Kumidi puter
Kumidi puter(atawa disebut Carrousel di Amrik Serèkat, Merry-go-round dalem basa Inggris antèrobangsa, atawa galloper di Britani Gedé, nya'entu wahana iburan nyeng muter-muter terus ada tempat duduk bakal nyeng naèk[1]. Kumidi puter entu wahana maèn-maènan nyeng keitung deri atu bunderan nyeng ada tempat bakal duduk. Ni tempat duduk sokanan bentuknya maké satwa (lajimnya kuda) nyeng dipasang di atu tiang, banyak lagi nyeng geraknya munggah-mudun bakal nironin gerakan rari. Kadang-kadang dipaké tempat duduk bentuknya kursi atawa bangku èn sesekali roman tunggangannya laèn satwa, kaya' kapal tersebang atawa mobil. Wahana kumidi puter sokanan diinclo'in ama tembang sirkus nyeng diputer muter-muter.
Kata carousel asalnya deri basa Prasaman carrousel nyeng artinya "perang kecil" nyeng mbuntutin ke lomba di Éropa nyeng namanya sama èn dimulain pas abad ke-17. Tukang-tukang nginclo' di enni lomba nunggang kuda beneran èn belomba dalem macem-macem uji keterampilan naèk kuda, kaya ring jousting. Ujung di entu abad, dikeja, dah, mesin ringkes di mana kuda kayu digantelin deri roda nyeng muter dipasang di tiang tenga nyeng mungkinin bakal tukang-tukang nginclo' bakal latian ring jousting sonder ngeja capé dia pada punya kuda. Ni perkakas mula-mulanya terusannya jadi lajim bakal pèsta ra'yat kuliling di Éropa terus pada abad ke-19, kesohorannya kesebar ke Amrik Lor, di mana kumidi puter nyeng jadi daya tarik utama bakal pasar malem kuliling terus berapa taman iburan pertama nyeng dibangun kusus. Kebanyakan satwa nyeng ada di kumidi puter sejarah, keitung nyeng dikeja selama wayah keemasan kumidi puter deri taon 1870-an ampé taon 1930-an, dikeja deri kayu, terus diukir ama dicèt maké tangan. Kayu ukiran tangan terusannya digantiin ama citakan almunium nyeng lebi mura ama terusannya citakan fiberglass wayah abad ke-20. Banyak kumidi puter nyeng masing jalan di semua dunia ampé wayah gini, terus sokanan dipaké jadi tenger bakal semua ibur-iburan.
Sejarah kumidi puter
[permak | permak sumber]Sejarah mulainnya kumidi puter
[permak | permak sumber]Setilah "carousel" asalnya deri basa Prasman "carrousel", nyeng artinya "perang kecil". Abad ke-17, ni setilah jadi dipaké bakal lomba nunggang kuda di Éropa. Tu pemaèn pada nunggang kuda mbari nusuk cingcin maké tombak. Bakal latian ni kuasa sonder ngabisin ungkulan kuda, perkakas ringkes dikeja deri kuda kayu nyeng digantèl di roda nyeng muter nyeng digerakkin ama laèn kuda nyeng jalan muter-muter. Ni perkakas dikenal "wooden horse" terus dipaké bakal latian nunggang kuda ama nombak cingcin. Terusannya, ni perkakas njenggar ampé jadi maèn-maènan nyeng dikenal jadi kumidi puter.
Tenga-tenga abad ke-19
[permak | permak sumber]Pas tenga-tenga abad ke-19, ni kumidi puter mulain njenggar ampé jadi maèn-maènan nyeng rada ruwet. Maènan kumidi puter pertamnya dijenggarin maké patung satwa ama sepur nyeng dipasang di lanté ngelingker nyeng muter-muter muterin tiang sintremnya. Ni kumidi puter disebut "dobbies" terus digerakkin ungkulan orang ama tukang njalanin atawa kuda poni. Di Britani Gedé, kumidi puter jadi bekèn di pasar-pasar ra'yat pas tenga-tenga abad ke-19. Kumidi puter pertama nyeng digerakkin ama mesin uap dikeja ama Thomas Bradshaw bangsa taon 1861 di Bolton, Britani Gedé.[2]
Jaman kekonèngan (1870-1930)
[permak | permak sumber]Pas wayah ujung abad ke-19 ampé mulaiannya abad ke-20 dikenal jadi "jaman kekonèngan" bakal kumidi puter, utamanya di Amrik Serèkat. Ni wayah, berapa tukang keja kumidi puter nyeng bekèn pada crang-cring-crong, kaya' Gustav Dentzel ama Charles I.D. Looff, nyeng mbawa kemampuan deri Éropa ke Amrik. Gustav Dentzel asalah deri Dètslan. Dia ngewangun atu matskepé kumidi puternya di Piladèlpi di taon 1860-an terus jadi kuncèn bakal nyohorin kumidi puter di Amrik Serèkat. Karyanya nampilin satwa-satwa nyeng dipa'at ruwet, utamanya kuda, terus kesohor lantaran seni terus rinciannya nyeng beneran ruwet. Charles I.D. Looff, tukang keja kumidi puter bekèn laènnya gè' ngewangun kumidi puter pertamanya di Coney Island, Niu Yorek, taon 1875. Karyanya nonjolin soal sirap-sirep deri kumidi puter, terus satwa-satwanya diriain ama dipernah keja ruwet. Sumbangannya jadiin patokan nyeng tinggi bakal gambaran kumidi puter terus ngukukuin tempatnya bakal taman iburan di Amrik.[3]
Jaman wayah gini
[permak | permak sumber]Pas abad ke-20, tèhnolohi bakal ngeja kumidi puter mingkinan njenggar. Bahan kayu nyeng dipaké bakal patung satwa ditukar ama almunium ama serat kaca nyeng mura terus tahan lama. Mesin uap ditukar ama mesin lèstrik, nyeng ngeja kumidi puter rada gedéan terus mantepan. Cuma, kebanyakan kumidi puter nyeng jaman baheula uda longit wayah depresi besar terus cuma sedikit nyeng tahan ampé wayah gini. Wayah gini, kumidi puter sokanan dipaké bakal tenger industri taman iburan kabèhannya.[2]
Ruju'an
[permak | permak sumber]- ↑ Real Academia Española. «tiovivo». Diccionario de la lengua española (23.ª edición).
- ↑ a b https://www.historyofcarousels.com/carousel-history/who-invented-carousels/
- ↑ https://www.aaastateofplay.com/the-history-of-merry-go-rounds-and-carousels