Kerispatih

Kerispatih
Asal	Jakarta, Indonesia
Janrah	Pop rock, Slow rock, Power ballad, Rock alternatif
Taon getep	2003–sekarang
Pelampang jala	www.kerispatih.com
Anggota	Fandy Anton Arief
Bekas anggota	Sammy Badai Andika

Kerispatih yaentu paguyuban gending aliran pop rok nyang dibikin deri taon 2003. Dia punya anggota ada 3 orang, Anton, Fandy (ngegantiin Sammy), ama Arief.

Riwayat idup

Kerispatih berojol 22 April 2003 dilakonin ama 4 orang anak kuliahan Institut Musisi Indonesia, Arief, Badai, Anton, ama Andika. Pada mulanya enni paguyuban gending punya aliran alat musik etnik. Abis entu berobah lantaran aliran musiknya nyang baru. Muncul pertama kali di acara Farabi Sunday tanggal 22 April 2003. Udah gitu dia orang ngajak Sammy, temen kuliahan dia orang di kampus, si Sammy enni juga jebolan 30 besar Indonesian Idol I/2004.

Sebelom Kerispatih dibikin, Badai juga pernah ngeja album C4U ama barengan ngelayanin band rohani Joyfull Ministry rempug ama Robert Ludji (keyboard synthesizer & electric guitar), Yohanes Setiabudi (bass), Ongen Ririhena (drum), Eric Bastian (keyboard) ama Badai (lead keyboard). Band Joyfull Ministry sering ngelakonin jalan-jalan dakwah (mission trip) keliling ke beberapa kota di Indonesia jaman akhir taon 1999 sampe 2001.

Taon 2005, Kerispatih ngeluarin album nyang paling duluan judulnya Kejujuran Hati. Salah atu isi albumnya nyang diluncurin antara laen "Kejujuran Hati", "Cinta Putih", ama "Lagu Rindu". Album ini dapetin Platinum Awards taon 2006. Selaen entu dia orang bisa ngebuktiin kesohorannya lantaran berhasil juga dapetin penghargaan sebage Album Pendatang Baru Ngetop di ajang SCTV Music Awards 2006.

Taon 2007, Kerispatih ngeluarin album nyang kedua judulnya Kenyataan Perasaan. Kaya' album nyang duluan, album nyang kedua enni juga sukses dapetin Platinum Awards.

Kerispatih juga ikutan nimbrung di albumnya Presiden Republik Indonesia ke-6, Susilo Bambang Yudhoyono, bawain lagu bikinannya SBY judulnya Hening.