Kadal bongsor
Kadal bongsor (hurup Arab Gundul: کادل بوڠسر) atawa dinosaurus entu rombongan binatang ngeloso' nyang roncèt dari semoyangan klad Dinosauria. Kadal bongsor nembé nongolnya lagi jaman Trias punya lama, antara barang 243 ama 233,23 juta tahon nyang udah, biar kata pegimana sanonya ama wayah puguh perobahan jogrokannya evolusi masing jadi barang boléan perdataan. Kadal bongsor jadi binatang tulang geger darat nyang tau ngeraksa abis kejadian kemodaran (kepunahan) Trias–Jura 201,3 juta tahon nyang udah ama terus ngeraksa selamanya jaman Jura ama Kapur. Catetan tetimbunan fosil ngasi unjuk kalo burung entu kadal bongsor nyang buluan, nyang berobah jogrok dari theropoda lagi jaman Jura Pengabisan, ama jadi atu-atunya garis turunan kadal bongsor nyang ditauin asin atawa selamet dari kejadian kemodaran Kapur–Berayaan Kolot (paleogene) barang 66 juta tahon nyang udah. Mangkanya, kadal bongsor kena dibelèk jadi kadal bongsor terbang (avian) ama kadal bongsor ga' terbang nyang udah pada modar, nya'entu kadal bongsor selaènnya burung.