Inuyasha
Inuyasha (hurup Arab Gundul: اينوياشا; basa Nipong: 犬夜叉) atawa Inuyasha: A Feudal Fairy Tale Isekai(basa Nipong: 戦国御伽草子 犬夜叉), juga' dikenalin jadi Séngoku Otogizōshi Inuyasha, nya'entu atu rèrodan pèlem cèmèn deri Nipong nyeng diserat ama digambarin ama Rumiko Takahashi. Ni pèlem cèmèn mulain ditaro' di majalah Weekly Shōnen Sunday semprakan tanggal 13 Nopèmber 1996 terus bebuntut pas tanggal 18 Juni 2008. Bab-bab atuannya uda dibundel jadi 56 volume tankoubon ama Shogakukan. Inuyasha punya janrah entu bisa petualangan [1] atawa cinta-cintaan.[2]
Inuyasha ceritranya dimulain wayah Kagomé Higurashi, atu boca wadon kolaan nyeng umurnya 15 taon deri Tokyo nyeng ujug-ujug balik ke Nipong wayah Séngoku abis kecebur dalem atu lèdeng di kelentèng milik dia punya kulawarga, tempatnya dia ketemuan ama siluman orang separo gukguk, nyeng kaga' laèn, ya, si Inuyasha. Wayah atu mahluk siluman deri tu wayah nyoba ngerebut bola isi habeluran Shikon no Tama nyeng ada di Kagomé, dia ora sengaja ngancurin tu bola habeluran jadi banyak pecaan bagéan-bagéannya ke semua-mua tempat di negeri Nipong. Inuyasha dan Kagomé mulain petualangannya bakal ngumpulin tu pecaan bola habeluran sebelon siluman separo gonggo nyeng kuat-jaat nyeng namanya Naraku nemuin semua-muanya. Inuyasha ama Kagomé boléin berapa kongco sepanjang petualangannya, keitung Shippo, Miroku, Sango, terus Kirara. Béda ama unsur banyolan nyeng cenggableg di seratan Takahashi sebelonnya, pèlem cèmèn Inuyasha ada punya topik nyeng rada gelapan ama rada beneran nyeng maké pelataran wayah Séngoku bakal gampil ditampilin bakal kekerasan sambil pancèn mertahanin berapa unsur banyolannya.
Umrupan pèlem cèmèn
[permak | permak sumber]Ni pèlem cèmèn uda dijadiin dua, nya'entu pèlem cèmèn di tipi nyeng dikeja ama Sunrise. Seri awalannya ada punya 167 episode di saluran Yomiuri Telecasting Corporation ama Nippon TV di Nipong semparakan tanggal 16 Oktober 2000 ampé tanggal 13 Sèptèmber 2004. Seri keduanya, judulnya Inuyasha: The Final Act, mulain tayang lima taon abisannya pas tanggal 3 Oktober 2009, nyeng ngitung sisa-sisa cerita deri seri pèlem cèmèn terus abis pas tanggal 29 Maret 2010, abisnya ditayangin sebanyak 26 episode. Empat pèlem ama atu animasi video asli uda juga' ditongtodin. Pernak-pernik laènnya juga' keitung gim delengan ama atu pèlem cèmèn èntèngan. Viz Media uda kasi lisensi pèlem cèmèn, dua seri pèlem cèmèn, ama semua pèlem bakal ditongtodin di Amrik Lor. Seri Inuyasha ama Inuyasha: The Final Act diputer di Amrik Serèkat liwat saluran Adult Swim (nyeng terusannya di dia pada punya blok pemrograman Toonami) semprakan taon 2002 ampé 2015.
