Lagu gacoan

Bètel punya rekeman lagu gacoan "Roll Over Beethoven" taon 1963, pèrsi jebrolan Kanada

Lagu gacoan atawa lagu kètèngan gacoan entu lagu kètèngan nyang digacoin deri atu album pabrikan ama dia punya tukang gending atawa paguyuban gending. Lagu gacoan bisa jebrol duluan atawa barengan ama si album punya tèmpo jebrol.

Juntrungan ama ni lagu gacoan, ada juga' setilah "lagu debut", nyang bisa dibilang juga' lagu pertama deri tukang gending nyang baru naèk.

Siasat penjebrolan

Si tukang gending biasanya ngegacoin lagu nyang pating rancag, cuman masing bisa ngunjukin tu album punya bunyi. Lagu beginian biasanya ènakan di kuping ama bisa ngegaèt orang banyak. Terus, lagu-lagu kètèngan nyang jebrol abisnya biasanya rada pelanan, bakal ngunjukin jembarnya dia punya keboléan. Biduan wadon kaya' Mariah Carey ama Christina Aguilera demen maké ni rumus bakal jebrolin lagu kètèngan; nyang rancag jadi lagu gacoan, abis, nyang balad jadi lagu kètèngan terusannya. Tuladnya bisa diliat deri lagu kètèngan dua nyang dijebrolin ama Miley Cyrus sebelon dia punya album, Bangerz; atu tembang rancag nama "We Can't Stop", dirikutin ama dia punya tembang balad lèlèt, "Wrecking Ball", bakal lagu kètèngan kedua. Girls Aloud mili dia punya lagu dance-pop ama electropop nama "The Show", bakal jadi lagu gacoan deri dia punya album kedua, What Will the Neighbours Say?. Cara begini juga' getep dilakonin ama paguyuban gending métal cadas taon 1980-an.

Biar gitu, ga' semua tukang gending ngegacoin lagu-lagu nyang rancag baé. Dia pada bisa aja jebrolin lagu nyang naga-naganya bisa nyampéin pesen nyang kerengan, biar kata kaga' ngrikut pasaran punya seléra, tulad: Fall Out Boy nyang lebih mili ngejebrolin "This Ain't a Scene, It's an Arms Race" ketimbang "Thnks fr th Mmrs" nyang orang bilang ènakan bakal diputer di redio.

Taon 2010-an ujung, tukang gending pada mulain ngejebrolin lagu kètèngan barang berapa biji sebelon ngejebrolin dia punya album pabrikan. Jepang punya tukang gending ama biduan, kaya' Ayumi Hamasaki, Namie Amuro ama B'z bisa aja ngejebrolin lagu kètèngan empat ampé lapan biji sebelon dia pada punya album jebrol, biar bisa ngeranggeh penjualan ngebadeg-badeg di minggu pertamanya. Di Jepang, mah, lagu gacoan dibéla-bélain bakal dijadiin ojèk-ojèkan, hata kadang santeran deripada albumnya kendiri. Tukang juntrung A&R ada bilang ke Rolling Stone taon 2018 kalo "tukang gending pada kudu gableg tiang nyang kokoh bakal bisa lajeng terus", ama juga' "kapan tukang gending cuman punya atu rekeman bakal digedé-gedéin, buntutannya, mah, ga' bakal semenggah, bahna dia pada ga' nguatin tiang pancangnya dulu." Biduan kaya' Cardi B, Camila Cabello ama Jason Derulo ampé bisa ngejebrolin lagu kètèngan empat biji atawa banyakan lagi, sebelon dia pada punya album jebrol.