maudy Koesnaedi, Cornelia Agatha, Aminah Cendrakasih, Mandra, Suti Karno, en Basuki.

Ada 6 usum ama 139 episod nyang udah ditayangin. Ceritanya entu cerita versi wayah gini dari novel Si Doel Anak Betawi karya Aman Datuk Mojoindo ama pelem bejudul sama nyang disutradrain ama Sjumandjaja di taon 1972. Dalam versi entu, Rano Karno juga ngelakon jadi si Doel kecil ama Benyamin S. sebage babe Doel. Tapi waktu entu, nama babe Doel masih Asman, belon jadi Sabeni kayak versi sinetron.

Sejaoh eni, Si Doel Anak Sekolahan berhasil jadi sinetron Indonesia nyang paling sering nongtot di tipi. Waktu pertama nongtot, sinetron eni berhasil melejit jadi satu acara nyang paling kesohor ngalahin pelem-pelem asing nyang lagi rame di tipi Indonesia. Suksesnya sinetron Si Doel Anak Sekolahan jadiin Rano Karno ngembangin cerita lanjutannya dalam dua sinetron bejudul Si Doel Anak Gedongan ama Si Doel the Series, terusannya ada pilem tipi nyang bejudul Si Doel Anak Pinggiran ama tiga pelem bioskop yaentu Si Doel the Movie, Si Doel the Movie 2 ama Akhir Kisah Cinta Si Doel.

Ringkesan cerita

Kasdullah, biasa dipanggil Doel, entu anak muda asli Betawi nyang ngusahain ngejaga nilai-nilai luhur keluarganya di tengah kemajuan jaman ama kondisi perkembangan kota Jakarta wayah gini. Lantaran diminta nyak babenya, Doel bekuliah di perguruan tinggi swasta ngambil jurusan teknik mesin. Babenya, Sabeni, rela ngejualin tanah ama ngebatalin rencana pegi haji bareng bininya, Laila (Mak Nyak), bakal sekola si Doel setinggi-tingginya. Nyak babenya ngarepin biar Doel kaga’ ngikutin jejek babenya jadi tukang oplet. Di usum pertama, Doel ga’ sengaja kenalan ama Sarah, gadis blasteran Indonesia-Belanda, nyang belakangan Doel baru tau kalu dirinya ama keluarganya dijadiin objek penelitian skripsinya. Di akir umum diceritain kalu Doel ama Sarah udah lulus jadi sarjana.

Di usum kedua, abis lulus kuliah, Doel balik ngadepin sulitnya nyari kerja. Dia diterima di banyak perusahaan, tapi dilarang ama Sabeni lantaran tau Doel kudu kerja di luar Jakarta. Tapi, Doel kaga’ patah semangat, apalagi abis beteman ama Sarah, nyang karang diceritain demen ama si Doel. Di sisi lain, Doel dah ketemu ama Zainab, temen pas kecilnya nyang diceritain bakalan dijodohin ama si Doel deri kecil. Di pengujung usum eni, Sarah ngajakin Doel ama keluarganya liburan ke Anyer.

Di usum ketiga, Sabeni meninggal lantaran kecelakaan pas balik deri Anyer. Beban idup Doel jadi nambah, apalagi dia masin belon ada gawean. Selain entu, hubungan Doel ama Sarah en Zainab juga makin ada konflik di antara mereka betiga. Ampir di akir usum, Doel akirnya dapet gawean nyang dipengenin tapi ada masalah baru. Doel kudu rela pegi ke luar negeri, Perancis ama Swiss, buat pelajarin sistem mesin nyang baru. Lantaran semangat ama kasih sayang Sarah ama restu Mak Nyak, Doel akirnya jalanin tugas entu.

Di usum keempat, seabis balik deri luar negeri, Doel kudu nungguin penempatan kerja dari perusahaannya gawe. Sambil nungguin, dia balik jadi tukang oplet warisan babenya. Di sisi lain, hubungan Doel ama Sarah ngerenggang dikit, lantara Sarah kecewa ama Doel nyang diem-diem ngasih persi ke Zainab. Di akir episod, Doel pegi ke rumah Sarah pas ujan deres demi nganterin Sarah ke Bandara buat pegi ke Belanda lantaran babenya lagi dirawat di ICU en Doel pun janji bakalan setia nungguin Sarah balik.

