Patokan tempat

Gambaran abad ke-18 bakal atu kapal di mukanya Gunung Méja, nyang dijadiin patokan tempat ama tukang ngarahin (navigator) kapan mbawa' kapal ngiterin ujung kidulnya Aprika.

Patokan tempat atawa patokan doang entu cirènan bawaan alam atawa bikinan orang nyang jadi tenger bakal arah-arahan, lantaran dia punya béda kendiri deri kiterannya, ampé-ampé bisa ketempo' mao deri jau juga'. Patokan tempat juga' bisa paranan ama telepekan atawa cirènan kecil-kecilan nyang kebekèn jadi lambangnya atu negara atawa daèrah.

Pema'naan

Patung Liberti, patokan tempat kebekèn di Niu-Yorek Kota ama Amrik Serèkat, dijejegin di deket Pulo Èlis bakal tabé-tabéin orang mijahan nyang baru neba.

Patokan tempat mula-mulainnya dipaké ama tukang jajag bakal nemuin jalan balik ke tempat mulain mangkat atawa jalan tembusan di atu daèrah. Tulad, Gunung Méja di bilangan Tanjung Kota, Aprika Kidul, ada tau dipaké patokan ama tukang kapal bakal ngiterin ujung kidulnya Aprika pas Jaman Jajag-jajagan. Telepekan bikinan juga' kot-kotan dibangun bakal nulungin tukang kapal ngarahin, kaya' misal Iskandariah punya menara api ama Pulo Rodos punya patung gedé gambreng, bikin-bikinan jaman kolot nyang ngarahin kapal ke labuan. Patokan juga' bisa maran ama apa-apa ihwal nyang orang pada nyaho', kaya' tugu, gedong, atawa laèn-laèn telepekan.

Di èlmu perkotaan ama èlmu ujud bumi, patokan biasanya dima'nain jadi apa-apa ihwal di luar kita punya awak nyang bisa ngarah-ngarahin, mao kita lagi di tempat nyang kita tauin apa kaga'. Patokan sokanan dipaké bakal ngasi omongan arah-arahan, tulad (nyang jadi patokan disetil doyong): "Abis entu langgar, lu mèngkol kèbot, entakanu lempeng aja ampé ketemu gedong perdiping, nah, lu mudikin, tuh..."

Ragem

Bawaan alam

Patokan bawaan alam entu bisa aja cirènan nyang laèn kendiri, kaya' gunung atawa tana tinggi. Tulad patokan bawaan alam entu Gunung Èperès di Pegunungan Himalaya, Gunung Méja di Aprika Kidul, Gunung Ararat di Turki, Cadas Uluru di Ostrali, Gunung Puji di Jepang, ama Jurang Gedé di Amrik Serèkat. Ga' cuman cirènan alam gedéan, nyang kecilan kaya' puunan doang juga' bisa, ko', jadi patokan, biasanya nyang jangkung-jangkung atawa punya ciri laènan. Puunan nyang jadi patokan juga' bisa dikasi nama, tulad "El Palo Alto" atawa "Si Puun Tinggi" nyang jadi patokan bakal kota Palo Alto di Kaliporni.

Bikinan orang

Patokan tempat juga' bisa paranan ama tugu atawa gedong nyohor, nyang dibakal lambangnya atu daèrah, kota, atawa negara. Barang berapa tuladnya entu kaya' Menara Tokio di Tokio, Gedong Puti di Wasington Kota, Patung Liberti ama Gedong Empire State di Niu-Yorek Kota, Menara Èpèl di Parès, Katédral Sint-Basil di Mosko, Menara Lotte World di Soul, Kolosium di Roma, Jem Inggris di Londen, Kota Perboden di Pèking, Piramid Gedé di Gija, Jarum Awang-awang di Sètel, Pesisir Telok Marina di Singapur, Gedong Kalangan Sidni di Sidni, Jaro Brandenbereh di Berlèn, Menara CN di Toronto, Atumium di Bresèl, Gapura Jalan Masup di Sint-Lois, Arca Moai di Pulo Paska, ama Monumèn Nasional di Jakarta. Selaèn bikin-bikinan nyang èmang udah nyohor, mana-mana tempat nyang punya menara jangkungan kaya' tempat sembayang gedé juga kot-kotan jadi patokan.