Grombyang
Grombyang (basa Jawa: Sega Grombyang) ya'entu atu jenis nasi campur nyang jadi makanan khas masarakat Pemalang, Jawa Tenga.[1] Nama makanan enni asalnya dari cara nyajiinnya, ya'entu kuahnya banyak banget ampé ampir ngelubér dibanding isinya, jadinya pas disajiin goyang-goyang pas dibawa. Di basa Ngapak dialèk Pemalang, kewontenan nyang goyang-goyang entu disebutnya grombyang-grombyang.
Isian grombyang enni biasanya nasi ama irisan daging kebo nyang disirem kuah, terus disajiin di dalem mangkok kecil. Biar makin mantep, makannya bareng ama saté kebo. Ciri khas laèn dari nasi grombyang enni diliat dari tempat dagangnya, nyang maké kuali gedé, terus tempat nasinya ditutupin paké kaèn méra, ama ada lampu témplok nyang remeng-remeng. Selaèn ama nasi, bisa juga' soto grombyang dimakan ama lontong dekem. Pembelinya juga' biasanya, mah, makan sambil duduk di bangku kayu nyang pendek banget, orang sono, mah, nyebutnya dingklik.
Kalo ditanya kapan pertama kali enni makanan ada, émang kaga' ada nyang tau pasti. Tapi kata orang-orang tua di Pemalang, nasi grombyang enni udah ada deri taun 1960-an. Jaman dulu, mah, abang-abang nyang jual kaga' mangkal di satu tempat, tapi keliling kampung atawa nyari tempat nyang ramé di sekitaran alun-alun Pemalang. Nah, kalo sekarang, mah, penjual nasi grombyang udah pada mangkal èn buka lapak nyang netep.[2] Beberapa ruma makan grombyang nyang kondang bener di Pemalang antara laèn H. Warso di Jl. R.E. Martadinata deket alun-alun, ama H. Waridin di Sirandu deket bekas terminal lama Pemalang.
Paranan
[permak | permak sumber]- ↑ Rasyid, Shani (21 November 2021). "Mencicipi Nasi Grombyang, Makanan Unik Khas Pemalang yang Jadi Warisan Budaya". merdeka.com (dalem basa Inggris). Dipungut 13 Januari 2022.
- ↑ Utomo, Ilham Nur; Kamal, Neilia (2022-12-12). "Rise and Survive" (dalem basa Inggris). Atlantis Press: 233–238. doi:10.2991/978-2-494069-29-9_26. ISBN 978-2-494069-29-9.
{{cite journal}}: Cite journal requires|journal=(pertulungan)