Saté

Betawi punya saté kambing, mah, sokanan dicocolin atawa dijolèdin paké sambel kécap

Saté (hurup Arab Gundul: ساتي‎ , Jawa: ꦱꦠꦺ, latènnya: saté, Indonésia: satai) entu daharan nyang dibikinnya deri daging nyang dipotong kecit-kecit terus diceplus paké tusuk lidi deri lidi kelapa atawa bambu, entakanuh digarang di atasnya areng kayu. Saté, mah, ditanjainnya paké macem-macem bumbu nyang begantung macem cara bikin saténya. Daging nyang kena dikeja saté, ya, daging ayam, kambing, domba, sampi, babi, kelinci, kuda, èn laèn sebagénya.

Orang kata, mah, saté, asanan, deri Jawa, Indonésia, èn kena dicari di mana aja di Indonésia ama udah dirèken jadi Indonésia punya masakan negara. Biar begitu, saté juga' bekèn, dah, tuh, di negara-negara Asia Kidul-wètan laènnya, kaya' Malésia, Singapur, Pilipénen, ama Siam. Saté juga' bekèn, tuh, di Belanda karangan kesawaban Indonésia punya daharan, kon, nyang dulu tau jadi jajahannya.

Kalu Betawi punya saté ayam, sari-sarinya, mah, dijolèdinnya paké sambel kacang

Sari-sarinya, tukang saté, kalu ngider, gerobaknya kaya' gini

Saté entu èmang udah jadi tanjaan nyang bekèn di Indonésia deri macem-macem kaum jadinya saténya juga' pada roncèt, dah, tuh. Di Indonésia, orang, mah, kalo mo nyari saté, tibang nogogin tukang saté ngider atawa bolé mbestèl di warung pinggir jalan, ampé di warung madang gedongan juga' ada. Ni daharan juga' sokanan ditanjain di kenduri-kenduri kelima ama biasa. Cara ngolah saté, mah, roncèt ngikut pegimana daèrahnya. Ampir semua macem daging kena dikeja saté. Anu negara nyang mula-mulanya ketembéan saté, kon, mangkanya Indonésia gablek macem-macem cara bikin saté ampé ngebadek caranya.

Sari-sarinya, saté, sih, dijolèdin sambel. Kalu di Betawi punya cara, mah, bisa sambel kécap, bisa sambel kacang. Selaèn sambel, sari-sarinya, juga' ditaroin, dah, tuh, rawis-rawisan acar, bawang mèra, bontèng, ama cèngèk. Saté bisa' dibadok jadi timpalannya nasi anget atawa juga' bisa paké lontong atawa ketupat atawa digado aja.

Di luar negeri sono, ada juga', dah, tuh, daharan nyang mèmper ama saté, kaya' yakitori deri Jepang, kebab tusuk deri Turki, kebab ceplus deri Kaukasi, kebab Uigur (chuan) deri Tiongkok, ama sosatie deri Aprika Kidul. Saté kedaptar jadi daharan nomer 14 paling èco di dunia kalu katanya World's 50 most delicious foods (50 tanjaan paling ènak sejagat) nyang anu bolé nanggok pendapet pembaca nyang digelar ama CNN Go tahon 2011.