Pipiet Senja
Pipiet Senja, atawa aslinya Etty Hadiwati Arief, nya'entu tukang sair ama tukang tulis cerpèn, novel, cerita anak, nyang lair di Sumedang tanggal 16 Méi 1957.[1] Dia udah ngasilin lebih deri 80 novel remaja, novel Islami, antologi cerpèn bersama, ampé buku anak. Dia juga' bekèn sebagé pegiat literasi di Forum Lingkar Pena.[2]
Awalnya, mah, Pipiet bikin sair nyang dikirimin ke radio-radio di Bandung. Dia, mah, taun 1974 udah kesohor di radio-radio di Bandung, tapi belom berani ngirim ke majalah. Abis sair, dia mulain bikin cerpèn. Jalan setaun, cerpènnya dimuat di majalah Aktuil di Bandung. Deri situ, karyanya semangkin bekembang ampé diterbitin ama penerbit gedé di Jakarta kaya' Mizan, Gema Insani Press, Zikrul, èn Senayan Abadi. Karya-karyanya nyang kesohor banget antara lain ya'entu Lukisan Rembulan (2003), Menggapai Kasih-Mu (2002), Namaku May Sarah (2001), Tembang Lara (2003), Rembulan Sepasi (2002), Merah Jenin: Kado Cinta untuk Palestina (2002) Meretas Ungu (2005), èn Langit Jingga Hatiku (2007). Pipiet niat banget ngebagiin ilmunya di dunia literasi. Kaga' tanggung-tanggung, dia udah ngiderin Indonésia bahkan ampé ke luar negeri segala, lantaran getol ngajarin siapa aja bakal kiat-kiat nulis cerpèn ama novel.[1]
Pipiet Senja meninggal dunia pas tanggal 25 September 2025. Kabar dukanya dibagiin ama akun Instagram Forum Lingkar Pena.[2]