Pèngkolan kebasaan
Pèngkolan kebasaan (Inggris: linguistic turn) ntu atu perobahan gedé-gedéan dalem pilsapat Wètan kisaran awal taon 1900-an; nyang jadi ciri deri ni perobahan, ntu, die nekenin juntrung-juntrungannya pilsapat ama basa, omongan, juga' ama dunia.
Bejibun gerakan tukang pikir, nyang masing-masingnya juga beda-beda atu ama laènnya, ntu dikasi nama "pèngkolan kebasaan" juga, tapi ntu setilah, mah, orang pada taunya deri kitab bunga rampé Richard Rorty punya di taon 1967 nyang judulnya The Linguistic Turn. Dia ada jèmbrèngin di dalemnya, ntu, soalan perobahan ke pilsapat èlmu basa. Nyang si Rorty punya bilang, misain kendirinya deri pilsapat èlmu basa ama pilsapat perèksa basa, biar gitu, setilah "pèngkolan kebasaan" ntu asalnya deri pilsup Gustav Bergmann.
Pilsapat perèksaan
[permak | permak sumber]Terdisionilnya, pèngkolan kebasaan ntu nandain brojolnya pilsapat perèksaan.[1] Nyang jadi hasil deri pèngkolan kebasaan ni, ntu dia, nekenin ke mantèk ama pilsapat basa, juga beceré'nya pilsapat basa sempurna ama pilsapat basa biasa.
Frege
[permak | permak sumber]Kalo ngikut Michael Dummett punya omong, pèngkolan kebasaan bisa disusurin ke gawéannya Gottlob Frege di taon 1884 nyang judulnya Dasar Itung-Itungan, wabilhusus di paragrap 62 pas Frege nyari tau soalan awak-kendiri deri ongsongan angka.
Dia keja begini buat kasi jawab pertanyaannya Kaum Kant soalan angka, "Gimana kita bisa tau soalan angka, biar kata kita kaga' punya penauan atawa petunjuk soal angka?" Frege abis ntu kasi dia punya " prinsip konteks ", yang dia kasi di awal kitabnya, kalu cuman dalem atu keadaan husus ntu ongsongan bisa punya ma'na (kita bisa pahamin), begitu Frege punya cara bakal nyelesain pengartian "ma'na ongsongan nyang ada angkanya." Dengan begitu masalah pilsapat soalan apa aja ama pilsapat soalan penauan, nyang adatnya dirampungin liwat cara ajaran idealis, wayah gini bisa kelar liwat cara èlmu basa.[1]
Russell èn Wittgenstein
[permak | permak sumber]Pilsup bekèn deri ajaran pilsapat perèksaan, Bertrand Russell, ntu nekenin soalan mantèk deri ongsongan èn sambungannya ama "fakta" deri dia punya makalah " On Denoting". Dia juga jadi orang penting di pilsapat perèksaan, soalnya dia punya gawean ngebentuk ntu ajaran atum mantèk. [2]
Ludwig Wittgenstein, pilsup basa deri Ostenrèk, juga' jadi engkong moyangnya pèngkolan kebasaan. Soalnya dia punya gawéan, nya'entu kitab Wès Mantèk-Pilsapat bilang kalu masalah nyang ada di ajaran pilsapat ntu milirnya deri cemplèngan mantèk basa, abis ntu kitabnya yang satu lagi, ntu dia ada jelasin soal permaènan basa, nyang jadi biang masalah juga dalem pilsapat. [3]
Quine èn Kripke
[permak | permak sumber]WVO Quine jèmbrèngin lanjutan deri pèngkolan kebasaan dalem sejarah liwat kitabnya nyang bejudul "Dua-Iman-Ajaran-Pengalaman", nyang ngasi tau kalu "Ntu ma'na, ntu intinya, kalu semisal ntu inti ceré' deri banda nyang jadi ruju'an, terus ntu inti mala lanjut kawin ama kata."
Lanjut terus pas taon 1900-an, pilsup semacem Saul Kripke dalem kitabnya nyang bejudul Penamaan dan Kekuduan dia ada ngambil kesimpulan mètapisik liwat perèksa basa nyang ati-ati. [4]
Pilsapat benuaan
[permak | permak sumber]Ajaran-strukturan dan udahannya-ajaran-strukturan
[permak | permak sumber]Dalem ajaran pilsapat benuaan, tukang pikir kayak Ferdinand de Saussure, Jacques Derrida, ama Michel Foucault kasih teken kalu ma'na ntu dibentuk ama atu struktur (telepekan) ama wacana deripada kebenaran nyang ada di dalemnya kendiri. [5]
Ruju'an
[permak | permak sumber]- ↑ a b Dummett, Michael A. (1994). Origins of analytical philosophy. Cambridge. Mass.: Harvard University Press. h. 5. ISBN 0674644735. OCLC 38153975.
- ↑ Russell, Bertrand (1918). "The Philosophy of Physical Atomism" (PDF). Di Marsh, Robert Charles (prm.). Logic and Knowledge. Capricorn Books. h. 178.
- ↑ Glock, Hans-Johann; Javier, Kalhat (2018). Linguistic turn. doi:10.4324/0123456789-DD3600-1. ISBN 978-0-415-25069-6. Dipungut August 25, 2024.
{{cite book}}:|work=ignored (pertulungan) - ↑ Brian Garrett (25 February 2011). What Is This Thing Called Metaphysics?. Taylor & Francis. h. 54. ISBN 978-1-136-79269-4.
- ↑ Colebrook, Claire (2014). "The Linguistic Turn in Continental Philosophy". Di Schrift, Alan D. (prm.). Poststructuralism and Critical Theory's Second Generation. The history of continental philosophy. London: Routledge. ISBN 978-1-315-72974-9.