Sayur asem

Sayur asem
Sayur asem
Tanjaan	lau' madang
Asal negeri	Indonesia
Daèrah	Jakarta, Jawa Barat, Banten
Suhu pas ditanjain	panas èn adem
Bahan poko'	rupa-rupa sayuran maké kuah asem
Média: Sayur asem

Sayur asem (hurup Arab gundul: سايور اسم) nya'entu atu rupa lau' bakal madang nyeng seabrek macem-macemnya di Indonésia ntu. Sayur asem betawi dèwèk gé ada barang dua macem mah. Ada sayur asem nyeng kuahnya bening, ada juga nyeng kuahnya kuning alatan entu bumbunya dipakéin kunyit.

Rupa-rupa sayur asem

Di Betawi punya cara mah ada dua macem sayur asem. Nyeng atu sayur asem nyeng kuahnya bening, nyeng atu lagi kuahnya kuning.

Bahan-bahan sayur asem

Bahan-bahan bakal ngeja enni sayur asem entu macem-macemnya kaya' nyeng ditulisin di bawah enni:

• Bahan bakal isinya: labuh sièm, paya muda, kacang panjang, tèrong bulet atawa tèrong panjang, cècèk, jagung, daon melinjo, biji melinjo, ama kacang tanah. Kalu mao nyeng sayur kuah kuning biasanya dipakéin ikan teri ongkoh. Kalu èmang serèra, boléh nambain gelo atawa ama tales ongkoh.
• Bahan bakal bumbu: cabé, bawang mèrah, bawang puti, kemèri, lengkoas, asem mentah, gula, ama garem. Kalu kepèngèn sayur asem kuning, belarti tinggal nambain kunyit.

Cara ngeja sayur asem

Sayur asem entu masaknya kaya gini.

• Ulek bahan-bahan bumbunya keja rada alus maké coèt. Cuman kalu asemnya mah kaga ikut diulek alus. Asemnya mah tibang digeprèk doangan baé.
• Entu bahan-bahan bakal isinya tuh dicacag segedé-gedé nyeng pas ama ènak bakal sekali nyuap. Kalu jagung mah tibang dibelahin dua doangan gé kaga ngapa.
• Jerang aèr di gidir. Pasupin entu sayuran nyeng uda boléh nyacagin. Asem nyeng boléh ngegeprèk ge ikutan dicemplungin.
• Kalu uda mulain ngegolak, pasupin bumbu nyeng uda diulekin.