Rad Justisi

Rad Justisi punya garde

Rad Justisi (hurup Arab Gundul: راد جوستيسي‎) atawa wayah gini udah jadi Musium Seni Barang ama Keramik (hurup Arab Gundul: موسيوم سني بارڠ ام کراميق‎) pernahnya di Jalan Pos Kota No. 2, Kota Bestir Jakarta Kulon, Propinsi DKI Jakarta, Indonésia. Ni gedong arca nyang adanya di seberangnya Gedong Bicara jadi tempat mèjèng keramik setempat deri macem-macem bilangan di kita punya negeri, semprakan jaman Kerajaan Majapahit jaman abad ke-14, ama juga' keramik deri macem-macem bilangan antéro dunia.

Sejarah

Gedong Rad Justisi Betawi tahon 1930

Ni gedong nyang diresmiin 12 Januari 1870 sanonya dipaké ama Kanjeng Gubernemèn Hindia Nèderlan bakal Kantor Rad Justisi di Bèntèng Betawi (Ordinaris Raad van Justitie Binnen Het Kasteel Batavia). Pas jaman Nipong ama jaman perjoangan kemerdékaan tahon 1944-an, tu gedong disemenggahin ama KNIL nyang entakanuh jadi tangsi TNI.

10 Januari 1972, ni gedong nyang ada ambalan gedénya 8 biji di gardenya dikeja gedong sejarah ama cager budaya nyang dijaga'. Tahon 1967–73, tu gedong tau jadi gedong bicara kota Jakarta Kulon. Tahon 1976, ni gedong diresmiin ama Persidèn Suharto jadi Balé Seni Barang Jakarta (Balai Seni Rupa Jakarta).

Tahon 1990, tu gedong, marinya, dipaké jadi Gedong Seni Barang ama Keramik (Museum Seni Rupa dan Keramik) nyang diopènin ama Dènes Kebudayaan ama Pergedongpèjèngan DKI Jakarta. Sanonya, nama nyang dipaké bakal ni gedong entu Balé Seni Barang ama Keramik (Balai Seni Rupa dan Keramik) nyang entakanuh jadi Gedong Seni Barang ama Keramik.

Nyang unik

Musium Seni Barang ama Keramik Jakarta emang jadi tempat wisata yang rame didatengin orang-orang. Kagak ditaguin lagi, di sini ade program seru, salah satunye bikin keramik ama gerabah. Bikin beginian bukan cuman ngasih pengalaman baru, tapi juga jadi cara buat jaga budaya di tengah ribut-ributnya Jakarta. Sebenernya, entu bikin keramik di museum ini udah ada dari taun 2006, biasanya buat rombongan sekolah. Tapi, nyang pake roda puter itu baru ngetop abis pandemi, tepatnye dua minggu abis Lebaran taun 2022. Museum ini punya koleksi seni rupa ama keramik yang beragam bener, dari berbagai daerah di Indonesia, Asia, sampe Eropa. Salah satunye yang paling keren tuh peninggalan dari Dinasti Ming China, dari abad ke-17 sampe abad ke-18. Koleksi-koleksi ini ngasih liat betapa kayanye budaya ama sejarah di sini, bikin Museum Seni Rupa ama Keramik Jakarta jadi pusat seni ama budaya yang penting di Indonesia.