Penjembaran
[permak | permak sumber]Takahashi nyerat Inuyasha abis ngelarin Ranma ½. Dengen bédanya ama cerita banyolan nyeng dikejanya kaya' Uruséi Yatsura (1978–1987), Maison Ikkoku (1980–1987), ama One Pound Gospel (1987–2006), Takahashi kepèngèn ngeja cerita nyeng alurnya tuh rada gelap nyeng deket ama cerita Mermaid Saga. Biar alurnya ènak, ceritanya dibikin mulain wayah Séngoku pas di mana-mana perang entu jadi hal biasa. Takahashi ngaji belajar soal gambaran samuray atawa istana. Pas Juni 2001, alur buntutan ceritanya ga' jadi dikeja lantaran Takahashi masing ngangngong soal gimana ujung ubungan Inuyasha ama Kagomé. Lebi jaunya, Takahashi ngomoong kalo dia belon ada ahir bakal cerita cèmèn deri mualainnya.[3][4]
Sinopsis
[permak | permak sumber]Cerita mulain di Tokyo, Nipong. Ada, lah, atu boca wadon kolaan nyeng namanya Hirugashi Kagomé nyeng lagi nyariin dia punya empus Buyo nyeng nyempelung ke lèdeng keramat, lantaran adè'nya ngeri masupnya. Wayah Kagomé nyampé di lobang lèdengnya, siluman kelabang atawa Mukadé Joro nongol deri dalem Honé-kui no Ido atawa lèdeng Pemakan Balung terus diserang, dah, tuh, dia. Tu siluman nyerang Kagomé lantaran dia gablegin Bola Empat Arwah atawa basa Nipongnya (四魂の玉 Shikon no Tama) di dalem dia punya awak terus kepingin bakal ngambil paksa tu bola. Terusannya, Kagomé disèrèt ke dalem wayah Séngoku atawa Séngoku Jidai. Kagomé ngangngong ama sekulilingannya nyeng berobah jadi alas utan. Kagomé berusaa bakal nyari jalan kuar terus ngiat ke atu pu'un keramat (Goshinboku), di sono Kagomé ngiat atu orang lanang nyeng bebu'uk pérak ama kupingnya ga' biasanya di atas palanya. Kagomé senapsaranan terus ndeketin tu orang lanang terus nyekel tu kupingnya nyeng èmangnya koplak, ujug-ujug dia diserang ama penduduk désa nyeng dikiranya dia jelemaan siluman rubah. Terus, Kagomé ketemu ama atu Miko (suster agama Sinto) tua nyeng namanya Kaédé nyeng sadar kalo Kagomé, nih, jelemaannya Kikyo (Kaédé punya cécé nyeng juga suster agama Sinto nyeng èlmunya mantep) nyeng uda mati 50 taon ke belakang terus jasadnya dibakar ama Shikon no Tama. Kaédé nyeritain pegimana tu 50 taon belakangan, atu Han'yō (separo siluman) namanya Inuyasha berusaa nyuri Shikon no Tama deri Kikyo. Kikyo nyeng bedara-dara sono-sini berasil nyègel Inuyasha paké pananya terus ngeja Inuyasha tidur terus-terusan terus ga' bisa dicabut selaèn ama orang nyeng saktinya kaya' Kikyo. Terusannya, Kagomé dateng deri wayah gini terus nyabut sègel nyeng ada di Inuyasha nyeng lagi tidut, lantaran siluman Mukadé Joro nyeng nongol lagi. Inuyasha nyeng bangun lagi, sikapnya ga' baè' lantaran Kagomé mirip ama Kikyo. Atu ari nongol, tuh, seguyub orang nyeng jaat mau ngerebut Shikon no Tama terus kaga' taunya dia pada punya dedengkot, dah, mati terus disurupin ama siluman gagak atawa Shibugarasu. Lantaran kepingin ngaliin peratian Shibugarasu, terus Kagomé ngelèmpar Shikon no Tama kuar terus ditenggak ama Shibugarasu mangkanya dia jadi lebi kuat terus nyerang atu boca kecil, Inuyasha nyeng kaga' pati sabar nguarin jurusnya nyeng ngeja Shibugarasu ancur serènra tu boca kecil nyebur ke kali. Kagomé nyeng nyelametin dia, terus ngiat Shibugarasu balik lagi ke wujud asal lantaran bantuan Shikon no Tama, terus ada kaki Shibugarasu nyeng ketinggal di baju tu boca, mangkanya Kagomé ngelepasin pana sambil ngiket tu kaki Shibugarasu ke pananya, berasil, dah, tuh, Shibugarasunya dipana sama-sama ama Shikon no Tamanya jadi kepeca ampé tu Shikon no Tama ancur jadi kecil-kecil nyeng kepencar ke semua-mua tempat. Terus, mulain, dah, tuh, petualangan Inuyasha ama Kagomé bakal nyari tu Shikon no Tama nyeng jadi pecaan. Atu-atu paguyuban Inuyasha ama Kagomé namba, mulain Shippo, Miroku, terus buntutannya Sango ama Kirara sembari ngalain musuh-musuh nyeng pada nongol. Ni pèlem cèmèn tau ditongolin di Indosiat, Global TV, ama Spacetoon.
