Keripik jèngkol

Keripik jengkol nya'entu keripik nyeng dikeja deri bua jèngkol nyeng dijadiin bentuk keripik terus digorèng ampé garing terus kres. Keripik jèngkol dikeja deri ambregan jèngkol ama tepung kanji, garem, gula, ama bumbu-bumbu laènnya. Keripik jèngkol lajim dikeja deri jèngkol tua nyeng dimasak liwat berapa rèrodan masak, kaya' direbus (bakal ngurangin mambunya), diiris tipis, ama digorèng ampé garing terus kres. Abis entu, ni keripik dikasi bumbu manis atawa pedes bagèn ngresep, nyeng jadiin dia cemil-cemilan has nyeng béda deri nyeng laèn.^[1]

Asal-usul

Keripik jèngkol jadi atu panganan terdisionil has orang Betawi nyeng asalnya deri daèrah Jakarta. Jèngkol uda deri jaman kolot jadi bagèan masakan nusantara. Jèngkol bukan cuma sembarang makanan, tapi juga' bagèan deri jati diri budaya ama ketumanan makanan deri jaman kumpi-kumpi.

Jèngkol dalam terdisi Betawi

Jèngkol uda lama jadi bagèan masakan masarakat Betawi. Senajan ada punya mambu nyeng béda terus tajem juga', tapi jèngkol dikeja jadi macem-macem panganan nyeng ajib, kaya' semur jèngkol, rendang jèngkol, atawa jèngkol balado. Kewontenan pu'un jèngkol nyeng idup subur di latar ruma orang-orang Betawi (utamanya di daèrah Pondok Gedé ama Lobang Buaya) jadiin jèngkol jadi ba'an panganan nyeng gampang dicari ama nyohor di kalangan masarakat Betawi.^[2]

Ngalor-ngidulin wayah, masarakat Betawi mulain ngeja macem-macem cara bakal ngeja jèngkol jadi awètan ama ta'an lama, serènta gampang bakal dimakan. Atu ihwal nyeng ajib banget entu jadiin jèngkol bakal jadi keripik. Tangèan pengejaan keripik jèngkol mulain deri ngrebus jèngkol bakal neken mambunya, terus diiris tipis, terus digorèng garing terus kres. Ni keripik terusannya dibumbuin ama macem-macem bumbu has nyeng ngeja rasanya jadi pedes guri.

Ba'an èn cara ngeja

Ni dia ba'an ama cara ngeja keripik jèngkol.^[3]^[4]^[5]

Ba'an

Bua jèngkol
Aèr
Cabé rawit
Cabé méra gedé
Bong puti
Bong méra
Gula puti
Garem

Cara ngeja

Rebus jèngkol dalem aèr nyeng belebek-belebek ampé empuk, terus angkat tirisin.
Iris jèngkol tipis-tipis.
Gorèng irisan jèngkol dalem minyak panas ampé garing terus kres, terus angkat tirisin.
Tumis bumbu alus maké minyak sedikit ampé wangi.
Tambain aèr, gula, ama garem bagèn pas.
Masak ampé bumbunya nggulek.
Pasupin tu keripik jèngkol nyeng uda digorèng ke dalem tumisan bumbu.
Aduk ampé keripiknya pada cèmong-cerèmong ama bumbunya, terus angkat.
Tanjain abis tu keripik rada dingin.

Referensi

↑ "Pesona Nusantara". Pesona Nusantara (dalem basa Indonésia). 2019-02-27. Dipungut 2025-05-27.
↑ "Asal usul jengkol jadi makanan rakyat". merdeka.com (dalem basa Indonésia). 2013-06-06. Dipungut 2025-05-27.
↑ Times, I. D. N.; Arofani, Prila. "Resep Keripik Jengkol, Begini Cara Membuatnya yang Enak dan Kriuk". IDN Times (dalem basa In-Id). Dipungut 2025-05-27.{{cite web}}: CS1 maint: unrecognized language (link)
↑ "25 resep keripik jengkol enak dan mudah". Cookpad (dalem basa Indonésia). Dipungut 2025-05-27.
↑ Media, Kompas Cyber (2022-10-27). "Cara Membuat Keripik Jengkol Sederhana, Bikin Stok Camilan di Rumah". KOMPAS.com (dalem basa Indonésia). Dipungut 2025-05-27.

[1] "Pesona Nusantara". Pesona Nusantara (dalem basa Indonésia). 2019-02-27. Dipungut 2025-05-27.

[2] "Asal usul jengkol jadi makanan rakyat". merdeka.com (dalem basa Indonésia). 2013-06-06. Dipungut 2025-05-27.

[3] Times, I. D. N.; Arofani, Prila. "Resep Keripik Jengkol, Begini Cara Membuatnya yang Enak dan Kriuk". IDN Times (dalem basa In-Id). Dipungut 2025-05-27.{{cite web}}: CS1 maint: unrecognized language (link)

[4] "25 resep keripik jengkol enak dan mudah". Cookpad (dalem basa Indonésia). Dipungut 2025-05-27.

[5] Media, Kompas Cyber (2022-10-27). "Cara Membuat Keripik Jengkol Sederhana, Bikin Stok Camilan di Rumah". KOMPAS.com (dalem basa Indonésia). Dipungut 2025-05-27.

[1]

[2]

[3]

[4]

[5]