Rengginang
| Rengginang | |
|---|---|
 Rengginang | |
| Tanjaan | Kue |
| Asal negeri | Indonesia |
| Daèrah | Pulo Jawa |
| Bikinan | Indonesia |
| Suhu pas ditanjain | Suhu ruangan |
| Bahan poko' | beras ketan nyang dimasak terus dikeringinnya dijemur terus digoreng |
Rengginang (Arab gundul: رڠݢينڠ) nya'entu atu macem kerupuk tebel nyang dikeja' deri beras ketan nyang dibikin bulet dèplè terus dikeringin maké cara dijemur di bawah mataari pentèr, abis ntuh digronyos maké minyak sayur nyang udah bolèh ngegarang. [1]
Rengginang rada laèn deri rupa-rupa kerupuk laènnya nyang kamprahnya dikeja' deri adonan ba'an boléh ngalusin bangsa tepung tapioka atawa biji melinjo nyang bolèh digeprèk. Rengginang kaga' maké diremekin, jadi bè bentukannya masing macem beras ketan baè kiatannya. Enni kué dicatet di ( Serat Centhini VI: 358:17) nyang diterebitin lagi abad ke-18 Masehi. [2] [3]
Muasal kata
[permak | permak sumber]Kata Rengginang aselinya deri basa Jawa: ꦉꦁꦒꦶꦤꦁ, latènnya: Rêngginang
Rupa-rupa
[permak | permak sumber]Di Sumatera Kulon, ada kué nyang mirip enni rengginang digero'nya tuh batiah, nyang ongkohan jadi ciri has deri Payakumbuh . [4]
Rengginang gè ada nyang paké ketan item. Rengginang èmang kudu dikeja' maké ketan, bukan beras bener. Kalu nyang maké nasi aking, biasanya digero'nya tuh renggining.
Di Jawa Tenga, ada ongkoh gorèng intip, nya'entu kerak nasi (Jw .: intip) sisa' abis ngaronin nyang nèmpèl di gidir, nyang terus dijemur ama digorèng. Bédanya gorèng intip ama rengginang tibang gedénya doangan. Intip lebih gedé deri rengginang lantaran dicitak deri bawah langseng atawa gidir peranti ngaronin nasi.
Di berabiji tempat di Jawa Kulon, ada ongkoh bebandos nyang saru ama rengginang, cuman dia dikeja' deri singkong atawa gaplek bakal ba'annya, nyang digero' renggining .
Di Jawa Wètan, selaèn rengginang terasi, atu rupa nyang rada nyohor entu tuh rengginang lorjuk, nyang ditenganya ada ikan lorjuk nunclo'. Lorjuk entu atu macem kerang nyang ngelonjor, kira-kira dua sampé tiga in panjangnya èn kaya' piso, entu dah musabab di laèn-laèn negara enni kerang gè' digero'nya "jackknife". Kaga' kabèhan panté gableg enni kerang, tapi di Pemekasan, Medura, enni atu kerang gancil bakal dituturin alatan panténya ono nyang lega' ama mudun.
Bumbu
[permak | permak sumber]Rengginang lumbrahnya dikeja' maké mècin atawa bumbu nyang ngeja' manis. Kamprah juga' dipakéin bumbu terasi, ada ongkoh nyang paké kencur. Kalu' nyang manis mah dibumbuin paké gula mèrah.
Rengginang bisa digronyos polos atawa ora maké bumbu, gurih atawa manis . Berabiji macem rengginang dibumbuin maké udang, terasi, atawa lorjuk (kerang bambu).
Ruju'an
[permak | permak sumber]- ↑ Pepy Nasution (February 22, 2011). "Rengginang (Indonesian Glutinous Rice Crispy)". Indonesiaeats.com. Diarsipin deri nyang asli tanggal 2012-06-27. Dipungut 10 June 2012.
{{cite web}}: Unknown parameter|dead-url=ignored (|url-status=suggested) (pertulungan) - ↑ "Javanese Food Traditions and Habits in the Colonial Period". academia.edu.
- ↑ Ricklefs, M. C.,. ""Centhini, Serat", in: Encyclopaedia of Islam". referenceworks.brillonline.com. Encyclopedia of Islam. Dipungut 29 Januari 2024.
{{cite web}}: no-break space character in|title=at position 23 (pertulungan)CS1 maint: extra punctuation (link) CS1 maint: multiple names: daptar mualip (link) - ↑ Schefold, Reimar; Nas, P.; Domenig, Gaudenz (2003). Indonesian Houses: Tradition and transformation in vernacular architecture (dalem basa Inggris). KITLV Press. ISBN 978-90-6718-205-8.