Rumah Si Pitung
Rumah Si Pitung (Arab gundul: رومه سى فيتوڠ) di Merunda, Jakarta Ilir, Indonésia, nya'entu salah atu deri secimit rumah panggung Betawi nyang masing nyisa'. Enni rumah panggung tuh ngegambarin rumah orang Betawi nyang diem di daérah ilir. Enni rumah udah jadi musium èn masup cagar budaya . [1] Kaga' ada nyang nyaho' deri semprakan kapan percisnya rumah Si Pitung enni ngejogrog. Dikira-kira mah entu gedongan dikeja' lagi abad ke-20. Enni Rumah panggung tuh kentel bangat hawa budaya Betawi dengen gaya gedongan Tionghua, lega'nya 40x8 mèter lokalan èn nangkring di atas 700 mèter lokalan tanah. [2]
Riwayat
[permak | permak sumber]Enni rumah panggung, nyang ongkohan suka digero' Rumah Tinggi Merunda, mirip ama rumah terdisionil suku Bugis . Enni rumah mulanya mah banda gablekannya Haji Saipudin, atu bandar ikan tajir deri Mangkasar (laèn-laèn sumber bilangnya Haji Saipudin entu juragan sèro, atawa juragan kapal). [3] Haji Saipuddin katanya mah pernah jadi sohibnya Si Pitung. Pitung disangka tibang berabiji kali mampir ke enni rumah (kira-kira taon 1890-an). [4] Terahir kali Si Pitung ke situ tuh bakal ngumpet deri Welanda punya pasukan, alatan dituduh ngerampok. [5]
Guwernemen DKI Jakarta pertama kali ngerèhab enni rumah panggung nyang ngejegir maké 40 tiang tuh pas taon 1972. Sebelonan entu taon, enni gedongan dibeli ama Guwernemen Propinsi DKI Jakarta deri keturunan ( ahli waris ) H. Saipudin. Entu gedong sekarang jadi musium èn masup ke cagar budaya ngrikutin Keputusan Gubernur No. 475 taon 1993 èn Keputusan Menteri No. 140/M/1998. [1] Enni rumah aseli Betawi ilir ditanja' sebagé rumah Si Pitung entu tuh boléhan Museum Nasional nyang ngasih nama. [6]
Lagi taon 2010, rumah Si Pitung diréhab lagi ama pemrèntah maké duit Rp. 3 meliar. Réhab nyang digawéin tuh bakal naèkin ama ninggiin entu gedong 4 mèter (biar kaga' kena aèr laut naèk), ngganti lanté aselinya nyang dulu dikeja' deri rèng bambu terus diganti ama kayu. [7] Dua taon abis entu, ada réhab laèn lagi nyang dilakonin ama Dinas Kebudayaan Jakarta Ilir. Réhab nyang maké duit Rp. 2.1 meliar entu tibang bakal nganuin gedong nyang laèn, latar èn gerbang, ama jaro' nyang ngiterin rumah Si Pitung. [8] Bagèn udah kena réhab berapa kali gè', enni rumah masing maké modèlan aselinya. Bakal masup ke rumah Si Pitung entu, orang dateng kudu nanjat tangga nyang ada di lebah ilir. Di dalem rumah ada pangkèng tenga bakal tamu nyang lega'nya kira-kira 2 x 2,5 mèteran, pangkèng tidur ama dipannya, pangkèng madang, èn dapur nyang madep tères lebah belakang. [9]
Perdèo masup
[permak | permak sumber]Pemrèntah Propinsi DKI Jakarta nyediain layanan masup enni musium perdèo bakal masarakat dalem tiga golongan, nya'entu orang cacat, orang nyang udah kolot ama murid sekola nyang nerima Kartu Jakarta Pinter (KJP) nyang aci mulain 20 Januari 2017. [10]
Ruju'an
[permak | permak sumber]- 1 2 "Rumah Si Pitung/Langgar Tinggi". kemdikbud. Diarsipin deri nyang asli tanggal 2019-04-15. Dipungut 15 April 2019.
{{cite web}}: Unknown parameter|dead-url=ignored (|url-status=suggested) (pertulungan) Kengabluan penukilan: Tenger<ref>kaga' aci; nama ":1" diterangin bekali-kali paké isi nyang béda - ↑ Faisal, Abdu (2022-06-21). "Warga bisa kunjungi dua museum di Jakut gratis". Antara News (dalem basa Indonésia). Dipungut 2025-05-28.
- ↑ Rizal, JJ (9 November 2017). "Reklamasi dan Kiamat Situs Sejarah-Budaya Jakarta". tirto. Dipungut 25 April 2019.
- ↑ Ramadhan, Ardito (12 Mei 2018). "Mempelajari Sejarah Rumah Si Pitung, Rumah yang Tak Pernah Dihuni Si Pitung..." kompasonline. Dipungut 15 April 2019.
{{cite web}}: Check date values in:|date=(pertulungan) - ↑ Silalahi, Laurel Benny Saron (14 Maret 2016). "Kisah Rumah Pitung di Marunda". merdekaonline. Dipungut 16 April 2019.
- ↑ Puspasari, Desi (8 Des 2012). "Dikejar Kompeni Belanda, Si Pitung Ngumpet di Rumah Ini". detik. Dipungut 16 April 2019.
{{cite web}}: Check date values in:|date=(pertulungan) - ↑ "Nasib Rumah Si Pitung dan Renovasi Setengah Hati". republikaonline. 5 Desember 2011. Dipungut 16 April 2019.
{{cite web}}: Check date values in:|date=(pertulungan) - ↑ Hatta, Raden Trimutia (30 Januari 2013). "FOTO: Lebih Dekat dengan Rumah Si Pitung". liputan6online. Dipungut 16 April 2019.
- ↑ Abdila, Reynas (31 Juli 2015). "Si Pitung, Legenda Betawi dan Kisah Rumah Terakhir di Marunda". tribunnews. Dipungut 14 April 2019.
- ↑ "Peraturan Gubernur Nomor 8 Tahun 2017 tentang Layanan Gratis Masuk Taman Margasatwa Ragunan, Tugu Monumen Nasional dan Museum pada Hari Biasa Bagi Masyarakat Tertentu". JDIH - Jakarta (dalem basa Indonésia). 27 Januari 2017. Dipungut 2025-05-28.
{{cite web}}:|first=missing|last=(pertulungan)