Sèri (Muntingia)

Sèri (Arab gundul: سيرى) (Muntingia calabura) atawa di laèn tempat digero' kèrsèn nya'entu atu macem puunan sekaligus buahnya nyang kecit lagi bè manis bewarna mèrah cera'. Di berabiji tempat, macem di Jakarta, enni buah digero' sèri kaya' buahan deri bangsa Prunus.

Kalu di basa Madura, enni buah digero' "kersen" baleci . Nama laènnya di macem-macem negara entu datiles, aratiles, manzanitas (Pilipina); mât sâm (basa Piètnam); khoom sômz, takhôb (Laos); takhop farang (Tailan); barang krâkhôb (Kemboja); èn kerukup siam (Malésia).

Enni buah gè' digero' capulin blanco, cacaniqua, nigua, niguito (basa Spanyol); Sèri Jamaika, buah bèri Panama, ama sèri Singapur ( Inggris ). Orang Welanda dulu nyebutnya Japanse kers ("Sèri Jepang"), nyang entaran dicomot namanya bakal jadi kersen di basa Indonésia atawa ada ongkoh nyang nyebutnya cèri.

Enni taneman entu asalah deri suku Muntingiaceae nyang tibang gableg 1 (atu) spésis nyang aci.

Gambaran

Dia entu poonan, tingginya jangkung ampé 12 m, bagèn kamprahnya tibang kira-kira 3-6 m. Enni poonan ijo terus, bekembang ama bebuah terus-terusan sepanjang taon.

Asil, èkologi ama sebaran

Kayu poonan sèri entu empuk ama gampang garing, jadi kepaké bangat bakal kayu bakar. Dia punya babagan gancil bakal dikopètin terus dipaké bakal tali atawa ba'an libetan. Daonnya bisa dikeja' jadi semacem ntèh .

Manuk nyang ndaharin buah, kaya' macem merbah ama burung cabé, suka nunclo' di enni poonan tengari-ngari bakal madangin buah atawa sari buahnya nyang manis entu. Wayah udah gelap, gantian rupa-rupa kalong nyang madangin buah entu pada dateng bakal pekara nyang sama. Biji sèri kaga' bisa dicerna ama manuk atawa codot entuh, lantaran entu, enni binatang bedua-dua gè' jadi tukang ngamparin biji ngablak-ngablak.

Poon sèri kepaké bangat bakal poon nyang ngaub di èmpèran jalan. Enni puunan kecit suka nontot kaya' bibit liar di pinggir jalan, koco', atawa selah-selah tèmbok atawa pager, nyang ahirnya tumbuh cepet—biasanya diantepin—jadi poon gedé nyang ngaubin. Lantaran enni, dah, poon sèri suka ngejegir di daèrah kota nyang ramé èn rapet, di èmpèran trotoar, tempat parkir, di pinggiran kali nyang bala, atawa di tempat-tempat nyang biasa kering kerontang.

Hasiat bakal obat

Rupa-rupa bagéan deri sèri (babagan, daon, kembang ama buah) gableg macem-macem ba'an nyang ada hasiat obat. Kembangnya gableg jat antispasmodik (ngilangin kejang otot); kembangnya digodog terus dipaké bakal ngobatin mules ama perut melilit. Kembang ama daonnya gè' gableg jat antiseptik atawa antibaktéri ongkoh, nyang bisa dipaké bakal ngilangin puyeng ama pilek. ^[1]

Kemanjuran laènnya entu tuh kaya' antioksidan, anti-radang, antipiretik, analgesik, antipruritik, antiulkus, antijamur, insektisida, èn bejibun macem-macemnya, dah. ^[1]

Gambar

Memaduan ( Dendrophthoe pentandra ) di poon sèri
Poon sèri kecit
Buah sèri
Kembang sèri

Ruju'an

1 2 Stuart, Godofredo U. (2018). "Aratiles, Muntingia calabura Linn". Philippine Medicinal Plants (dalem basa American English). Dipungut 06-11-2019. {{cite web}}: Check date values in: |access-date= (pertulungan) Kengabluan penukilan: Tenger <ref> kaga' aci; nama ":9" diterangin bekali-kali paké isi nyang béda

Ba'an Bacaan

Steenis, van CGGJ . 1981. Flora, untuk sekolah di Indonesia . Pradnya Paramita, Jakarta.
Verheij, EWM dan RE Coronel (eds.). 1997. Sumber Daya Tanaman Asia Tenggara 2: Buah yang Bisa Dimakan . PROSEA–Gramedia. Jakarta. ISBN 979-511-672-2 .

Paranan

(Inggris) Germplasm Resources Information Network: Muntingia calabura^{[permanent dead link]}Sablonan:Wikispesies

[:9-1] 1 2 Stuart, Godofredo U. (2018). "Aratiles, Muntingia calabura Linn". Philippine Medicinal Plants (dalem basa American English). Dipungut 06-11-2019. {{cite web}}: Check date values in: |access-date= (pertulungan) Kengabluan penukilan: Tenger <ref> kaga' aci; nama ":9" diterangin bekali-kali paké isi nyang béda

[1]