Usum kelima ditandain ama meninggalnya Engkong Ali nyang nantinya bawa duka buat keluarga Doel. Selain entu, kabar nyenengin datang dari Atun nyang bentaran lagi bakal nikah ama Karyo. Terusannya, Doel akirnya dapet tugas dari kantornya, tapi kali eni dia kudu pegi ke Kalimantan buat waktu nyang lama bangat. Sarah nyang tulus demen ama Doel minta ijin buat dateng ke Kalimantan sambil minta Doel nikahin dia. Di episod terakir, Atun nikah ama Karyo, abis tu Doel ama Sarah pun pelukan.

Usum keenem ceritanya tentang Doel ama kehidupannya jadi orang kantoran. Penempatan di Kalimantan ditunda dulu dari kantornya. Di sisi lain, dia masih belon bisa milih antara Sarah apa Zainab. Zainab terusannya nikah ama laki-laki nyang namanya Hendri. Di episod terakir, Doel akirnya nikah ama Sarah.

Tukang lakon

Karakter utama

Rano Karno sebage Kasdullah, biasa dipanggil Doel. Mahasiswa teknik mesin nyang ngebantu nyak babenya narik oplet di waktu sengganngnya. Dia nantinya lulus dengen gelar Ir. (kang insinyur) dan gawe di perusahaan alat berat di Jakarta.
Benyamin Sueb sebage Sabeni atau sering dipanggil Babe. Babenya Doel nyang sebelonnya punya tanah luas di Jakarta nyang masih kosong, sampe akirnya dijual bakal biaya idup. Namun, dia masih nyimpen sebagian uang hasil jualin tanahnya bakal biaya kuliah Doel. Dia meninggal lantaran kecelakaan ama penyakit serangan jantung pas di perjalanan balik deri liburan di Anyer.
Aminah Cendrakasih sebage Laila, sering dipanggil Mpo’ Lela atau Ma’ Nya’. Bini Babe Sabeni, nya’nya Doel, dia punya warung kecil di rumahnya nyang dijalanin ama dirinya sendewek bareng anaknya, Atun. Seabis lakinya meninggal, dia ngegantungin idupnya dari oplet, usaha kost, gaji Doel sebage orang kantoran ama usaha warungnya.
Cornelia Agatha sebage Sarah van Heus. Bininya Doel, gadis blasteran Indonesia-Belanda. Mulanya dia entu mahasiswi nyang lagi nulis skripsi ama terusannya ngejadiin keluarga Doel sebage obyek penelitiannya. Belakangan dia demen ama Doel en bersaing ama Zainab nyang jadi temen masa kecil Doel. Dia nantinya nikah ama Doel di akir usum keenem.
Maudy Koesnaedi sebage Zainab. Temen pas kecilnya si Doel nyang pertama kali nongtot di usum kedua. Dia entu gadis sederhana. Naksir ama Doel padahal udah dijodohin nya’ babenya ama si Ahong, pengusaha keturunan Cina. Dia nantinya nikah ama Hendri di akir usum keenam.
Mandra sebage Mandra. Dia entu ade’ laki-lakinya Ma’ Nya’/Mpo’ Lela, ade’ ipar laki-laki Babe Sabeni, mamang deri pihak ibunya Doel. Dia laki-laki buta huruf en pengangguran nyang nantinya diminta ama Ma’ Nya’ buat ngelanjutin tugas mendiang lakinya sebage tukang oplet.
Suti Karno sebage Atun Zaitun. Ade’ cewe’ si Doel, pendidikan formalnya berenti lantaran masalah duit. Dia nantinya ngebantuin Ma’ Nya’ jualan di warung ama sempet ngebuka usaha salon di rumah.
Basuki sebage Karyo. Laki-laki asli Jawa, nyang begawe sebage tukang dagang baju batik keliling nyang ngontrak rumah punya Sabeni. Naksir ama si Atun. Sering dijulukin "Buluk" ama Sabeni en sering ribut juga ama Mandra. Namun belakangan dia ama Mandra saling ngebantu ngurusin mobil oplet peninggalan Sabeni.