Tokoh
[permak | permak sumber]Inuyasha
[permak | permak sumber]InuYasha (hurup Tionghoa Nipong: 犬夜叉) nya'entu tokoh utama dalem ni cerita, seorang Han'yō (orang setenga siluman) nyeng asalnya deri papanya nyeng siluman ama mamanya nyeng orang manusia. Dengen asal mula deri siluman guguk, Inuyasha ada punya pedang mantep nyeng diturunin ama dia punya papa nyeng namanya Téssaiga atawa Tétsusaiga. Dia nyariin Shikon no Tama lantaran mau jadi siluman nyeng kuat. Sebelon dimulain alur ceritanya, dia demen ama Kikyo, cuman terusan jalan ceritanya, dia juga' mulain demen Kagomé nyeng rupa-rupanya tu jelmaan deri Kikyo. Senjata andelannya, Tétsusaiga entu pedang nyeng bisa ngeresep èlmu lawannya nyeng lebi kuat kalo berasil ngalain tu lawannya. Inuyasha terus boléin èlmu anyar dengen Tetsusaiganya terus nggemblèng pedangnya biar jadi lebi kuat. Kekuatan ahirnya diboléin deri Méido Zangétsuha deri Ténséiga Sésshomaru punya. Buntut ceritanya, dia keliatan gableg demenan ama Kagomé Higurashi.
Kagomé Higurashi
[permak | permak sumber]Kagomé Higurashi (hurup Tionghoa Nipong: 日暮かごめ; tuker hurup Latèn: Higurashi Kagome) nya'entu boca wadon kelas 3 SMP nyeng idup wayah gini ama jadi jelemaan Kikyo deri jaman baheulanya. Senjata nyeng terus-terusan dibawa entu ada pana ama busurnya. Dia mbawa Shikon no Tama di dalem dia punya awak nyeng diincer ama siluman-siluman bakal munggain dia punya èlmu. Sipatnya béda ama Kikyo cuma tetep, baé, meraitiin Inuyasha ampé dia èling kalo dia demen ama Inuyasha, terus cemburu kalo-kalo Inuyasha ketemu ama Kikyo. Mukanya Kagomé ama Kikyo èmang mirip, dah, cuma bédanya cara maké baju ama sipatnya aja. Kagomé dalem pèlem cèmèn Inuyasha terus maké seragam kolaan ama rok pèndèk nyeng warnanya ijo deri awal ampé buntut ceritanya, béda ama Kikyo nyeng terus maké kimono ringkes. Kikyo tau bilang kalo èlmu gaib nyeng ada di Kagomé lebi gedéa deri dia sendèwèk. Cuma, Kagomé masing belon menjès mangpaatin dia punya èlmu gaibnya.
Miroku
[permak | permak sumber]Miroku (hurup Tionghoa Nipong: 弥勒) nya'entu atu biksu Buda nyeng kena kutukan lobang angin deri Naraku. Ni biksu mesum mulain demen ama Sango terus ada punya janji kalo kutukan lobang anginnya uda ilang, dia bakal ngawinin si Sango. Wayah Naraku dikalain ama Inuyasha ama Kagomé, lobang angin di dampal tangannya ngilang. Dia njejegin dia punya jangji bakal ngawinin si Sango terus dia pada gableg anak tiga. Cuma, sikapnya nyeng suka ngewadul bakal bolé upah ama sipat mesumnya ga' pati berobah.
Sango
[permak | permak sumber]Sango (hurup Tionghoa Nipong: 珊瑚) nya'entu atu anggota kulawarga deri Taija yeng ahli mbasmi siluman. Senjata andelannya entu Hiraikotsu nyeng dikeja deri balung-balung siluman. Kulawarganya dimatiin ama dia punya adè' sendèwèk nyeng didalangin ama Naraku wayah dipanggil bakal mbasmi siluman di atu istana. Dia berusaa nyari terus nyelametin adè'nya deri cengkereman Naraku, terus ahirnya dia berasil nyelametin adè'nya. Dia sokanan dikeja mara ama Miroku nyeng suka ngerayu orang wadon paké jurus andelannya, "Lu pèngèn ga ngeberojolin gua punya anak?". Dalam cerita banyolannya, Sango suka keliatan nggeplak Miroku punya pala maké Hiraikotsunya kalo-kalo dia ngeliat Miroku ngerayu wadon laèn.
