Pa' Sakerah

Pa' Sakerah, nama aslinya, mah, Sadiman, nya'entu atu jagoan kesohor keturunan Medura, nyang lahir di Bangil, Pasuruan, Jawa Wètan. Dia bekèn sebagé orang nyang berani ngelawan Kumpeni Welanda. Orang pada nempo Pa' Sakerah sebagé pahlawan ra'yat lantaran dia kaga' rido ngeliatin tana-tana petani diserobot paksa bakal jadi kebon tebu Kumpeni. Biar kata orang Welanda nganggep dia tukang rampok atawa pembunuh, buat rak'at di sono, mah, dia entu pembéla orang kebanyakan nyang berani pasang badan ngelawan penindasan deri pabrik gula.

Awal mulanya, mah, Pa' Sakerah entu jadi mandor tebu di pabrik Kancil Mas, Bangil. Dia ngerasa gedeg ngeliat kelakuan orang-orang gedéan Welanda nyang mau ngeluasin kebun tebu dia orang. Ada atu pejabat désa, nya'entu Carik Rembang, nyang jadi antèk Welanda, demen banget meres èn maksa petani nyerahin tananya bakal kebon tebu. Pa' Sakerah musuhan banget ama entu Carik Rembang, nyang ngelaporin dia ke Welanda. Pa' Sakerah ngelawan wakil perusahaan Welanda nyang namanya Markus. Ni orang lagunya jolim ama ra'yat, èn dia bekoar-koar nantangin Pa' Sakerah, ampé si Markus ama para pengawalnya tetiba didatengin ama Pa' Sakerah, èn modar dia orang dibikinnya. Gara-gara entu, Pa' Sakerah jadi buronan nomor atu pulisi Welanda. Abis entu, Pa' Sakerah mulai malingin harta orang-orang Welanda ama antèk-antèknya. Hasilnya dia bagi-bagiin ke ra'yat ama buat modal dia ngelawan Kumpeni. Dia kepaksa kabur-kaburan èn ngumpet pindah-pindah di dalem utan, tapi ra'yat ama buruh kebon tebu pada kompak bantuin dia nyumputi di tempat nyang aman, biar kaga' ketangkep ama pulisi.

Welanda nyang pusing nyari di mana dia ngumpet akhirnya maké cara licik, ya'entu nyogok Ajis, orang deket ama Pa' Sakerah, nyang kaga' laèn sudara sepeguruan dia. Si Ajis kegoda ama duit èn janji manis Welanda, terus dia ngejebak Pa' Sakerah pas dia lagi asik nontonin atu acara Tayuban (igelan rak'at) di daérah Rembang. Pas Pa' Sakerah lagi kaga' megang dia punya senjata (celurit), di situ, dah, pulisi Welanda nangkep dia beramé-ramé.

Pa' Sakerah diputusin bersalah ama pengadilan Welanda, èn dia dijatuin hukuman gantung di taon 1904. Welanda sengaja ngelakuin hukuman gantung enni di depan orang banyak di Bangil, biar ra'yat pada kèder èn kaga' berani macem-macem lagi. Pa' Sakerah dikubur di Désa Bekacak, Bangil, nyang ampé sekarang mingsih sering didatengin orang bakal jiarah. Walopun dia udah lama mati, cerita Pa' Sakerah tetep idup di kesenian ludruk sebagé lambang keberanian ngelawan kesewénang-wénangan, èn senjata celurit nyang sering dia bawa-bawa ampé sekarang tetep jadi lambang keberanian ra'yat Medura èn Jawa Wètan.

Cerita Pa' Sakerah udah perna dibikinin pélem layar lebarnya judulnya Pak Sakerah taun 1982, nyang maèn jadi Pa' Sakerah nya'entu W.D. Mochtar, atu bintang pélem ngetop jaman entu.