Karakter pendukung

Pak Tile sebage Mochamad Ali atau biasa dipanggil Engkong Ali. Babe Ma’ Nya’ ama Mandra, babe mertua Babe Sabeni, engkong pihak ma’nya Doel ama Atun, nyang digambarin sebage orang kaya. Sepeninggal Sabeni, Engkong Ali nongtot jadi sosok babe angkat buat Doel ama Atun en sering ngebantuin dalam urusan duit. Tapi, hal eni ngebikin Mandra iri sebage anak kandungnya sendiri. Mandra bahkan sempet mikir kalu Engkong Ali pilih kasih en kaga’ sayang ama dia.
Nacih sebage Nya’ Rodiah atau biasa dipanggil Ma’ Tua ama Karyo. Bini deri Engkong Ali, ma’nya Ma’ Nya’ ama Mandra, ma’ mertua Babe Sabeni, nini pihak ma’nya Doel ama Atun. Waktu lakinya diceritain udah meninggal di usum keenam, Mandra nyoba ngebujuk Nya’ Rodiah buat ngebagiin bandanya nyang nantinya Mandra rencanain bakal ngebikin bisnis kontrakan.
Bendot sebage Pak Bendot. Babe mertua Karyo, meski Karyo udah beceré ama bininya, dia lebih milih ngikutin Karyo tinggal di Jakarta sebelon balik ke kampung halamannya.
Nunung sebage Nunung. Ade’ cewe’ Karyo nyang didemenin Mandra, walopun Karyo kaga’ demen ama kaga’ pengen Nunung jadi pasangan Mandra. Karyo sering nasihatin buat kaga’ ketemu atawa ngobrol ama Mandra.^[2]
Tubagus Maulana Husni sebage Encang Rohim. Babe Zainab, mamang pihak ma’nya Doel & Atun, nyang punya perusahaan batu bata. Dia sempet nyoba ngajak Doel buat gawe di perusahaannya, tapi Doel nolak alus. Dia juga jadi pihak pertama nyang ngadain hubungan bisnis ama pengusaha Cina, Ahong.
Tonah sebage Saipah atau biasa dipanggil Encing Ipeh. Bini Encang Rohim, ma'nya Zainab, bibi pihak ma'nya Doel ama Atun, nyang kaga' demen ama Doel. Dia lebih milih Zainab nikah ama orang kaya, ketimbang ngeliat dia bareng Doel nyang dianggapnya sombong en sok kaya. Encang Rohim sering nasihatin dia biar kaga' jadi sosok egois lantaran mau pegimanapun Doel entu ponakannya.
Maryati Tohir sebage Munaroh. Cewe'nya Mandra nyang nantinya nikah ama laki-laki nyang namanya Cecep.
Salman Alfarizi sebage Ahong. Laki-laki turunan Tionghoa-Indonesia nyang jadi mitra bisnis Rohim. Sempet dijodohin ama Zainab sebelon akirnya patah hati lantaran Zainab nikah ama laki-laki lain.
Djoni Irawan sebage Roy. Saingan Doel ngerebutin hatinya Sarah.
Ami Prijono sebage William. Babe Sarah, besan laki-laki Babe Sabeni dan Mak Nyak, babe mertua Doel, punya banyak perusahaan en sempet minta Sarah buat ngebujuk Doel biar mau gawe di salah satu perusahaannya. Selain entu, sifatnya nyang ramah ama rendah hati juga ngebikin dia dihormatin ama keluarga Doel.
Ratih Dewi sebage Marini. Bini Willam, ma'nya Sarah, besan wadon Babe Sabeni dan Mak Nyak, ma' mertua Doel, selalu ngedampingin putrinya di setiap masalah nyang ada. Sifatnya nyang ramah ama rendah hati juga ngebikin dia dihormatin ama keluarga Doel.
Adam Jagwani sebage Hans. Sepupu pertama pihak ma'nya Sarah nyang cuma nongtot di usum pertama sebelon diceritain pulang ama tinggal di Belanda.

Produksi

Pengembangan

Rano Karno bilang kalo jalan cerita Si Doel Anak Sekolahan cuman sedikit nyang ngambil dari novel Si Doel Anak Betawi nyang ditulis ama Aman Datuk Madjoindo. Beda ama di versi film pas dekade 1970-an, Rano ngaku kalu dia kurang setuju bila sinetron karyanya disadur penuh deri novel lantaran dia ngeliat kalu zaman udah berubah en Doel di versi novel cuma tamatan sekolah dasar. Lantaran itulah di versi sinetron dia nyeritain Si Doel nyang lebih wayah gini dengen digambarin sebage sarjana.^[3]

Ada tiga tukang lakon nyang buta huruf selama proses produksi bejalan: Bendot, Pak Tile, ama Nacih. Untuk nyiasatinnya, Rano bilang kalu pihak dia ngasih arahin secara lisan dan langsung ama ketiga tukang lakon tadi. Rano nambahin juga, kalu ketiganya mampu nyerep skenarionya dengen baik. Bahkan, bisa ngasih improvisasi akting di luar ekspektasi.^[4]