Shippo
[permak | permak sumber]Shippo (hurup Tionghoa Nipong: 七宝; tuker hurup Latèn: Shippō) nya'entu siluman rubah kecil nyeng orang tuanya dimattin ama siluman gelèdèk Hitén ama Mantén. Dia nulungin Inuyasha terus berantem mulu ama Inuyasha, soalnya sipatnya dua-duanya, tuh, kaya' boca banget. Kalo dijailin ama Inuyasha, dia suka minta dilindungin ama Kagomé. Sipatnya nyeng kaya' boca bikin dia suka njeblag kalo ngeliat apa-apa, nah, enni hal sokanan ngganggu Inuyasha, soalnya Inuyasha kadanan mbantah jeblagan Shippo nyeng suka bener baé gitu. Entu ngelantaranin si Shippo sokanan keliatan lagi ditakol ama Inuyasha.
Myoga
[permak | permak sumber]Myoga (Tulisan Katagana: ミョウガ; tuker hurup Latèn: Myōga) nya'entu atu kuru nyeng suka ngasi tau Inuyasha wayah ada bahaya walopun ahirnya dia kabur kalo lagi bahaya.
Kikyo
[permak | permak sumber]Kikyo (hurup Tionghoa Nipong: 桔梗; tuker hurup Latèn: Kikyō) nya'entu atu miko nyeng gableg èlmu gaib tinggi, senjata andelannya pana ama busurnya. Pas mulain, dia ama Inuyasha entu pada demen-demenan, cuma dia pada diadu domba ama Naraku nyeng pèngèn atinya Kikyo. Nah, akibatnya, Kikyo nyègel Inuyasha di pu'un melèngken si Kikyo tu mati lantaran dia punya luka nyeng dibolénya. Lima pulu taon abisannya, dia diidupin lagi ama Urasué, penyhir nyeng pèngèn èlmu Kikyo, cuma ahirnya Urasué dimatiin ama Kikyo sendèwèk. Mula-mulanya, dia mbenci Kagomé terus ada niatan bakal matiin Inuyasha. Cuman, abis tau kalo nyeng ngadu domba dia ama Inuyasha entu Naraku, dia ga' jadi matiin Inuyasha tapi dia tetep mbenci Kagomé.
Sésshomaru
[permak | permak sumber]Sésshomaru (hurup Tionghoa Nipong: 殺生丸; tuker hurup Latèn: Sesshōmaru) nya'entu kaka' deri Inuyasha nyeng ngewarisin pedang dia punya papanya nyeng namanya Ténséiga. Mula-mulainnya, dia suka berusaa bakal matiin Inuyasha terus ngambil Tétsusaiga deri dia. Alasannya dia mbenci Inuyasha entu lantaran dia ngerasa kalo Inuyasha entu atu han'yo nyeng ga' ada hak bakal boléin warisan Tétsusaiga deri papanya terus nganggep kalo papanya lebi sayang ama Inuyasha. Dia ada punya sipat irit ngomong, jutèk, ama tuka ngerendain orang laèn atawa "han'yo laèn keitung Inuyasha ama kongco-kongconya. Cuma, kemariannya, sedikit-sedikit dia berobah abis ketemuan ama boca wadon kecil gagu' namanya Rin, nyeng ngasi dia makan (walopun diacuin) wayah dia lagi banyak luka awaknya lantaran Kazé no Kizunya Inuyasha. Selaèn entu, dia juga' ngijinin Kohaku, adè'nya Sango bakal nginclo' ama dia. Dia ngakuin kewontenan ténséiga (pedang mujarap) ama jurus anyar, Méido Zangétsuha. Buntutnya, Sésshoumaru boléin pedang deri dia sendèwèk, Bakusaiga.
