Kerèdok

Kerèdok (basa Sunda: karédok; aksara Sunda: ᮊᮛᮦᮓᮧᮊ᮪) nya'entu daharan nyang dikeja maké berupa-rupa sayuran nyang dikasih bumbu kacang. Aselinya enni daharan dari tanah Sunda. Enni daharan biasanya jadi lau' bakal dimakan barengan paké nasi.

Bédanya ama Gado-gado ènsb

Laèn dari gado-gado, lotèk, atawa cètrok nyang dibikin maké sayur-sayuran nyang udah bolèh direbusin, kalu kerèdok mah dikeja maké sayur-sayuran nyang kaga dimatengin. Lagi bé, émang cocok bakal dimakan mentah atawa dilalap entu rupa-rupa sayuranah. Alatan entu, sayuran nyang dipaké gé béda macem ama nyang ada di gado-gado, lotèk, atawa cètrok pada. Ongkoh gé lebih dikit macem-macemnya. Kerèdok gé ora maké bangsa gorèng témpé ama tahu èn ora kamprah maké lontong. Bahan bakal bumbu kacangnya gé ada bédanya ama nyang laèn entu. Èn pas ditembrakin di piring gé dia bakal kiatan béda rupanya ama daharan-daharan nyang semacemnya entu téa.

Bahan bakal Kerèdok

Di bawah enni bahan-bahan bakal ngeja kerèdok.

Bahan isi: ngkol, kacang panjang, térong bulet, togé, timun, ama kemangi (kalu mao)
Bumbu kacang: gorèng kacang nyang uda alus bolèh digiling, bawang putih, cabé ceplik, cabé keriting mérah, kencur, gula mérah, garem atu tési ntèh baé (bolèh nyang alus atawa nyang kasar), aèr asem jawa, ama terasi.
Bahan pelengkap: bawang gorèng ama kerupuk.

Cara ngeja Kerèdok

Cara ngeja kerèdok entu kaya' begini:

Siapin sayurannya macem ngkol, kacang panjang, togé', térong bulet, ama kemangi. Entu sayuran pada dicuciin ama disiangin. Bakal ngkol ama kacang panjang entu dicacag keja kecit-kecit. Kalu sayuran nyeng laèn mah bagénin bé dulu.
Ngeja aèr asem jawa maké asem jawa nyang diseduh ama aèr panas. Aduk entu aèr asem jawa keja nyampur rata.
Garang terasi bakal bumbu, gorèng maké minyak dikit ampé wangi. Abis entu angkat ama taro dulu.
Mulain ngeja bumbu dari mula ngegrèndos dulu cabé ceplik, cabé keriting mérah, bawang, kencur, jerangan terasi, ama garem. Takeran cabénya nurutin baé pegimana kedoyanannya. Kalu ora tapi doyan pedes boléh ora maké cabé atawa maké cabé keriting mérah doangan baé dikit.
Abis entu masupin kacang giling alus ama gula mérah sepotong-sepotong. Diulek-ulek sembari dirasain kalu takerannya udah bener apa belonan.
Tambahin aèr asem jawa bakal ngèncèrin entu bumbu, ama tambahin lagi gula mérah bakal nambah padet bumbu. Ulek lagi ampé pas kentel ama rasanya.
Masupin ngkol ama kacang panjang nyang udah bolèh nyacag kecit-kecit téa. Terus ama togé' juga. Térong bulet ama timun diirisin kecit-kecit keja sembarangan baé, dadakan di atas coét. Terus masupin juga kemangi. Kalu ora demen maké kemangi alatan baunya, kaga ngapa ora maké gé.
Ulek-ulek sembari diaduk ampé sayuran-sayuranah rada kebebeg dikit, terutama térong bulet, kacang panjang, ama togé'nya. Enni supaya bumbu ama sayurannya nyampur jadi atu.
Salinin ke piring atawa daon, terus abis itu perulukin bawang gorèng ama kerupuk.
Kerèdok udah siap bakal dimakan.