Oplet nyang basisnya deri Morris Minor 1000 jadi ikon dalam serial Si Doel. Menurut Rano, dia nemuin oplet entu deri orang Kramat Jati, Jakarta Timur. Sebelonnya entu oplet dijadiin kandang ayam. Rano ngebeli entu oplet seharga 525.000 rupiah di taon 1993.^[5] Dia abis tu ngebenerin oplet entu walo masih mertahanin beberapa komponen asli di mesinnya. Seabis syuting serial Si Doel berakir, Rano ngerestoari entu oplet dengen ngeganti mesinnya ama mesin Mini Cooper.^[6] Interiornya juga diganti ama kursi kayu jati.^[7]

Untuk lokasi kampus Doel pas kuliah makai kampus Universitas Pancasila di Jakarta Selatan.^[8] Sementara kantor tempat Doel begawe adalah PT Trakindo Utama, nyang jadi pemegang tunggal merek alat berat Caterpillar buat kawasan Indonesia.^[9]

Di usum keempat waktu Doel diceritain dapet tugas belajar ke Swiss ama Prancis, sebenernya Rano sempet ngebikin jalan cerita kondisi ama situasi Doel pas tinggal di Eropa. Tapi lantaran waktu entu di Indonesia lagi gejolak gegara krisis ekonomi nyang bedampak ama bengkaknya pengeluaran, Rano terpaksa ngubah alur ceritanya ama Doel nyang cuma ditampilin singkat di Perancis.^[10] Sementara jalan cerita Doel nyang netep di Swiss terpaksa dia batalin. Selain entu, waktu ngambil gambar, salah satu penulis cerita Si Doel yaitu Harry Cahyono, milih ngundurin diri lantaran ngerasa buntu ama pengembangan jalan ceritanya.^[11]

Ruju’an

↑ ANM Massardi, Yudhistira (14 November 1994). "SI DOEL ANAK SEKOLAHAN (SINETRON), MENJUAL KULTUR BETAWI". Majalah Gatra. Diarsipin deri nyang asli tanggal 27 Agustus 2022. Dipungut 28 Agustus 2022.
↑ Mahyudi, Aditya (9 Desember 2019). "10 Artis ini ternyata pernah membintangi serial Si Doel Anak Sekolahan". Brilio. Diarsipin deri nyang asli tanggal 2023-03-23. Dipungut 7 Januari 2023. {{cite web}}: Check date values in: |date= (pertulungan); Unknown parameter |dead-url= ignored (|url-status= suggested) (pertulungan)
↑ Marhendri, Denny (9 November 2021). "Rano Karno Ungkap Kisah di Balik Si Doel Anak Sekolahan, Cerita Tak Sesuai Novel Asli". Merdeka.com. Jakarta. Diarsipin deri nyang asli tanggal 1 April 2022. Dipungut 18 Juni 2022.
↑ Aditya, Andika (4 May 2020). "Buta Huruf, Begini Cara Pak Tile dan Pak Bendot Baca Skenario Si Doel Anak Sekolahan". kompas.com. Jakarta. Diarsipin deri nyang asli tanggal 13 September 2022. Dipungut 13 September 2022.
↑ Putra, Ahyan (29 April 2020). "Di Balik Sejarah Oplet Si Doel Ternyata Bekas Kandang Ayam, Andre Taulany Kaget". gridoto.com. Diarsipin deri nyang asli tanggal 13 September 2022. Dipungut 13 September 2022.
↑ Sasongko, Darmadi (1 April 2022). "Oplet Si Doel Dihibahkan ke Museum Motor Klasik Malang, Ini Sejarah Panjangnya". merdeka.com. Diarsipin deri nyang asli tanggal 1 April 2022. Dipungut 13 September 2022.
↑ Imandiar, Yudistira Perdana (31 July 2018). "Oplet Si Doel Berawal dari Kandang Ayam Hingga Jadi Bintang di Film". tirto.id. Diarsipin deri nyang asli tanggal 13 September 2022. Dipungut 13 September 2022.
↑ Eka, Gerry (25 Juni 2018). "Kangen Si Doel? Inilah 8 Adegan Si Doel Anak Sekolahan Yang Sangat Memorable". IDN Times. Diarsipin deri nyang asli tanggal 7 Januari 2023. Dipungut 7 Januari 2023.
↑ Ansorulloh, M. (27 November 2013). "Wakil Gubernur Provinsi Banten Saksikan Peresmian Branch Factory PT.Trakindo BSD". Pemerintah Provinsi Banten. Diarsipin deri nyang asli tanggal 24 Juli 2022. Dipungut 7 Januari 2023.
↑ "RANO KARNO : DIROMBAK TOTAL". Majalah Gatra. 9 Februari 1998. Diarsipin deri nyang asli tanggal 2023-01-08. Dipungut 8 Januari 2023. {{cite web}}: Check date values in: |date= (pertulungan); Unknown parameter |dead-url= ignored (|url-status= suggested) (pertulungan)
↑ Utomo, J. Eko Setyo (27 Oktober 1997). "RANO KARNO : SDAS IV GONJANG-GANJING". Majalah Gatra. Diarsipin deri nyang asli tanggal 2023-01-08. Dipungut 8 Januari 2023. {{cite web}}: Unknown parameter |dead-url= ignored (|url-status= suggested) (pertulungan)