Naraku
[permak | permak sumber]Naraku (hurup Tionghoa Nipong: 奈落) nya'entu jelemaan deri tukang maling nyeng namanya Onigumo, tukang maling nyeng kena luka bakar dikabèhan awaknya terus demen ama Kikyo nyeng suka ngerawat dia. Lantaran dia ga' bisa begerak, dia nyajènin dia punya jiwa sendèwèk bakal siluman bakal boléin awak nyeng perdèo, jadinya berojol, dah, tuh, Naraku. Dia naroin bibit-bibit kebencian bakal Kikyo ama Inuyasha jadinya dia bedua nyeng tadinya demenan jadi musuan. Ciri hasnya entu ada punya luka bakar nyeng mirip kaya' gambar gonggo di gegernya.
Dia suka ngadu domba Inuyasha ama kongco-kongconya, cuma lantaran ubungan Inuyasha nyeng kuat ama kongco-kongconya jadi Naraku mili misain dia pada terus ngerasukin atu bakal matiin nyeng laènnya. Ciri hasnya, tuh, nipu muslihat bakal ngadu domba sodara sedulur ama temennya bakal jadi pada bunu-bunuan terus Naraku lebi suka ngasi luka batin bakal lawannya, kaya' wayah dia ngewayangin Kohaku bakal mbunu keluwarganya terus ngelukain Sango, juga' wayah dia berusaa ngerasukin Kagomé bakal mbunu Inuyasha. Pas beranteman buntutnya, Inuyasha, Sésshomaru, ama kongco-kongconya kerja sama bakal ngalain Naraku. Sebelon dia mati, dia ngarepin banget Shikon no Tama bakal misain Kagomé deri Inuyasha dengen cara mbawanye ke alam Shikon no Tama.
Jakén
[permak | permak sumber]Jakén (hurup Tionghoa Nipong: 邪見) nya'entu siluman kodok nyeng nginclo' ama Sésshoumaru. Sipatnya baè' béda banget ama dia punya tuan. Dia cerèwèt banget tukang ngomong. Ga' jarang juga' dia kena bagelan batu deri Sésshoumaru lantaran sipatnya nyeng cerèwèt.
Rin
[permak | permak sumber]Rin (hurup Hiragana: りん) nya'entu boca wadon cilik nyeng uda mati lantaran diserang ama siluman serigala cuma diidupin lagi ama Sésshoumaru maké pedang Ténsaiga. Mula-mulainnya, dia keliatan maké kimono lusu terus awaknya kumel. Terusannya, dikasi tau kalo ga' taunya si Rin enni, tuh, anak sonder mama-papa nyeng kudu banting tulang bakal dia sendèwèk, entakanu walo kudu nyolong, mangkanya dia sokanan jadi bulan-bulanan orang-orang kampung maké alesan kalo dia ga' tau makasih.
Pas Sésshoumatu ketemu ama Rin pertama kalinya, Sésshoumaru nyeng luka-luka parah lantaran berantem belakangannya ama Inuyasha. Rin keliatan lagi usaa bakal ngasi makan cuma ditolak ama Sésshoumaru. Wayah kedua kalinya Tin ndatengin Sésshoumaru, dia uda luka-luka lantaran digebugin ama orang-orang kampung. Sésshoumaru ngabarin kalo dia ga' makan makanan orang terus nanyain ngapa si Rin enni luka-luka. Rin ga' ngewaro cuma mèsem, baé. Wayah siluman-siluman serigala nyerbu kampung tempat tinggal Rin, Rin mati ama gerombolan tu siluman serigala. Maké Ténséiga, Sésshoumaru ngidupin Rin balik terus bagènin tu boca nginclo' terus nggero' maké panggilan Sésshoumaru-sama. Wayah Rin keliatan lagi, dia uda bersi terus maké kimono anyar nyeng coraknya kotak-kotak puti orèn.
Kohaku
[permak | permak sumber]Kohaku (hurup Tionghoa Nipong: 琥珀) nya'entu adè'nya Sango. Lantaran diaru-aruin ama Naraku dia mbunu papa ama anggota pembasmi siluman laènnya, juga' ngelukain Sango. Dia mati dibunu ama orang suruannya Naraku, cuma diidupin balik maké kuasa deri Shikon no Tama. Ingetannya diusep ama Naraku terus dijadiin bonéka nyeng nurutin semua dia punya perinta, cuma ingetannya ujung-ujungnya balik juga' terus Kohaku nawaytu bakal bales dendem ama Naraku dengen kerja sama ama Kagura. Pas Kagura mati, dia nggantungin diri ama Kikyo, terus abis Kikyo mati, dia nginclo' ama Sésshoumaru. Walopun idupnya begantung ama Shikon no Tama, pas pecaannya diambil ama Naraku, Kohaku tetep gableg idup lantaran cahaya nyeng dikasi ama Kikyo sebelon dia mati. Ujung cerita, dia keliatan nggemblèng diri dalem asuan Totousai bakal jadi Taija nyeng kuat.
