Kerèta misteri

Kerèta misteri atawa kerèta hantu (Indonésia: wahana gelap, Inggris: dark ride) ièlah atu macem permaènan kerèta-kerètaan nyang biasa ditemuin di taman hiburan, nyang mana dia punya penumpang bakalan dibawa ngelewatin jalur nyang makè beragem cahaya penerangan èn èpèk-èpèk has, misalnya kaya' animasi, bunyi-bunyian, gending ama èpèk kusus laènnya.^[1] Sejak enni permaènan nongol mulain abad ke-19, dia punya tema permaènan uda macem-macem banget dah, kaya' terowongan cinta, tema serem, ama animasi interaktip.

Setilah

Kalo ngeliat bentuk nyang terdisinya mah, ni setilah kerèta misteri ngeruju' bakal permaènan nyang ngelewatin pangkèng gelap-gelapan, kaga' ada dah cahaya barang sedikit acan, entarannya ujug-ujug nongol benda-benda nyang disinarin ama sinar ultraviolet, nyang dia punya sinar pada ngagètin penumpang di kerèta. Abis itu baru dah nongol atu-atu adegan deri tiap bagèan pangkèng nyang dilewatin, nyang dia punya penampakan èn jarak èpèk animasinya uda diaturin ama perancangnya biar bikin kaget ama wah-wah penongtonnya. Kebiasaannya mah, tiap bagèan pangkèng nyang dilewatin juga dibatesin ama pintu burem, biar pemandangan entu penumpang bisa lebi diatur selama dia orang pada naék kerèta di dalem gedong gelap entu. Conto-conto kesohor permaènan kerèta misteri misalnya di Disneyland nya'entu Petualangan Nakutin Putri Salju, Perjalanan Berani Pinokio, Penerbangan Peter Pan, Perjalanan Liar Tuan Bangkong èn Alice di Negri Ajaib, nyang semuanya pada manpaatin pangkèng gelap-gelapan di ampir semua adegan pertunjukannya.^[2]

Sejarah

Kerèta misteri pertama nyang muncul akhir abad ke-19, nyang wayah entu mah dipanggil orang kerèta panorama" atawa "kerèta kesenengan".^[3] Jenis nyang banyak didemenin orang, biasa dipanggil "penggilingan tua" (old mill) atawa "terowongan cinta" (love tunnel), bentuknya perau-perau kecil nyang ngebawa penumpang lewatin kanal-kanal aèr. Kerèta misteri nyang namanya "Perjalanan ke Bulan" mulain dijalanin sejak taon 1901 wayah Pamèran Pan-Amerika. Marvin Rempfer èn Leon Cassidy, nyang ngeja Kumpeni Wahana Hiburan Pretzel, ièlah nyang kali pertama ngedaptarin paten kerèta misteri lèstrik tundanan atu (rèl tunggal) taon1928. Nyang ngetop juga sejarahnya nya'entu kerèta misteri "Futurama" di Pameran Dunia (World's Fair) di Niu-Yorek taon 1939, "Bajak Laot Karibia" èn "Ruma Berhantu" di Disneyland.

Model-model baru permaènan enni sekarang mah uda beda-beda banget kecanggihan teknologinya. Model nyang aga' kecilan biasanya masing makè teknologi animasi ama bunyi sederana kaya' model awalnya dulu, tapi model nyang lebi moderen dia punya teknologi mah uda canggih banget, misalnya makè animatronik, èpèk-èpèk kusus èn teknologi kerèta nyang paling maju.^[4]

Supaya bakal bikin mangkin menarik lagi, jalur perjalanan kerèta dalem pangkèng gelap dibikin ganti-ganti arah terus-terusan, belak-belok ngedadak, naèk-turun èn laèn-laèn tipuan. Jadinya mah entu para penumpang pada bingung, pada kaget kaga' gablek ngeduga bakal ke mana lagi atawa adegan apa lagi nyang bakal ditemuin. Semuanya dirancang bakal nimbulin rasa kejutan ama kesenengan nyang lebi jauh lagi bakal penumpang nyang naèkin enni kendaraan.

Ruju'an

↑ "Shining a Light on Dark Rides". Entertainment Designer. February 9, 2015. Diarsipin deri nyang asli tanggal 6 February 2015. Dipungut 27 May 2018.
↑ Acorn, S. (2010). Theme park design: Behind the scenes with an engineer. Orlando, FL: Theme Perks Press.
↑ Baker, Graeme S. "Archaeology of a Dark Ride". academia.edu.
↑ MacDonald, Brady (October 19, 2015). "25 best theme park dark rides in the world". Los Angeles Times. Dipungut September 29, 2017.

Sènggètan luar

Small World Studios: Dark rides that move you
BlueBox Attractions: Dark Ride Designer
Laff In The Dark: Dark Ride and Funhouse information
CAVU Designwerks: Trackless, Interactive, and Traditional Dark Ride Designer
Sally Corporation: Dark Ride Designer
Simworx : Trackless Dark Ride Designer
Garmendale Engineering: Dark Ride Designer
Holovis: Dark Ride Designer
Halloween Productions, Inc. Dark Ride Designer
Alterface : Dark Ride Designer
The Dark Ride Project : A VR Dark Ride archive

[1] "Shining a Light on Dark Rides". Entertainment Designer. February 9, 2015. Diarsipin deri nyang asli tanggal 6 February 2015. Dipungut 27 May 2018.

[2] Acorn, S. (2010). Theme park design: Behind the scenes with an engineer. Orlando, FL: Theme Perks Press.

[3] Baker, Graeme S. "Archaeology of a Dark Ride". academia.edu.

[4] MacDonald, Brady (October 19, 2015). "25 best theme park dark rides in the world". Los Angeles Times. Dipungut September 29, 2017.

[1]

[2]

[3]

[4]