Kwétio (basa Tionghoa: 粿條, pèng'im: guǒ tiáo, juga' digero 沙河粉, shā hé fěn) ya'entu sejenis mi Tionghoa warna puti èn gèpèng nyang dikeja deri beras. Kwétio entu makanan nyang kesohor di Indonésia, komo-komo di Jakarta ama tempat-tempat laèn nyang banyak orang turunan Tionghoa nyang ngejogrog.
Kwétio umumnya identik ama orang Tionghoa Hokkièn ama Tio Ciu. Di Indonésia, kwétio dibédain ama orang Hokkièn punya kwétio ama orang Tio Ciu punya kwétio. Kwétio nyang bèken di kalangan orang Hokkièn nyang banyak ngejogrog di Sumatra entu kwétio Médan nyang maké bakso ikan, lapciong (sosis babi), ama telor bébék. Kwétio nyang bèken di kalangan orang Tio Ciu nyang banyak ngejogrog di Kalimantan entu kwétio sampi nyang maké daging sampi serènta jeroannya kaya' babat. Dalem perkembangannya muncul varian anyar nyang dikenal ama sebutan kwétio sirem. Kwétio sirem ya'entu jenis kwétio nyang ada kuahnya, sering dimasak paké daging babi atawa pun sampi.[1] Di Bagansiapiapi, Rio, kwétio nyang kesohor entu kwétio Bagan nyang bisa ditemuin di macem-macem warung makan kepunyaan orang Hokkièn setempat.