[1] ANM Massardi, Yudhistira (14 November 1994). "SI DOEL ANAK SEKOLAHAN (SINETRON), MENJUAL KULTUR BETAWI". Majalah Gatra. Diarsipin deri nyang asli tanggal 27 Agustus 2022. Dipungut 28 Agustus 2022.

[10AktorDoel-2] Mahyudi, Aditya (9 Desember 2019). "10 Artis ini ternyata pernah membintangi serial Si Doel Anak Sekolahan". Brilio. Diarsipin deri nyang asli tanggal 2023-03-23. Dipungut 7 Januari 2023. {{cite web}}: Check date values in: |date= (pertulungan); Unknown parameter |dead-url= ignored (|url-status= suggested) (pertulungan)

[3] Marhendri, Denny (9 November 2021). "Rano Karno Ungkap Kisah di Balik Si Doel Anak Sekolahan, Cerita Tak Sesuai Novel Asli". Merdeka.com. Jakarta. Diarsipin deri nyang asli tanggal 1 April 2022. Dipungut 18 Juni 2022.

[4] Aditya, Andika (4 May 2020). "Buta Huruf, Begini Cara Pak Tile dan Pak Bendot Baca Skenario Si Doel Anak Sekolahan". kompas.com. Jakarta. Diarsipin deri nyang asli tanggal 13 September 2022. Dipungut 13 September 2022.

[5] Putra, Ahyan (29 April 2020). "Di Balik Sejarah Oplet Si Doel Ternyata Bekas Kandang Ayam, Andre Taulany Kaget". gridoto.com. Diarsipin deri nyang asli tanggal 13 September 2022. Dipungut 13 September 2022.

[6] Sasongko, Darmadi (1 April 2022). "Oplet Si Doel Dihibahkan ke Museum Motor Klasik Malang, Ini Sejarah Panjangnya". merdeka.com. Diarsipin deri nyang asli tanggal 1 April 2022. Dipungut 13 September 2022.

[7] Imandiar, Yudistira Perdana (31 July 2018). "Oplet Si Doel Berawal dari Kandang Ayam Hingga Jadi Bintang di Film". tirto.id. Diarsipin deri nyang asli tanggal 13 September 2022. Dipungut 13 September 2022.

[8] Eka, Gerry (25 Juni 2018). "Kangen Si Doel? Inilah 8 Adegan Si Doel Anak Sekolahan Yang Sangat Memorable". IDN Times. Diarsipin deri nyang asli tanggal 7 Januari 2023. Dipungut 7 Januari 2023.

[9] Ansorulloh, M. (27 November 2013). "Wakil Gubernur Provinsi Banten Saksikan Peresmian Branch Factory PT.Trakindo BSD". Pemerintah Provinsi Banten. Diarsipin deri nyang asli tanggal 24 Juli 2022. Dipungut 7 Januari 2023.

[10] "RANO KARNO : DIROMBAK TOTAL". Majalah Gatra. 9 Februari 1998. Diarsipin deri nyang asli tanggal 2023-01-08. Dipungut 8 Januari 2023. {{cite web}}: Check date values in: |date= (pertulungan); Unknown parameter |dead-url= ignored (|url-status= suggested) (pertulungan)

[11] Utomo, J. Eko Setyo (27 Oktober 1997). "RANO KARNO : SDAS IV GONJANG-GANJING". Majalah Gatra. Diarsipin deri nyang asli tanggal 2023-01-08. Dipungut 8 Januari 2023. {{cite web}}: Unknown parameter |dead-url= ignored (|url-status= suggested) (pertulungan)

[1]

[2]

[3]

[4]

[5]

[6]

[7]

[8]

[9]

[10]

[11]