Ikan singa
Ikan singa (basa Inggris: red lionfish) nya'entu ikan nyeng asalnya deri kulawarga scorpanidae ama bangsa scorpaeniformes. Ni ikan bisa ditemuin di daèrah panas ama rada panas di bagèan Laotan Hindi Kidul, Laotan Teduh Kidul, ama Laot Merah. Biar kata dia keitung ikan nyang ada racunnya, ni ikan rada kesohor bakal orang-orang nyeng seneng ikan rias-riasan deri aèr asin.
Kawin
[permak | permak sumber]Kalo lagi musim kawin, ni ikan singa pada merub di tempat nyeng sama. Perubulan ni ikan singa sokanan ada atu lanangnya ama berapa nyeng wadonnya. Pas lagi kawin, ikan singa wadon nguarin endognya duluan ke aèr baru, dah, diparanin ama lanangnya nguarin peju. Endog nyang uda jadi bakal ngapung munggah di aèr, atu kantong lendèr gableg muat ampé endognya 20.000 biji.
Tu endog bakal netes abis 36 jam, barengan ama pecanya lapisan lendèr nyang nyatuin tu endog. Boncèlan tu ikan singa idup ngalor-ngidul ngikutin arus laot. Dia pada idupnya makanin héwan-héwan kecil kaya' kuman laot. ni boncèlan ikan singa uda bangsa sebulan, abis entu baru, deh, ikan singa nyang masing pitik mulain idup di bawa laot ampé dia gedé.
Tempat tinggal
[permak | permak sumber]Ikan singa sokanan idup di karang-karang atawa batu-batu di kedaleman paling banter 50 mèter. Ikan singa ni suka ngeronda, jadi bakal nggebug laèn ikan nyeng masup ke dia punya daèrah. Ikan singa kata-katanya, mah, héwan nyeng melèk kalo malem, kalo siang bolong dia ngejedog di dia punya ruma, nya'entu lobang-lobang di karang-karang. Kalo lagi nutur makan, ni ikan sokanan ngojay pelan-pelan ndeketun mangsanya baru dicaplok, dah. Makanan ni ikan sokanan entu ikan nyeng kecitan, udang, ama rajungan.
Racun
[permak | permak sumber]Racun ikan singa adanya di sirip dada ama gegernya nyang gedé mbentuk kipas. Cuman sirip nyang bertulang entu nyang bahaya buat manusia, soalnya bisa nembus kulit. Rasa nyang nongol kalo manusia kena racun ni ikan entu ngerasa sakit di luka, puyeng, napas engap, ampé-ampé bisa ampé kojor. Tapi kejadian kaya' gini, mah, jarang banget. Pertulungan pertama nyang bisa dikasi kalo kena racun ikan singa entu nyiram bagèan nyang kena racun paké aèr panas, abis entu korban dibawa ke rumah sakit nyang deket buat dapet pengobatan terusannya.
Satwa nyang nganclok sono-sini
[permak | permak sumber]Ikan singa dinyahoain bawa mas'alah baru buat keidupan di peraèran Karibia ama Atlantik. Gara-gara ada ikan singa nyang dilepasin ke peraèran sono semprakan taon 1990-an, kaya'nya mah gara-gara orang nyang melihara uda bosen, terus dia pada kawin, deh, makanin ikan-ikan di sono. Mas'alah jadi makin ribet soalnya tu ikan beranaknya cepet banget, terus kaga' ada musuh bebuyutannya di peraèran Karibia, jadi, dah, tuh, numbuh di tempat idup barunya mingkinan ga' keopènan.
Berapa cara uda dilakonin, kaya' nangkepin ramé-ramé buat ngurangin jumlahnya. Orang-orang sono juga' pada pancingin terus dimakan tu ikan, biar kata ada racunnya, dagingnya dikata enak terus kaga' bahaya kalo dikejanya bener.