Kanna
[permak | permak sumber]Kanna (hurup Tionghoa Nipong: 神無) nya'entu anak keduanya Naraku. Hawa-hawa jaatnya kadanan dirasanin lantaran dia hampa. Senjatanya entu kaca nyeng gableg nyerep toh terus mbalikin serangan musu. Diceritain kalo dia mati lantaran beranteman ama Inuyasha, Kanna ngasi awas paling ahir bakal Kagomé kalo Naraku entu lemah ama cahaya Kikyo.
Kagura
[permak | permak sumber]Kagura (hurup Tionghoa Nipong: 神楽) nya'entu anak sulung Naraku. Dia sokanan mbadung ama perinta Naraku lantaran dia pèngènin kebébasan, nyeng ujungnya dimatiin ama Naraku. Senjatanya entu kipas angin nyeng gableg ngendaliin angin ama nahan sabetan Tétsusaiga. Keliatannya dia demen ama Sésshoumaru, cuma dia ga' tau diceritain dalem alur. Dia tau minta tulung ama Sésshoumaru ama Inuyasha dengen cara ngasi tau kelemaan-kelemaan Naraku terus ngabarin kalo serangan-serangan nyeng bakal dilakonin ama Naraku. Keitung soal jantung Naraku nyeng kepisa di awak atu orog. Dia juga' kerja sama ama Kohaku nyeng ingetannya, dah, balik terus niat balesin dendam ama Naraku. Kagura pèngèn jantungnya bakal balik ke awaknya. Cuma sedinya, pas Naraku mbalikin jantung Kagura, Naraku ngeracunin awaknya Kagura. Kagura nyeng uda abis arepan bakal mati ketemu ama Sésshoumaru nyeng ngeliat langsung Kagura lagi sakaratulmaut. Kagura terus mati sembari mèsem. Inuyasha nyeng telat denger soal matinya Kagura ketemu Sésshoumaru terus betakon soal Kagura matinya pegimana, terus dijawab ama Sésshoumaru kalo Kagura mati sembari mèsem.
Goshinki
[permak | permak sumber]Goshinki (hurup Tionghoa Nipong: 悟心鬼) nya'entu anak ketiganya Naraku. Dia bolé mbaca pikiran musu terus matain pedang Tétsusaiga. Cuma, Goshinki mati dibunu ama Inuyasha nyeng mawjud jadi siluman bener (youkai) terus calingnya diambil ama Sésshoumari bakal dijadiin pedang sétan namanya Toukojin.
Shichinintai
[permak | permak sumber]Sichinintai (atawa digero' sebagé Pasukan Tuju Orang) (hurup Tionghoa Nipong: 七人隊) isinya tuju orang, nya'entu: Bankotsu (蛮骨), Rénkotsu (煉骨), Jakotsu (蛇骨), Suikotsu (睡骨), Ginkotsu (銀骨), Mukotsu (霧骨), ama Kyokotsu (凶骨). Dia pada jadi jombi lantaran diidupin lagi ama Naraku maké pecaan Shikon no Tama. Masing-masing gableg senjata nyeng mantep.
Ruju'an
[permak | permak sumber]- ↑ "The Official Website for Inuyasha". Viz Media. Dipungut 27 Oktober 2017.
- ↑ "Inu Yashu TV Series". Anime News Network. 20 Juni 2000. Dipungut 29 Juli 2018.
- ↑ Yoshida, Toshifumi; Nakatani, Andy (June 2001). "Inuyasha Comes to America". Animerica (6). Viz Media. ISSN 1067-0831.
- ↑ Horibuchi, Seiji. "Rumiko Takahashi – Interview by Seiji Horibuchi". Animerica. Diarsipin deri nyang asli tanggal February 9, 2002. Dipungut November 22, 2020 – liwat Viz Media.