Medura
Medura nya'entu atu pulo nyang ngejogrog di belah wètan lor Pulo Jawa. Jembar wilayahnya kira-kira 5.379,23 km²,[1] nyang isinya ada empat kabupaten: Bangkalan, Sampang, Pamekasan, èn Sumenep.
Kalo kata data deri Badan Pusat Statistik (BPS) Jawa Wètan, mah, orang nyang tinggal di Medura pas taun 2023 kemarèn udah nyampé 4 juta jiwa banyaknya.[2]
Pulo Medura kesohor banget jadi penghasil utama minyak ama gas alam di Provinsi Jawa Wètan. Bukan cuma entu, Medura juga' jadi produsèn garem paling gedé di Indonèsia, mangkanya ampé dijulukin "Pulo Garem".
Nah, sekarang enni lagi ada omongan soal pemekaran wilayah, biar enni pulo Medura jadi provinsi dèwèk. Kalo èmang beneran kejadian, jembar wilayahnya bakalan jadi 5.408,45 km², terus penduduknya sekitar 4,03 juta orang.[2]
Kalo mau ke Medura, pintu masuk utamanya, mah, lewat Sasak Suramadu. Selaèn lewat darat, bolé juga lewat laut. Kalo naèk kapal, bisa deri Pelabuan Tanjung Perak di Surabaya, terus turun di Pelabuan Kamal di Bangkalan. Ada juga' pilihan laèn, lewat Pelabuhan Jangkar di Situbondo nyebarang ke Pelabuan Kalianget di Sumenep, nyang ada di ujung wètan Madura. Nyang paling baru, sekarang udah bisa lewat udara lantaran Lapangan terbang Trunojoyo (SUP) udah diresmiin ama Presidèn Joko Widodo pas April 2022 di Sumenep.
Paranan
[permak | permak sumber]<references>
- ↑ Redaksi (2021-05-21). "Luas Pulau Madura yang Perlu Diketahui". Madurapers (dalem basa Indonésia). Dipungut 2025-02-17.
- ↑ a b Sary, Vannia Aprillia. "Jumlah Penduduknya Capai 4,06 Juta Jiwa, Mahfud MD Sebut Madura Layak Dimekarkan dari Provinsi Jawa Timur - Ayo Bandung". Jumlah Penduduknya Capai 4,06 Juta Jiwa, Mahfud MD Sebut Madura Layak Dimekarkan dari Provinsi Jawa Timur - Ayo Bandung (dalem basa Indonésia). Dipungut 2025-02-17.